Isaya 47
47
Kuwa kwe Bhabhiloni
1 #
Isaya 13:1—14:23; Jeremiya 50:1—51:64 Deluka ugale mu hwuluba,
iwe mwanadi we Bhabhiloni.
Gala pasi pasina tjigalo tje bumambo,
iwe nkololokadzi we Bakhaladiya.
Nge kuti awungabe utjadang'wa kuyi nnyolo wakatebama.
2Tola gwiyilo ukwiye bgwisa,
dusa tukwi iyo mu nsholo,
ukanye thako iyo, makumbo awo abe patjena upalame vula utjuluke njizi.
3Unowobonegwa, ne kubhakhwa nge shoni kuko kowobe patjena.
Ndowobgwilizila, akuna wandinowosiya.
4Ndzutunuli wedu zina lile ndi Yahwe Masimbawose,
Wakayengemala we Iziraela.
5Gala unyalale, uyende mu zhalima,
iwe nkololokadzi we Bakhaladiya.
Ngoti awutjowodang'wa
nfumakadzi we bumambo.
6Ndakabe ndagwadzila moyo bathu bangu,
ndakalengudza thaka yangu,
abalonga mu maboko awo,
ngono ukasibahwile ngoni,
ne bakwegula ukabatilika jokwi linolema.
7Wakazwidwa ukati, “Ndowobe nfumakadzi nge kusingapele.”
Ndizo wali usakalonga zwithu izwezwi mu moyo
kene kuli kukumbula kuti konopela kwakatini.
8 #
Zumbunulo 18:7, 8 Ndizo ngwenu wali ihwa woku iwe unoda kuzwishathisa nge mizipo,
ugele uti wakabakililika,
uzwidwa mu moyo uti,
“Imi ndimi, akuna mmwe kuzhe kwangu,
andingatongobe tjilikadzi
kene kuli kulashikigwa nge bana.”
9Zose izwezwi zwibili zowokuwila pawakakangang'wa mu zhuba ling'ompela,
kulashikigwa nge bana ne butjilikadzi
zowokuwila nge buzhalo pakati kwe bung'anga gugo ne simba gulu le masalamusi awo.
10Wakazwiwana wakadzikama pakati kwe bubi gugo uti,
“Akuna unondibona.” Butjenjedu gugo ne zibo iyo zwakakulasha,
ngono ukazwidwa mu moyo uwo ukati,
“Imi ndimi, akuna mmwe kuzhe kwangu.”
11Mbatsha dzowokuwila,
dzausingake ukadusa nge bung'anga gugo,
zwibiibi zowokuwila zwausingake ukadusila kutjena nawe,
golomodzo lausingazibe nge kwalo lowokuzhila tjinyolotjo.
12Dwilila wakasima mu masalamusi awo ne bung'anga gugo gwakawanda,
igo gwetjinga gwawakashinga nago kudwila mu butjetjana gugo,
pamwe unowowatshika, pamwe unozhisa kutja.
13Wanyadziwa nge zwikumbuludzo zwaunopiwa.
Ngabazhe ibabo banazibo ngekwe zhuzhugwi bakutjidze,
ibabo banozwidiya ngekwe nyenyedzi,
banoti mwedzi mmwe ne mmwe ugala bakaleba zwinowokuzhila.
14Nge malebeswa banonga malala e bushwa,
moto unowobapisa ukabapedza.
Ibo nge kwabo abangazwitjidze mu nthuto we moto.
Ipapa akuna masimbe e moto nthu aangazwidziyisa ndiwo,
akuna moto ungadziiwa.
15Ikoku koga ndiko kwabangakuthamila,
ibo ibaba bawakashinga nabo museenyelana kudwa mu butjetjana gugo.
Bose banowokusiya, mmwe ne mmwe eyenda nge zila iye,
akuna unowosala ungakutjidza.
Kalanga Bible © Bible Society of Botswana, 2008, 2018.