Habakuku 3
3
1Ntembezelo we Nlebesambeli Habakuku kuyendidzana ne Shigionoti.#3:1 Shigionoti: Dama ileli alitozibika zubuyanana, koga kuyendidzana ne mamwe matama lingabe lidwa tjililo kuliligwa wafa kene wawigwa nge zwinogwadza.
Ntembezelo wa Habakuku
2Imwi Yahwe, ndakahwa ngekwe tjilumbi tjenyu,
ngono ndimile ndakakaabala ngekwe nshingo wenyu imwi Yahwe,
muumusidzile mu misi yedu,
mu misi ino yedu thamani kuti uzibike,
mu bushongola gwenyu kumbulani ngoni.
3Ndzimu wakadwa ku Temani,
Nyengemali edwa ku Dombo le Parani.
Tjedza tjawo tjakadzinga kudzimu,
shango yakazhala kulumbidziwa kwawo.
4Kunaka kwawo konga kubhuda kwe zhuba,
mazazi awo anopenya kudwa mu tjiazha tjawo
ipo pakasumbikwa simba lawo.
5Mbeli kwawo koyenda bugwele
ngono tjifo tjakasala shule thambo dzawo.
6Mamilika mukazunguza shango,
molinga mukathama zwitjaba zwikatetema.
Matombo asingapele anophatukana,
matuthu etjinga anowila,
zila dzawo ngedza ntolo.
7Ndobona mishasha ye Bakhushani ili mu kudziyidzika,
magalo e Midiyani anotetema.
8Apa makagwadzila moyo njizi kene imwi Yahwe?
Bushongola gwenyu gobhayana ne njizi kene?
Mamukila gungwa nge bushongola kene?
Makatatha mbizi dzenyu
ne koloyi dzenyu dze ngwa dzinokunda.
9Makalulwamisila kushingisa dati lenyu,
makazhisigwa misebe minjinji.
Mopalulanya shango nge njizi.
10Matombo anomubona ngono anotetema,
vula dzinowunga nge masimba dzopinda dzikukula.
Madziba akangina anobomba
anomilidzila maboko awo zhuzhugwi.
11Zhuba ne mwedzi zoma zhuzhugwi zwisingazunguzike
ngekwe kupenya kwe misebe yenyu iwuluka,
nenge kupenya kwe thumo lenyu.
12Mapalama shango makagwadzamoyo,
motshambatshamba shango nge bushongola.
13Mozha kuwotjidza bathu benyu
kutjidza wenyu wakazhodziwa.
Molobesa ntungamili we shango ye mbipo,
mon'ambula kudwa ku nsholo kunoti ku matshambo.
14Mobhaya ntungamili we babhayani babe nge mathumo awe,
babhayani babe banotinginilila kutipaladza,
banozwikudza sebabe pejo nge kulobesa,
sebamanikidza bakabgwata.
15Motshambatshamba gungwa nge mbizi dzenyu,
mupukusha vula nji.
16Ndahwa ngono alobgwa nge hana,
ndotetemesiwa nge nsindo,
mafupa angu kanga anobola,
makumbo anotetema.
Kene kwakajalo ndowolindila nge moyo nlefu
kubona zhuba le guma liswikila bathu banotinginilila.
17Nenguba mpaya usingathinile,
ne mitjelo isipo mu nzhambi,
nenguba mitoba isina tjayinatjo,
minda naiyo isingaduse zojiwa,
nenguba kusina pkhwizi ne mbudzi mu danga
ne ng'ombe kusina mu matanga,
18kene kwakajalo zwako ndowoshatha muna Yahwe,
ndowokulukupkhwa mu Ndzimu Ntjidzi wangu.
19 #
2 Samuele 22:34; Njimbo 18:33 Yahwe Ndzimu nsimisi wangu,
banothama makumbo angu kanga e phala hadzi,
banothama kuti nditathile pezhugwizhugwi.
Ku ntungamili nge zwilidzo zwe mitjili.
Kalanga Bible © Bible Society of Botswana, 2008, 2018.