Bagalatiya 6
6
Thamilani bose bubuya
1Zwikamu, ha mmwe wenyu athama tjakabipa, imwi be tjimeya mu mbuze mu zila nge bunyolo. Koga uzwilise kuti usitjengelekebo. 2Amulanani mitolo, nge zila yakajalo mowobe mulondolodza nlayo wa Kirisiti. 3Ha mmwe ekumbula kuti iye u tjimwe, koga asi tjimwe, unozwitjengedza. 4Mmwe ne mmwe ngalingisise mishingo iye, ngono ndizo kudwapo ungazwikudza, asingazwifananye ne mmwe, 5ngobe mmwe ne mmwe wakafanila senga mitolo iye.
6Mmwe ne mmwe unodiyiwa dama wakafanila kobana tjimwe ne tjimwe tjibuya tjaanatjo ne n'diyi uwe.
7Musitjengedzeke, Ndzimu ha ungathamwe tjilengwe. Nthu unovuna tjaadzwala. 8Iye unodzwala mu nnda uwe we tjinyama, unowovuna golomodzo mu tjinyama, koga iye unodzwala mu nnda we Meya, unowovuna butjilo gusingapele mu Meya. 9Ngatisinyadziweni nge kushinga bubuya, ngobe nge tjibaka tjakalingisana towovuna kwakafanila, ha tisanyalamoyo. 10Ndizoke, ha titjina tjibaka, ngatithamileni bathu bose bubuya, kwazo kwazo ibabo be nsha we bagalimoyo.
Matama e bupelo
11Bonani kuti ndomukwalila nge shanga hwulu kungapani, ndikwala nge gwangu luboko! 12Ibabo banogwisa kumukombeledza kuthumbigwa, ndibo banoshaka kuyita mashungwandibong'we bezwikudza nge zwithu zwe tjinyama. Banoyita ikoku ngobe betja kudziyidzigwa tjileyanyo tja Kirisiti. 13Ate ili kuti kene ibabo bakathumbigwa banolondolodza nlayo, koga banoshaka kuti muthumbigwe, kuti ndizo bazwikudze nge kuthumbigwa kwenyu. 14Imi kuti ndizwikudze, ndowozwikudza koga ngekwe tjileyanyo tja She wedu Jesu Kirisiti, ngobe nge tjileyanyo tjitje, ha nditjatjila sekuno tjila bathu be shango, koga habatohwisisa kuti ini nditjila saikoku. 15Kuthumbigwa kene kusathumbigwa akutodwa tjimwe, koga tjithu tjikulu i mbumbiko tshwa. 16Kunyalala ne mahwilongoni ngazwibe muna ibabo banotobela matama iyawa, ne mu Baiziraela bose be Ndzimu.
17Ndopeleledza nditi, ngakushete unondidziyidza, ngobe mu mbili wangu ndina mabanga ngekwa Jesu.
18Ngoni dza She wedu Jesu Kirisiti ngadzibe namwi zwikamu. Ngakujalo.
Kalanga Bible © Bible Society of Botswana, 2008, 2018.