Hoseya 4
4
Yahwe banopa Iziraela nlandu
1Ihwani dama la Yahwe imwi bathu be Iziraela,
ngoti Yahwe bana ndebo ne bagali be shango.
Akuna kugalamoyo kene ludo,
akuna kuziba Ndzimu mu shango.
2Kuna kutuna kulonga bhiso ne kunyepa ne kubulaya,
kukwiba ne bupombgwe
banobhuda mu ndawulo,
betebula malopa betebedzanya.
3Ngekwa ikoku shango inolila,
ngono bose banogala muili bapela masimba.
Phuka dze shango ne nyuni dzinowuluka
ne hwobe dze gungwa dzofa.
4Koga ngakusibe ne unonyanyayidza,
kusibe ne unotendeka mmwe nge tjinyala,
ngoti iwe mpirisiti, ndebo yangu yakalingisana nawe.
5Unowokuthiwa masikati,
kakale nlebesambeli unowokuthiwa nawe busiku,
ngono ndowokolomodza mme yabo.
6Bathu bangu banolobesiwa
ngoti banosheta luzibo.
Se makalamba luzibo,
namibo ndomulamba se bapirisiti bangu.
Kakale se makazwikangang'wisa nlayo we Ndzimu wenyu,
namibo ndowokangang'wa bana benyu.
7Bapirisiti bakati bepaphidzika
bakanditjinyila kunyanyisa,
bakatenganya gudzo labo nge tjinobhatisa shoni.
8Banozwitjidza nge tjibi tje bathu bangu,
bebe magovu nge matjinyo abo.
9Ngono kowofanana bathu ne bapirisiti,
bose ndowobalobela mipanga yabo,
ndowobabuzila mbhayilo we mija yabo.
10Banowoja koga bakasigute,
banowonginikana ne bufukula koga abatowowanda.
Bakafupatila Yahwe
kuzwipa nge buzhalo mu bufukula.
Yahwe banolambana ne midzimu
11Nkumbi we zhambi nkulukugwi ne nkumbi we zhambi ntshwa
unothama kuti bathu bangu bakong'we kuhwisisa.
12Bathu bangu banoshaka bhatsho mu midzimu yakabezhiwa
bebe bedabigwa nge lukuni.
Ngoti meya ye bufukula yakabalasha
abatjagalikabgwe ku Ndzimu wabo.
13Banobhayila zwibhayilo pezhugwi kwe matombo,
bebe bepisila zwibhayilo pezhugwi kwe matuthu,
bepisila na kusi kwe miti ye mioko ne mipopula ne mikosho
ngoti ina mitutshi yakanaka.
Ndizo bakololokadzi benyu banofukula,
balongo benyu banothama bupombgwe.
14Anditowoloba bakololokadzi benyu abe thama bufukula,
kene balongo benyu abe thama bupombgwe
nge kuti balume ngekwabo banotizha nge fukula
be pisa zwibhayilo bana fukula.
Ndizo bathu basina wisiso banolobesiwa.
15Nenguba uthamazo bupombgwe iwe Iziraela,
usitongo thama Juda ikabe nlandu.
Usitongo ngina mu Giligala,
kene ukayenda ku Bhetiaveni,
kakale usitongotuna uti, “Ha Yahwe batjatjila.”
16Ngoti Baiziraela abatohwa,
banonga pholombe isingatebame.
Apa Yahwe bangabatjengeta kene
se pkhwizana dzimu mafulo akazhuka?
17Ifureimi unonamata midzimu ye zwifano
unsiye akajalo.
18Koti zwing'o zwabo zwapela
bakazwinginikanya ne bufukula.
Babusi babo banoda mabhatisa shoni
kupinda gudzo labo.
19Tjampupudze tjowobasengela kutjena
ngono zwibhayilo zwabo zowobabhatisa shoni.
Kalanga Bible © Bible Society of Botswana, 2008, 2018.