Isaya 19
19
Ndzimu banowoloba Egipiti
1 #
Jeremiya 46:2-26; Ezekiele 29:1—32:32 Dama ngekwe Egipiti.
Bonani, Yahwe bakatatha gole linolabuka kwazo
bezha ku Egipiti,
ngono midzimu ye zwifano ye Egipiti inowotetema pabali,
Ngono mimoyo ye Baegipiti inowotetema nge kulobgwa nge hana.
2Ngono ndowodzonga Baegipiti kuti bamukilane ne Baegipiti,
ngono banowogwa, mmwe ne mmwe egwa ne mwana wa tate babe,
ne mbakidzani egwa ne mbakidzani uwe,
nzi nkulu ugwa ne mmwe nzi nkulu, mbuso ugwa ne mmwe mbuso.
3Mazwihwo e Baegipiti anowosala kusina tjimuali,
ngono ndowoshangashanganya ndongoloso dzabo,
ndizo banowobhuzwa midzimu yabo ne ng'anga dzabo
ne banolebeleka ne badzimu ne be malipa.
4Ngono ndowolonga Baegipiti
mu maboko a tetshi nkukutu,
mambo unotjisa unowobalaula.
Koleba Yahwe Masimbawose.
5Vula inowopkhwa mu gungwa
ngono gwizi gowowomelela.
6Ngolo dze vula dzowonuhwa
ne hwobana dze Egipiti dzowopkhwa,
shanga dze gwizi ne masengezi kowobola.
7Tjekelo ne phili dze gwizi kowobe makwakwa,
mu phili dze Naili kowowoma
kose kwakadzwagwa mu phili dze Naili kowowoma
kukawuluka kukasala kusina tjimwe.
8Babhati be hwobe banowolila,
bose banoposela zwiweko zwe hwobe mu Naili,
bose banoposela njanga dzabo mu Naili
banowotemeka mafupa.
9Bashingi banothama matyila banowonyalamoyo,
banoluka nge thali banowopunamoyo.
10Ibabo bakabhata thiwa banowopelegwa
na bose banoshingila lipiwa banowobe mu buyendasi.
11Balauli be Zoani zwilengwe dumbu,
bakumbuludzi ba Faro banopa bukumbuludzi gwe bulengwe.
Ungadwa Faro uti, “Ndi nkololo we ntjenjedu,
nkololo wa bomambo bantolo”?
12Bangayi ngono balume benyu bakatjenjela?
Ngabamubudze bamuzibise
Yahwe Masimbawose tjabazwimisile kutjithama mu Egipiti.
13Balauli be Zoani babe zwilengwe,
ne balauli be Memifisi bakatjengedzeka,
ibabo banotogwa bali ibo bakabhata njudzi dzayo
batungamilila Egipiti ntome.
14Yahwe bazhisa meya
ye kuhwumana muili,
ngono bakathama Egipiti kuti idengadenge muna zose zwainoita
se nthu walaladza edengadenga mu matho awe.
15Akuna tjimwe Egipiti tjaingathama,
mbeli na shule, lutabi gwe nlala kene lushanga, akuna tjingaidwila.
16Mu zhuba ilelo Baegipiti banowonga bakadzi, banowotetema nge lutjo mbeli kwe luboko gwa Yahwe Masimbawose gwabanomilidza kubaloba. 17Ngono shango ye Juda inowotjisa ku Baegipiti, mmwe ne mmwe unowohwa ngekwe Juda unowotja ngekwe tjakazwimisigwa kuthamiwa ndi Yahwe ku bali.
18Mu zhuba ilelo kowobe kuna mizi mikulu mishanu mu Egipiti inoleba lulimi gwe Kanana ibe ituna kuzwibhatshanya na Yahwe Masimbawose. Mmwe wayo unowodang'wa Nzi nkulu we Zhuba.
19Mu zhuba ilelo kowobe ne tjibeso tjinopisigwa zwibhayilo tjathamigwa Yahwe pakati kwe shango ye Egipiti, ne bgwe labigigwa Yahwe ku n'gathu wayo. 20Kowobe tjilakidzo ne butendeki kuna Yahwe Masimbawose mu shango ye Egipiti, pabanowolilila kuna Yahwe ngekwe batshambilidzi babo, ngono banowobatumila ntjidzi unowobabakilila kabasunungula. 21Ngono Yahwe banowozwizibisa Baegipiti, Baegipiti banowoziba Yahwe mu zhuba ilelo bakabanamata nge zwibhayilo nenge zwipo ngono banowogadzabgwe Yahwe bakabuya bakathama zwababagadzabgwe mu zwili. 22Yahwe banowoloba Egipiti, beloba bebuya bepodza, ngono banowobgwilila kuna Yahwe, Yahwe banowohwa mitembezelo yabo bakabapodza.
23Mu zhuba ilelo kowobe ne zila phabi kudwa mu Egipiti kuyenda ku Asiriya, ngono Baasiriya banowozha mu Egipiti, N'egipiti kazha mu Asiriya, ngono Baegipiti banowonamata ne Baasiriya.
24Mu zhuba ilelo Iziraela inowobe ye butatu ina Egipiti ne Asiriya kube nsenya we makombolelo mu shango. 25Yahwe Masimbawose banowobakombolela beti, “Kwakakombolegwa Baegipiti bathu bangu ne Baasiriya nshingo we maboko angu ne Baiziraela thaka yangu.”
Kalanga Bible © Bible Society of Botswana, 2008, 2018.