Isaya 25
25
Lumbo gunokudza
1Imwi Yahwe, imwi mu Ndzimu wangu,
Ndowomukudza, ndowolumbidza zina lenyu,
ngoti makathama zwithu zwinotjenamisa,
ndongoloso dzakathamiwa ntolo dzogalikabgwe, dzi malebeswa.
2Ngoti makathama nzi nkulu duluthulu,
nzi nkulu we matizhilo ukabe dongo,
ka nzinda mu bataya akutjina nzi nkulu,
awungatjamusiwe kakale.
3Ndizo wali bakasima banowomukudza,
mizi mikulu ye zwitjaba zwakabangalala inowomutja.
4Ngoti makabe dizhilo ku bashayi,
dizhilo le basheti mu buyendasi gwabo,
mukabe mbakililo mu matutu akasima ne ntutshi mu nsi we kupisa.
Ngoti kunginilila kwe bakabangalala kunga dutu lakasima liloba guma,
5kukanga kupisa mu magalo akawoma.
Imwi monyaladza zhoba ye bataya,
se kupisa kupedziwa nge ntutshi we makole,
ndizo lumbo gwe bakabangalala gwanyalala.
6Mu dombo ileli Yahwe Masimbawose banowothamila bathu bose
nzano we zojiwa zwakanaka, nzano we nkumbi unozipa,
we zwakakola zwina mongo, nkumbi unozipa.
7Mu dombo ileli Yahwe banowokolomodza
dandi lakatandila bathu bose,
tjisitilo tjakafukidziwa njudzi dzose.
8 #
1 Bakorinta 15:54;
Zumbunulo 7:17; 21:4 Banowolobesela lufu tjose,
She Yahwe banowobukusha mishodzi mu njiso dzose
bebe bedusa kulengudziwa kwe bathu babo mu shango yose.
Koleba Yahwe.
9Mu zhuba ilelo kowoyi,
“Bonani, Ndzimu wedu ihwoyu, takabe takaulindila, kuti utitjidze.
Ndi Yahwe ibaba, batakabe takalindila,
ngati shatheni tipululudze mu jidzo labo.”
Ndzimu banowoloba Moabu
10 #
Isaya 15:1—16:14; Jeremiya 48:1-47; Ezekiele 25:8-11; Amosi 2:1-3; Zefaniya 2:8-11 Ngoti luboko gwa Yahwe gowogala pezhugwi kwe dombo ileli,
koga Moabu inowotshambigwa pasi mu magalo ayo
se mashanga etshambiwa mu gomba le nthudze.
11Banowotambunudza maboko abo pakati kwawo
se mbhukutji etambunudza maboko awe kubhukutja,
koga Yahwe banowoyisa pasi kuzwida kwabo
ne bunyambi gwe maboko abo.
12Matizhilo abo akasima malefu
banowotshindika makuma awo bakaaligila
pasi mu hwuluba.
Kalanga Bible © Bible Society of Botswana, 2008, 2018.