Hoseya 2
2
1“Bakulu babo be tjilume uti ku bali, ‘Bathu bangu’ ku hazwadzi dzidzo uti, ‘Bahwigwazogwadza.’ ”
Iziraela ayitogalikabgwe
2“Tjemelani mme benyu, mubatjemele,
ngoti ate bali nkadzi wangu
nami atendili nlume wabo.
Ngabaduse ndingo ye bufukula mu tjiso tjabo,
ne bupombgwe baguduse pakati kwe mazhamu abo.
3Kusajalo ndowobaambula bakasala basakambala
ndibathama mbujo kufanana ne zhuba labakazwagwa,
ndowobathama bakanga tjilambanyika,
ndibashandula bebe shango yakatshwa nge zhuba,
ndibe ndibabulaya nge nyota.
4Anditowohwila zogwadza bana babe,
ngoti bana be bupombgwe.
5Ngobe mme babo abazotongogalikabgwe
babakazwisenga nge mabhatisa shoni.
Ngobe bakazwidwa bakati, ‘Ndowotobela badiwa bangu,
ibo banondipa zojiwa zwangu ne vula yangu,
banondipa wulu yangu ne jila langu ne mafuta angu ne tjing'o tjangu.’
6Ndizo ikweno ndowozwina zila yabo nge mihwa,
ngono ndowobaka guma linobadzibila,
kuyita kuti basitongo bona zila dzabo.
7Banowolonda badi babo koga bakasitongobabhata,
banowobashaka koga bakasibabone.
Ipapo banowoti,
‘Ndobgwilila ku nlume wangu we kutanga,
ngoti ndakabe ndiyita kupinda ngwenu.’
8Abatoziba kuti ndimi ndakabapa
mathunde ne nkumbi we zhambi ne mafuta,
kuti ndimi ndakabe ndimbutitikila siliva ne golide
zwabakashingisa muna Bhaale.”
9Ndizo wali ndowotola
mathunde angu pa kuvung'wa,
ne nkumbi we zhambi mu tjibaka tjawo.
Ndowotola wulu yangu ne jila langu,
zwababe bakafanila kusungila.
10Ndowobambula mbeli kwe badi babo
bakasala bali mbujo mu mesho abo,
akuna ungabagwila mu maboko angu.
11Ndowomisa kushatha kwabo kose,
mizano yabo ye gole ne gole neye Mwedzi ugala,
na bo Sabata babo, mizano yose yakabigwa.
12“Ndowothukudza mizhambi yabo ne mipaya yabo
yabakati ngekwayo
‘Ikoku i ndipo yangu
yandakapiwa ne badi bangu.’
Ndoyithama ishakana,
ngono phuka dze shango dzowoyija.”
13Ndowobalobela mazhuba e mizano yaakathamila bo Bhaale
be bapisila motsha,
bezwinakisa nge mang'ina ne ndalama,
besalana shule ne badi babo
imi bendikangang'wa, koleba Yahwe.
14“Ndizo wali bonani ndowobawonga
abayisa ku tjilambanyika,
abe ndilebeleka nabo nge ludo.
15 #
Joshuwa 7:24-26
Kudwa ikoko ndowobagwilizila minda yabo ye mizhambi,
ngono ndowothama Nkuku wa Akhori nkoba we kugalabgwe.
Ikoko banowondiamutjila sekwa bakathama mu mazhuba e butjetjana gwabo,
se mu mazhuba abakabhuda mu shango ye Egipiti.
16“Mu zhuba ilelo, koleba Yahwe,
unowondidana uti, ‘Nlume wangu,’
autowobe utjati, ‘Bhaale wangu.’
17Ndowodusa mazina abo Bhaale mu nlomo wabo,
mazina abo aatjowofa adang'wa kakale.
18Mu zhuba ilelo ndowobathamila tjidumano
ibo ne phuka dze shango ne nyuni dzinowuluka
ne zwibumbiwa zwinokambayila pasi.
Dati ne thumo ne ngwa
ndowozwipedza mu shango,
ndizo kuti mose mowogala nge kusununguka.
19Ndowokubigilidza nge kusingapele,
ndowokubigilidza nge ndulamo nenge kutambunuka
mu ludo gusingazunguzike nenge mahwilongoni.
20Ndowokubigilidza nge kugalikabgwe,
ngono unowoziba Yahwe.
21“Mu zhuba ilelo ndowodabila koleba Yahwe,
ndowodabila kudzimu,
kudzimu kowodabila shango,
22ngono shango inowodabila mathunde, nkumbi ne mafuta,
izwezwi zowodabila Jezirele.
23 #
Baroma 9:25; 1 Pita 2:10 Ndowobazwidzikilila mu shango,
ndowohwila ngoni bandakadana nditi,
‘Handitjowohwila ngoni.’
Ngono ndowodwa bandakadana nditi,
‘Amute muli bathu bangu,’ nditi ‘Mu bathu bangu,’
ngono ibo banowoti, ‘Imwi mu Ndzimu wangu.’ ”
Kalanga Bible © Bible Society of Botswana, 2008, 2018.