Isaya 46
46
Midzimu ye Bhabhiloni
1Bheli wakakotama, Nebo wakalembeleka,
midzimu yabo yakabezhiwa bakaisenga nge ng'ombe nenge zwimwe zwithuwo,
zwifano izwezwi zwamakasenga
mitolo inonyadza zwithuwo izwezwi.
2Inolembeleka ikathigama,
aingatjidze ntolo,
iyo nge kwayo inotapiwa.
3Mundihwilile imwi ludzi gwa Jakubo,
imwi malimbelimbe wose e ludzi gwa Iziraela,
ibo bandakabhabha kudwa mu kuzwagwa
ngono amuguga kudwa mu tjibumbilo.
4Ne makwegula imi nditji iye,
misholo yenyu ibe mitjena nge vi ndowomuguga koga.
Ndakamuthama, ndowomuguga,
abuya amutjidza.
5Ndiani wamungandifananya naye mukandilizanya naye?
Ndiani wamungandibapisa naye kuti tilizane kene?
6Ibabo banotebulila golide pasi kudwa mu hwobhodo dzabo,
bebe beyela siliva nge zwiyelo,
bebe betapa nthuli kuti athame ndzimu,
ipapo bebe bethigama beunamata.
7Banomilidza iwoyu ndzimu beupika pa thudzi, beusenga,
benougadzika mu gumwe bugalo, ube uma ipapo
usingatubule kuyenda udwa ipapo pawabigwa.
Kene nthu angamilidza hwi ewutembezela, awutodabila
kene kunbhatsha muna zwinondziyidza.
8Alakanani ikoku mukumbule,
mukulonge mu mimoyo yenyu imwi bapanduki.
9Kumbulani zwithu zwantolo zwe kutanga.
Imi ndi Ndzimu akuna mmwe kakale.
Imi ndi Ndzimu akuna mmwe unonga imi.
10Ndozibisa zwinowoshingikala kubupelo iko kutji mu kutangisa,
kudwa mu misi ya ntolo ndakaleba zwitjawoshingikala
nditi, Ndongoloso yangu inowoyenda sekwa ndakabiga,
ndowoshingikadza mazwimisilo angu.
11Ndodana dzu kudwa ku bhezhuba,
kudwa kushango ikule kusipano,
ndoweba nlume kuzha kuwoshingikadza mazwimisilo angu.
Tjandakaleba nditjo tjandinowoshingikadza,
tjandakalongolosa nditjo tjandinowothama.
12“Mundihwilile imwi bana moyo mikukutu,
imwi bakule ne ndulamo.
13Ndosedzedza ndulamo yangu pejo, ate ili kulekule,
ne jidzo langu alitowononoka,
ndowozhisa jidzo mu Ziyoni,
gudzo langu ndolizhisa ku Iziraela.”
Kalanga Bible © Bible Society of Botswana, 2008, 2018.