Kufuluka 6
6
1Koga Yahwe bakadwa Mushe bakati, “Ngwenu utjawobona tjandinowoshinga Faro, nge simba langu ndowokombeledza Faro kuti aduse bathu bangu mu shango iye.”
2 #
Kutangisa 17:1; 28:3; 35:11; Kufuluka 3:13-15 Ndzimu ukadwa Mushe ukati, “Ndimi Yahwe. 3Ndakazwilakidza kuna Abhurahama ne kuna Isaki ne kuna Jakubo nditi ndimi Ndzimu Masimbawose, koga andizothama kuti bandizibe nge zina langu Yahwe. 4Ndakati athama tjidumano tjangu nabo, kubapa shango ye Kanana, shango yabakagala bali bataya. 5Pezhugwi kwa ikoku, ndakahwa kutshinda kwe Baiziraela bakathamwa balanda nge Baegipiti, ndizo wali ndakumbula tjidumano tjangu. 6Ndizo wali budza Baiziraela uti, ‘Ndimi Yahwe ngono ndowomutula mitolo yamakasengeswa nge Baegipiti abuya amudusa mu bulanda gwabakamulonga muguli. Ndowomudzutunula nge masimba nenge shamu dzinogwadza. 7Ndowomutola mukabe bathu bangu, imi ndowobe Ndzimu wenyu, ngono mowoziba kuti ndimi Yahwe Ndzimu wenyu iwo wakamutula mitolo yamakasengeswa nge Baegipiti. 8Ndowomuyisa ku shango yandakatuna kuipa Abhurahama na Isaki na Jakubo. Ndowomupa iyo kube yenyu. Ndimi Yahwe.’ ” 9Mushe kabudza Baiziraela ikoku ngono bakasiteedze Mushe beikhwa nge kunyala moyo nenge bulanda gwabo gunogwadza.
10Yahwe bakadwa Mushe bakati, 11“Yenda kuna Faro Mambo we Egipiti undwe aletje Baiziraela babhude mu shango iye.”
12Mushe iye kadabila Yahwe eti, “Bonani Baiziraela abazonditeedza, Faro iye ngono unowonditeedza tjini, imi ndisi nyambi ye leba?”
13Koga Yahwe bakalebeleka na Mushe na Aroni kuti babudze Baiziraela na Faro Mambo we Egipiti kuti ibo batumwa kudusa Baiziraela mu shango ye Egipiti.
Misha ya Mushe na Aroni
14Aba ndibo bakololo ba Rubheni mbano ya Iziraela: Hanoki na Phalu na Hezironi na Khami, ibo bali misholo ye misha yabo. 15Bakololo ba Simiyoni ndi Jemuyele na Jamini na Ohadi na Jakini na Zohari na Shaulo mwana we nkadzi we Nkanana. Ndigo ludzi gwa Simiyoni igogu. 16#Mbalo 3:17-20; 26:57, 58; 1 Zwiyitikalo 6:16-19Awa mazina e bakololo ba Levi kuyenda nge zwizekugwana zwabo: Geshoni na Kohati na Merari. Levi wakatjila makole ali zana lina makole ali makumi ali matatu ne makole ali kutendeka (137). 17Bakololo ba Geshoni ndi Libini na Shimeyi nge misha yabo. 18Bakololo ba Kohati ndi Amuramu na Izha na Heburoni na Uziele. Kohati wakatjila makole ali zana lina makole ali makumi ali matatu ne makole ali matatu (133). 19Bakololo ba Merari ndi Mahili na Mushi. Ibaba i bana be bana ba Levi kuyenda ngozwagwa kwabo.
20Amuramu kalobola maahadzi babe Jokebedi ngono bakazwala Aroni na Mushe. Amuramu katjila makole ali zana lina makole ali makumi matatu ne makole ali kutendeka (137). 21Izha wakabe ana bakololo batatu: Kora na Nephegi na Zikiri. 22Bakololo ba Uziele ndi Mishayele na Elizafani na Sitiri.
23Aroni kalobola Elishebha nkololokadzi wa Aminadabhu hazwadzi ya Nashoni ngono bakazwala Nadabhu na Abihu na Eleazari na Ithamari. 24Bakololo ba Kora ndi Asiri na Elikana na Abiyasafu. Iyeyi ndiyo misha ye Bakora. 25Eleazari nkololo wa Aroni kalobola mmwe we bakololokadzi ba Putiele ngono bakazwala Finihasi. Aba ndibo misholo ye misha ye bana ba Levi.
26Aroni na Mushe ndibo bakati bakadwiwa ndi Yahwe bakati, “Dusani Baiziraela nge njudzi dzabo mu shango ye Egipiti.” 27Mushe iwoyu na Aroni, ndibo bakalebeleka na Faro ngekwe kudusiwa kwe Baiziraela mu shango ye Egipiti.
Yahwe banotuma Mushe na Aroni
28Zhuba lakati Yahwe bakalebeleka na Mushe mu shango ye Egipiti, 29Yahwe bakadwa Mushe bakati, “Ndimi Yahwe, budza Faro Mambo we Egipiti tjimwe ne tjimwe tjandinokubudza.”
30Koga Mushe kabe eti kuna Yahwe, “Bonani, imi anditotubula kulebeleka, Faro unowonditeedza tjini kene?”
Currently Selected:
Kufuluka 6: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
