Isaya 27
27
Kusunungugwa kwe Iziraela
1 #
Jobe 41:1; Njimbo 74:14; 104:26 Mu zhuba ilelo,
Yahwe nge thumo labo lakasima,
lakabangalala, gulu banowoloba
zhithu le gungwa linoyi Livatani nyoka inotizha ilibilidza,
Livatani nyoka inonyongoleka,
banowobulaya bhophona limu gungwa.
2Mu zhuba ilelo,
“Mumbile lumbo nnda we nzhambi unozipa.
3Imi Yahwe, ndimi ntjengeti wawo,
tjibaka tjimwe ne tjimwe ndowudilidzila.
Kuita kuti kusibe ne unowukubadza,
ndoulinda siku ne sikati.
4Andina kugwadzamoyo.
Mihwa ne zwishosho ha zwingabhayana nami mu ngwa,
ndabe ndinga zwipalama,
azwipisa zose.
5Kene ha kuli tjimwe ngabatizhile kundili,
ngababe ne mbakiso nami,
ee ngabathame mbakiso nami.”
6Mu mazhuba anozha ndzi wa Jakubo unowothinila,
Iziraela inowobe ne maluba,
ikazwala ikazhadza shango yose nge mitjelo.
7Apa Yahwe bakabaphobola
sekwa bakaphobola ibabo bakabaphobola kene?
Apa bakababulaya
nge zila yakabulawa ibabo babakabulaya kene?
8Kuyendidzana nge kukula kwayo,
monyanyayidzana nayo nge kuitatila kule,
mowoitata se tjampupudze mu nsi we phepo ye kubhezhuba itutudza.
9Ndizo wali, ndingekwa ikoko jinyo la Jakubo lowozwiibhatigwa,
ngono ikoku kowobe kuli mbuyilo nge buzhalo kudusiwa kwe tjibi tjitje,
paanowobe e thama mabgwe wose e zwibeso zwe zwibhayilo
zwikanga mabgwe e suko akatshiwa kapkhwanyiwa,
akuna bo Ashera kene zwibeso zwe motsha zwinowosala zwilimile.
10Nzi we matizhilo umile uliwoga,
magalo asiyiwa asina n'gali, asala enga tjilambanyika,
phulu dzowofula ikoko dzikalalako,
dzowokwaula thabi.
11Thabi dzowoti dzawoma, dzikavunika
bakadzi banowozha bakabesa moto ndidzo.
Ngoti ibaba bathu abana hwisiso,
ndizo Nthami wabo aana ngoni nabo,
Mbumbi wabo aatobalakidza lubu.
12Mu zhuba ilelo Yahwe banowoshokola mathunde kudwa pa Gwizi gwe Yufuratesi kunoti ku lukoba gwe Egipiti, namwibo Baiziraela Yahwe banowomukubunganya ng'ompela ne ng'ompela. 13Mu zhuba ilelo kowoshingikala kuti lunyanga lukulu gulidziwe, ngono bathu bangu babe bakalingisana nge kuloba mu Asiriya ne bakatizhila ku Egipiti babuye banamate Yahwe mu dombo lakayengemala mu Jerusalema.
Kalanga Bible © Bible Society of Botswana, 2008, 2018.