Hoseya 5
5
1Ihwani woku imwi bapirisiti!
Bhulutanani imwi Baiziraela!
Teedzani imwi be ng'umba ye bumambo!
Ngoti kusumikilisiwa kwakalingisana namwi,
ngoti makabe muli bhuzhu ku Mizipha,
muli gwanga gwakawagwa pezhugwi kwe Tabori.
2Bapanduki bakangina bakapelela mu kubulaya,
koga ndowobaloba shamu bose.
3Imi ndoziba kose nge kwa Ifureimi,
Iziraela naiye aazosumbikika.
Ngoti iwe Ifureimi iwe wanginikana nge bufukula,
Iziraela yatemapala.
Hoseya unotjemela ngekwe kunamata midzimu
4Mishingo yabo ayitobadumila
kubgwilila ku Ndzimu wabo.
Ngoti meya ye bufukula imukati kwabo,
abatoziba Yahwe.
5Kuzwida kwa Iziraela kotendeka nge kwabo,
Ifureimi naiye unoligwa nge tjibi tjitje
Juda naiye unowa nabo.
6Banowoyenda ne ngubi dzabo ne matanga e ng'ombe
kunoshaka Yahwe,
koga abatowobabona
ngoti bakazwidusa mubali.
7Abatogalikabgwe kuna Yahwe,
ngoti bakazwala bana be zwamba.
Ndizo wali Nzano wabo we Mwedzi ugala
unowobaja kose ne minda yabo.
8Lidza lunyanga mu Gibiya,
lunyanga ngagulile mu Rama.
Mima ye ngwa ngayihwike mu Bhetiaveni!
Bashule kuko iwe Bhenjamini!
9Ifureimi inowothukudziwa
mu nsi we kusumikilisiwa.
Tjandinoleba mu njudzi dze Baiziraela,
ndoleba tjili malebeswa.
10Batungamili be Juda banofanana
ne bathu banodusa tjilakidzo tje n'gathu.
Ndowobanginilila nge bushongola gwangu
se gubakube le vula.
11Ifureimi wakatshambilidzwa,
wakatshambigwa pasi mu kusumikilisiwa,
ngoti wakazwimisila kutobela midzimu.
12Ndonga sole kuna Ifureimi,
ndonga ndakabola ku bathu be Juda.
13Ifureimi wakati ebona bugwele gugwe,
Juda iye ebona mabanga awe,
ipapo Ifureimi kayenda ku Asiriya
kushaka bhatsho muna mambo.
Koga aatotubula kukulapa
kene kupodza mabanga awo.
14Ngoti ndowonga shumba kuna Ifureimi,
anga shumbana ku bathu be Juda.
Imi, ndowobamwawulanya abe ndiyenda zwangu,
ndowobasenga ngono akuna ungabagwila.
15Kudwapo ndowobgwilila ku magalo angu
kuswikila beduma nlandu wabo.
Ngono banowondishaka
banowondishaka kwazo bali mu kudziyila kwabo.
Kalanga Bible © Bible Society of Botswana, 2008, 2018.