Isaya 24
24
Yahwe banowosumikilisa shango
1Bonani Yahwe banowokolomodza shango bakaithukudza,
banowotjinya ndingiko yayo ngono bakapaladza bagali bayo.
2Tjinowoshingikalila bathu ne bapirisiti tjowobashingikalila,
tjinowoshingikalila nlandalume na tetshi uwe tjowonshingikalila,
tjinowoshingikalila nlandakadzi na tetshikadzi uwe tjowonshingikalila,
tjinowoshingikalila ntengi ne ntengesi tjowonshingikalila,
tjinowoshingikalila n'adzimiwa ne n'adzimi tjowoshingikalila,
tjinowoshingikalila nkoloti ne nkolotiwa tjowoshingikalila.
3Shango yose inowokolomodziwa nge buzhalo
ikasala ili dongo zwakwako.
Ngoti Yahwe ndibo baleba dama ileli.
4Shango inowomelela, inotimbama,
lubumbo gopela masimba, gofa,
lubumbo gopela masimba gofa,
banokudziwa banopela masimba.
5Shango yatemapadziwa ne bagali bayo,
ngoti bakatjuluka milayo,
bakaleyanya ndaulo,
bakatjinya tjidumano tjisingapele.
6Ndizo wali bhiso laja shango,
bagali bayo banodziyila ngekwe milandu yabo,
ndizo bagali be shango banotshwa bepela,
kwasala bathu bashomanana.
7Nkumbi we zhambi unopela, nzhambi iwo watimbama,
bose babe mimoyo yakashatha bobubula.
8Kulila kwe thamborini akutjahwika,
zhoba ye bakashatha yanyalala,
kulila kwe dende kwapela.
9Abatjang'wa nkumbi nge njimbo,
tjing'o tjakabila tjobabila ibo banotjing'wa.
10Nzi nkulu we phipiti wakwamukana ukawila pasi,
nkoba we ng'umba imwe ne imwe wazhaligwa kuti kushaye wangina.
11Kuna tjililo mu dzizila tjinoshaka nkumbi;
kushatha kose kwaswika mu bhelelo lako,
mipululu yose ye shango yapela.
12Kwasala kuthukudzika mu nzi nkulu,
mazhalilo awo akavunikana.
13Ngoti kowoshingikala saikoku mu shango
ne pakati kwe zwitjaba,
kowonga ntoba wapugwa,
kukanga manungidzila e zhambi asala mukutjegwa kwadzo.
14Banomilidza mahwi abo bemba nge kushatha,
bembila bukulu gwa Yahwe bedwa ku golombedzo.
15Ndizo wali ne ku bhezhuba kudzani Yahwe,
imwi bamu shango dzimu tjekelo dze gungwa,
kudzani zina la Yahwe Ndzimu we Iziraela.
16Kudwa mu phelelo dze shango tohwa njimbo
dze gudzo kunaiye Wakayengemala N'gompela.
Koga ati, “Ndanyala moyo! Ndanyala moyo!
Yee mme wee! Ndapalala!
Batjebeli banotjebela!
Batjebeli banotjebela.”
17Kutja ku namwi ne makomba ne matati,
imwi bagali be shango!
18Kowoti iye unotizha nsindo unotjisa
kawila mu gomba,
naiye unotatha ebhuda mu gomba
kabhakhwa nge dati.
Mikoba ye kudzimu yakazhuka,
thiwa dze shango dzotengenyeka.
19Shango yakathukudzika dumbu,
shango yakashakala,
shango yazunguzika kwazo.
20Shango inotshatsharika se nthu wakalaladza,
inodengadenga se thumba.
Matjinyo ayo anoilemela,
ngono inowa kwaisingawotjamuka.
21Mu zhuba ilelo Yahwe banowoloba mibunga ye kudzimu
ikweno pezhugwi,
bakaloba bomambo be shango mu shango.
22Banowokubunganyigwa pathu pang'ompela
se basungwa bekubunganyigwa mu gomba,
banowozhaliligwa mu ng'umba ye busungwa,
shule kwe mazhuba manjinji banowolobgwa.
23Mwedzi unowohwumana,
zhuba ilo likabhakhwa nge shoni,
ngoti Yahwe Masimbawose banowobusa
mu Dombo le Ziyoni ne mu Jerusalema
na mbeli kwe sholotjena banowobona gudzo la Yahwe.
Kalanga Bible © Bible Society of Botswana, 2008, 2018.