Habakuku 2
2
1Ndowotatha ngadzi yangu,
ama pezhugwi kwayo,
ndowolindila kubona tjabanowondidwa
ne dabilo yandinowopa nge kung'ong'ola kwangu.
Dabilo ya Yahwe
2Yahwe bakandidabila beti,
“Kwala mbono
itjeneseke mu zwileiti
ndizo abale akalabuka.
3 #
Bahebheru 10:37
Ngoti mbono imilile tjibaka tjakabigwa,
inoleba ngekwe bhelelo
aingabe manyepkhwa.
Kene inonoka uimilile,
nge malebeswa inowozha aitowononoka.
4 #
Baroma 1:17; Bagalatiya 3:11; Bahebheru 10:38 “Bona, iye unozwikudza,
njemulo dzidze adzizolulwama,
koga nlulwami unowotjila nge kugalamoyo kukwe.
5Nge malebeswa nkumbi we zhambi unonlasha,
unozwikudza aatodzikama.
Hwulo dzidze dzakaashama se ikumbu,
unonga lufu aatotongo guta.
Unokubunganyila zwitjaba zose kunli
ebe etapa bathu bose.
6“Apa bose ibaba bathu abatowonkuwelela bendadila benlengudza beti,
‘Yee mme wee ku kuli iwe unozwikubunganyila thundu yakwibiwa
uzwithama nfumi nge kutjebela!
Kowotola tjibaka tjingapani ikoku kushingikala?’
7Apa baunokolota abatomilika tjinyolotjo kene?
Apa abatowomilika bakathama kuti uteteme kene?
Ipapo unowobe wabe tjabhakhwa ndibo.
8Ngoti iwe wakatapila zwitjaba zwinjinji,
bathu bose bakasala banowokutapila.
Kana wakatebula malopa,
wakakolomodza shango ne mizi
ne mmwe ne mmwe muili.
9“Yee mme wee ku kuli iwe unobaka bushe gugo nge zwe butjebeli
ubaka magalo awo se shaka pezhugwizhugwi
kutizha mbatsha dzingakuwila.
10Wakalukila gwanga kulobesa bathu banjinji,
ubhatisa shoni ng'umba iyo uzwitenganyila tjibuya nge tjibiibi.
11Mabgwe akabaka guma anowomimila,
ngono mbalilo dzowodabila.
12“Yee mme wee, kuna unobaka nzi nkulu ngotebula malopa,
ebe ebumba nzi nge jinyo.
13Apa akutodwa muna Yahwe Masimbawose
kuti nshingo we maboko e bathu ube tjinothutidza moto kene?
Kuti zwitjaba zozwinyadzila suli kene?
14 #
Isaya 11:9
Koga shango inowozhala zibo ye gudzo la Yahwe
se vula yakadzinga gungwa.
15“Yee mme wee, iwe unopa babakidzani babo tjing'o,
ubadilila kuswikila belaladza
kuti ndizo ulinge mbujo dzabo.
16Unowobe ne shoni dze kulingigwa pasi pana kuti ukudziwe.
Tjing'wa iwe ulaladze utshatsharike.
Bhepe limu luboko gwe luji gwa Yahwe
laswika ku kuli ngono shoni dzowombadza gudzo lilo.
17Ngoti thapatapa yawakathamila Lebanoni inowokukulila
ne kubulaya phuka kwawakathama kowozhisa kutja mukuli.
Ngoti wakatebula malopa e bathu,
wakakolomodza shango ne mizi mikulu ukabulaya mmwe ne mmwe muili.
18Apa ifano tjina nshingo weni se kuli kuthu kwakathamiwa nge nthu?
Kene ifano tjinodiya manyepkhwa tjobhatsha ngeni kene?
Kana watjithama unogalabgwe muna tjaathama iye,
nenguba tjaathama tjili ifano koga tjisingake tjikalebeleka.
19“Yee mme wee, kuna unodwa lukuni eti, ‘Muka!’
Kene edwa bgwe lisingatjile eti, ‘Milika!’
Apa tjingalaya kene?
Tjakadzulugwa nge golide ne siliva,
akuna meya ye kufema mutjili.
20Koga Yahwe bamu Ng'umba yabo yakayengemala,
shango yose ngainyalale mbeli kwabo.”
Kalanga Bible © Bible Society of Botswana, 2008, 2018.