Isaya 28
28
Kolomodziwa kwe Ifureimu
1Yee mme wee tjapalala tjiala tje bushe tjinozwida, tje zwilaladzi zwe Ifureimi,
ne luba linotimbama le naka kukwe kunopenyelela,
liku misholo ye nkuku una mavu akakola wa ibabo banokuligwa nge nkumbi we zhambi!
2Bonani, she banaye iye wakasima una masimba,
kufanana ne dutu lina tjivulamabgwe linokolomodza,
kufanana ne vula ye nkubila,
unowobaposela kutjena nge simba.
3Tjiala tje mazwikudzo tje zwilaladzi zwe Ifureimi
tjowokanyangiwa nge makumbo
4ne luba linotimbama le naka kukwe kunopenyelela,
liku misholo ye nkuku una mavu akakola
lowofanana ne phaya ya bidwa kutangila tjilimo.
Wayibona unoija tjinyolotjo koga edwa pa itjela.
5Mu zhuba ilelo Yahwe Masimbawose banowobe tjiala tje gudzo
ne ngala dze kunaka ku malimbelimbe e bathu babo.
6Banowobe meya ye kutambunuka
kuna unosumikilisa,
ne kube simba kuna unodziba ngwa pa nkoba.
Isaya ne balaladzi be balebesambeli be Juda
7Aba naibo banodzungugwa nge nkumbi we zhambi,
be tshatsharikisiwa nge nkumbi wakabila.
Bapirisiti ne balebesambeli banodzembeledziwa nge nkumbi wakabila,
bakahwumanyiwa nge nkumbi,
banotshatsharikisiwa nge nkumbi wakabila,
bebe beleyanya mu mbono,
bebe beleyanya mu kusumikilisa.
8Tafuli dzose dzizhele matho ne shambgwa,
akuna pabuyanana.
9Ndiani wabangadiya kabe ne zibo,
ndiani wabangatjenesela ndayidzo kene?
Ndiibabo baletjedzisiwa kuthwisiwa zhamu,
ibabo bathwisiwa zhamu?
10Ngoti ndayo inotobela ndayo, ndayo itobela ndayo,
tjilizanyo tjotobela tjilizanyo, tjilizanyo tjitobela tjilizanyo,
kutukununu pano, kutukununu apaje.
11 #
1 Bakorinta 14:21
Banowolebeleka nge milomo inokakang'wa nge lulimi gupoga.
Ndzimu unowolebeleka ne bathu ibaba,
12ibo wabakadwa ukati,
“Ogu ndigo bugalo gwe kunyaluluka,
nyalulusani bakanyala.”
Kunyaluluka ndiko ikoko,
ngono bakalamba kuteedza.
13Ndizo dama la Yahwe lowozha ku bali
nge ndayo itobela ndayo, ndayo itobela ndayo,
tjilizanyo tjitobela tjilizanyo,
kutukununu pano, kutukununu apaje,
kuti bayende ngono bawile shule bavunikane,
babhatshigwe babhakhwe.
Thiwa ye Ziyoni
14Ndizo wali, ihwani dama la Yahwe imwi badadi,
imwi munobusa bathu ibaba bamu Jerusalema.
15Ngoti imwi makati, “Iswi takathama tjidumano ne lufu
ne ikumbu, iswi timu tjidumano.
Kowoti shamu yakabangalala itipalama,
aitowoti kutha
ngoti takathama manyepkhwa dizhilo ledu,
takabgwata kusi kwe manyepkhwa.”
16 #
Njimbo 118:22, 23; Baroma 9:33; 10:11; 1 Pita 2:6 Ndizo wali She Yahwe bakati,
“Bonani, ndobiga bgwe le thiwa mu Ziyoni,
bgwe lakalikwa lakanaka,
thiwa ye malebeswa ku ndzibo,
‘Iye unogalabgwe unobigamoyo.’
17Thambunuko inowobe nsungo unotambunudza,
ndulamo ikabe nsungo unolizanyidza,
ngono tjivulamabgwe tjowokuba dizhilo le manyepkhwa,
ngono vula inowokulila mabgwatilo awo.”
18Tjidumano tjenyu ne lufu tjowotshumugwa
ne kudumana kwenyu ne ikumbu akungabhatilile,
shamu yakabangalala inowoti ipinda
inomuloba.
19Tjibaka tjayapinda koga inowomuloba,
inowopinda mangwanana ne mangwanana,
siku ne sikati.
Kuhwisisa ndayidzo iyeyi kowozhisa kutja.
20Ngoti bulawo gufutshwanisa nthu aangatandabale mu guli,
ngubo naiyo ithetjanisa nthu aangazwifukidze ndiyo.
21 #
2 Samuele 5:20; 1 Zwiyitikalo 14:11;
Joshuwa 10:10-12
Ngoti Yahwe banowomilika sekwa bakamilika pezhugwi kwe Dombo le Perazimu,
banogwadza moyo semu nkuku we Gibiyoni
kuthama nshingo wabo, nshingo wabo unotjenamisa,
banowothama kuti kushingikale n'ja wabo, n'ja wabo unotjenamisa.
22Ndizo ngwenu musidade,
misungo yenyu idwa isimisiwa,
ngoti ndahwa nge kwe kulobeswa kudwa kuna She Yahwe Masimbawose,
naiko kuli kulobeswa kwe shango yose.
23Teyani zebe muhwe hwi langu,
hwililani muhwe ndebeleko yangu.
24Apa nlimi unolima edzwala, unolima zhuba lose kene?
Apa unodwilila elima epkhwanya magwada kene?
25Apa ha alizalizanya paanolima
aatodzwala mbewu ye dili, ebe edzwala ye kumini kene?
Ebe edzwala koroni nge dzizilana
ebe edzwala bhali pakailingisana
ne riye pakailingisana kene?
26Wakadiyiwa zubuyanana,
Ndzimu uwe unon'diya.
27Dili ayitoshokogwa nge tjileyi tje kushokola,
kene gundzwana le koloyi alinga kunguludziwe pezhugwi kwe kumini,
koga dili inopugwa nge lukondzwana,
kumini iyo inopugwa nge lukombo.
28Mathunde e tjiwunga anogayiwa kuthama tjiwunga,
ndizo nthu aatoapulila tjose.
Nenguba epitsha makundzwana e koloyi iye pezhugwi kwayo,
mbizi dzidze adzitoakwiya.
29Ikoku naikobo kodwa muna Yahwe Masimbawose,
ibo banotjenamisa mu butjenjedu gwabo,
butjenjedu gwabo aguna tjilizanyo.
Kalanga Bible © Bible Society of Botswana, 2008, 2018.