Hoseya 10
10
1Iziraela wakabe enga nzhambi wakapasula,
unozwala zhambi dzawo.
Mitjelo iye yakati iwanda
kawatsha zwibeso zwizwe zwe zwibhayilo
se shango iye yakabe ibhudilila
kanakisa zwifano zwizwe zwe mabgwe.
2Moyo wabo uzhele kutjebela,
ndizo wali bakafanila kusengana ne nlandu wabo.
Yahwe banowokolomodza zwibeso zwabo
bakabuya bakakolomodza zwifano zwabo.
3Ipapo banowoti, “Atina mambo
ngoti takalengudza Yahwe.
Koga ne tabe tina mambo
wabe wootishingilani?”
4Banoleba matama asina nshingo,
bebe betuna manyepkhwa
bethama zwidumano,
ikoku kube kudana kusumikilisana kunozha
se madishwa mabiibi mu ngolo dze nnda.
5Bagali be nzi we Samariya banotja,
betjila pholombe ye Bheti Aveni.
Bathu bawo banowoyililila
ne bapirisiti bawo banonamata zwifano banowolilila
gudzo layo labasiya.
6Ifano nge kwatjo tjowosengegwa ku Asiriya,
tjili tjipo kuna mambo nkulu.
Ifureimi unowobhakhwa nge shoni,
Iziraela unowobhatigwa nge shoni zwifano zwakabezhiwa.
7Mambo we Samariya inowokolomodziwa,
unowonga gwati lakaangama mu vula.
8 #
Luke 23:30; Zumbunulo 6:16 Manamatilo a pezhugwi e Aveni, tjibi tje Iziraela
tjowokolomogwa.
Mihwa ne zwikungubo zowomela
pezhugwi kwe zwibeso zwabo zwe zwibhayilo.
Ipapo banowodwa matombo bakati, “Mutizwimbe!”
Bebe bedwa matuthu beti, “Mutiwile!”
9 #
Basumikilisi 19:1-30
Kwetjinga kwe mazhuba e Gibiya wakatjinya iwe Iziraela,
makalambilako.
Apa ngwa ayitowo mukulila mu Gibiya?
10Pandingada ndowobaloba,
njudzi dzowobakubunganila kugwa nabo
kubasungila zwibi zwabo zwapaphidzika kabili.
11Ifureimi wakabe ali pholombe yakatebamiswa
yakabe ida kushokola,
ndakatjengeta ntshibha uwe wakanaka
koga ndowothama kuti Ifureimi atshindunule pasi,
Juda wakafanila lima,
Jakubo wakafanila kulima.
12 #
Jeremiya 4:3
Muzwidzwaligwe ndulamo,
muvune ludo gusingapele,
tshindunulani pasi pasathu pakaling'wa
ngoti tjibaka tje kushaka Yahwe
kuti bazhe banise ndulamo pezhugwi kwenyu.
13Makalima mukadzwala mbipo,
mukaivuna mbipo,
muja ntjelo we kutjebela.
Se makabiga mu masimba enyu
ne mu bunji gwe babhayani benyu.
14Ndizo phipiti ye ngwa inowonginilila bathu benyu,
kunowothama kuti matizhilo enyu wose akolomogwe
Shalimani sekwa akathukudza Bhetiarubhele mu zhuba le ngwa
bomme pabakapkhwanyigwa pasi ne bana babo.
15Ndiko sekwa kunowokushingikalila iwe Bhetele,
kuyikhwa nge bubi gugo.
Zhuba ilelo lowoti linoshwa
mambo we Iziraela unowobe abulawa.
Kalanga Bible © Bible Society of Botswana, 2008, 2018.