Isaya 20
20
Tjilakidzo tje nlebesambeli umbujo
1Mu gole lakati ntungamili we ngwa nkulu wakabe atumiwa ndi Mambo Sarigoni we Asiriya wakati kazha kabhayana ne Ashidodi ngono kaitapa. 2Nge tjibaka itjetjo Yahwe bakalebeleka beshingisa Isaya nkololo wa Amozi beti, “Yenda unosunungula jila le saka mu thunji dzidzo, ube uambula shangu dzidzo mu makumbo awo.” Ngono kathama eijalo, kabe eyenda akati piti kakale asakaambala shangu. 3Yahwe bakabe beti, “Nlanda wangu Isaya sekwa akayenda akati piti kakale asakaambala shangu mu makumbo makole matatu tjili tjilakidzo ne mashula ku Egipiti ne ku Itopiya, 4ndizo mambo we Asiriya unowotapa Baegipiti kathama kuti Baitopiya batizhe shango yabo, bose batjetjana ne bakwegula bakati piti basakaambala shangu mapato abo ali patjena kubhatisa Egipiti shoni. 5Ipapo banowonyala moyo bakahwumana ngekwe Itopiya yabanogalabgwe nenge kwe Egipiti yabanozwikudza ndiyo. 6Ndizo bagali be shango iyeyi imu tjekelo dze gungwa banowolebeleka beti, ‘Bonani ikoku ndiko kwakashingikalila ibabo batabe takagalabgwe batakatizhila ku bali kuti batibhatshe kuti tisunungugwe muna mambo we Asiriya! Ngono iswi kee, towosiya tjini?’ ”
Kalanga Bible © Bible Society of Botswana, 2008, 2018.