Bagalatiya 5
5
Sununguko muna Kirisiti
1Kirisiti wakatisunungula kuti tibe ne sununguko. Ndizo simisilani, musitjabgwilile mu jokwi le bulanda kakale.
2Hwililani! Imi, Paulo, ndomudwa nditi ha muthumbigwa, kodwa kuti Kirisiti aatowobe ana nshingo mu muli. 3Kakale ndoti ku mmwe ne mmwe unothumbigwa, koshakika kuti mulondolodze nlayo wose. 4Imwi banoshaka kululwamisiwa nge kulondolodza nlayo, makazwithubukanya na Kirisiti. Mukuzhe kwe ngoni dze Ndzimu. 5Ngoti iswi nge kugalamoyo takalindila nge Meya kululwamisiwa kwatakagadziwabgwe. 6Ha tili muna Kirisiti Jesu, kuthumbigwa kene kusathumbigwa akutodwa tjimwe, tjinoshakika hwugalamoyo kunozwilakidza nge mishingo ye ludo.
7Makabe makadwilila zubuyanana! Ndiani wakamudzinganyidza, kuti musihwe malebeswa? 8Kukulumbidza ikoku akutodwa ku Ndzimu, iwo unomudana. 9#1 Bakorinta 5:6Mbidzo shomanana inobidza bgwisa gose gwe tjiwunga gwavangwa. 10Ndogalabgwe muna She kuti amutowoamutjila mmwe nkumbulo upoga, kuzhe kwe wangu, koga iwoyo unomudiyila ntome, kene ali ani, unowolobgwa nge Ndzimu.
11Zwikamu, ha ndabe nditjasumikila kuthumbigwa, ini nditjadziyidziwa? Ha kwakajalo, ipapo tjileyanyo tja Kirisiti aatjina nlandu. 12Ndoyemula kuti bathu ibabo banomudzonga mazwiwo, bazwikatshile.
13Imwi zwikamu zwangu, makadanigwa sununguko. Ngono musishingise sununguko yenyu kuthama zwe tjinyama. Koga shingilanani nge ludo. 14#Zwipo 19:18Ngobe nlayo wose wakashingikadziwa mu dama ling'ompela linoti, “Ida mmwe nthu sekwa unozwida.” 15Koga ha mulumana, mujana nge meno, ibeni nge njele kuti musilobesane.
Butjilo gwe tjimeya
16Koga tjandinoleba ndi etji, tungamigwani nge Meya, kuti ndizo musishathise njemulo dze tjinyama. 17#Baroma 7:15-23Ngobe njemulo dze tjinyama dzothama tjinonyanyayidzana ne Meya ne njemulo dze Meya, dzonyanyayidzana ne njemulo dze tjinyama. Zwithu izwezwi, zonyanyayidzana, kuti musithame tjamunoshaka thama. 18Koga ha makatungamigwa nge Meya, amute muli pasi kwe nlayo.
19Zwinoshingwa nge mbumbiko ye tjinyama zwipatjena: Kuwalilana thobo kusakalingisana, kuwalilana thobo kunobhatisa shoni ne njemulo dzisakanaka dzekuwalilana thobo, 20ne thigamila midzimu yakabezhiwa ne buloyi ne lubengo ne fupa ne gwadzamoyo ne yemula kuna ndandala. Banothubukana nge mibungana, bethama zwikowa zwinonyanyayidzana, 21banotjiba, banon'gwa, bana kusazwidziba ne kushinga zwimwe zwakabipa. Ndomutjenjedza sekwa ndakamutjenjedza kutanga, ibabo banothama zwithu izwezwi, kuti abatowowana gobe mu Bushe gwe Ndzimu.
22Koga zwizwalo zwe Meya ludo ne shatho ne mbakiso ne moyonlefu ne butho ne kululwama ne kugagwabgwe 23ne bunyolo ne kuzwiibhata. Akuna nlayo unonyanyayidzana ne zwithu izwezwi. 24Kakale ibabo ba Kirisiti Jesu, bakasiya mbumbiko yabo ye tjinyama, ne nyota mbi ne njemulo dzayo mbi. 25Ha titjila nge Meya ngatitungamigweni nge Meya. 26Ngatisizwikudzeni kene kuli kutangana, kene kube ne fupa mu bamwe.
Kalanga Bible © Bible Society of Botswana, 2008, 2018.