Kufuluka 5
5
Mushe na Aroni mbeli kwa Mambo we Egipiti
1Kukati shule Mushe na Aroni bakayenda kuna Faro bakandwa bakati, “Yahwe Ndzimu we Baiziraela bakati, ‘Letja bathu bangu bayende banondithamila nzano ku tjilambanyika.’ ”
2Koga Faro kabe eti, “Yahwe ndiani wandingateedza aletja Iziraela kayenda? Anditoziba Yahwe, naiko andingaletje Iziraela kayenda.”
3Ipapo bakabe beti, “Ndzimu we Bahebheru wakashangana naswi, ndizo tokumbila, utiletje tiyende gwendo gwe mazhuba matatu mu tjilambanyika tinopa Yahwe Ndzimu wedu tjibhayilo kuti basitongodwa betiloba nge bugwele kene ne thumo.”
4Koga Mambo we Egipiti kabe eti ku bali, “Iwe Mushe na Aroni, ini musiyisa bathu nshingo wabo? Bgwililani ku nshingo wenyu.”
5Faro kabe eti, “Bonani, bathu ibaba babe banjisa mu shango ngono imwi mothama kuti banyaluluke mu nshingo wabo.”
6Zhuba ilelo Faro kadwa bayendisi be nshingo ne bashingisi be Baiziraela kati, 7“Musitongobe mutjapa bathu ibaba mashanga kuthamisa zwitina sekwa magala muthama, mubaletje banozwishakigwa mashanga. 8Koga bathame zwitina zwinolizana ne zwabagala bethama, musitongo buya mukazwitapudza. Bathu ibaba isimbe ndizo wali belila beti, ‘Mutiletje tiyende tinopisila Ndzimu wedu tjibhayilo.’ 9Lemeselani balume ibaba nshingo, bashinge basiteedze manyepkhwa.”
10Ndizo bayendisi be nshingo ne bashingisi be bathu bakayenda ku bathu bakabadwa bakati, “Faro wati aatjowomupa mashanga. 11Yendani munozwishakigwa mashanga kwamungaawana, koga tjilizanyo tje nshingo atjitowotapudzika.” 12Ndizo bathu bakaandama nge shango yose ye Egipiti bekubunganya malala e mashanga kuashingisa. 13Bayendisi be nshingo bakakulumbidza beti, “Nshingo wenyu muuligile sekwa magala mushinga muna mashanga.” 14Ngono bashingisi be Baiziraela bakalobgwa nge bayendisi be nshingo ba Faro, bakabhuzwiwa kuyi, “Ini nasi musaligila tjilizanyo tje zwitina tjamagala muligila?”
15Bashingisi be Baiziraela ipapo bakayenda kuna Faro bakanlilila beti, “Ini mubhata balanda benyu nge zila yakajali? 16Atitjapiwa mashanga, koga koyi, ‘Thamani zwitina.’ Bonani, tolobgwa koga ngono nlandu umu bathu benyu.”
17Mambo kadabila eti, “Mokhekheleza, mu simbe ndizo muti, ‘Mutiletje tiyende tinopisila Yahwe tjibhayilo.’ 18Yendani sakuno wali munoshinga, akuna mashanga amunowopiwa, koga muligile tjilizanyo tja kale tje zwitina.” 19Bashingisi be Baiziraela bakabona kuti bamu tjimo tjakabipa ha bedwiwa kuyi, “Musitongo tapudza tjilizanyo tje zwitina tje zhuba ne zhuba.”
20Bakati bedwa kuna Faro bakashangana na Mushe na Aroni bakabe bakabalindila. 21Ngono bakabadwa bakati, “Yahwe bamubone! Babone tjabangashinga ndimwe! Ngoti mathama kuti tishimike mu mesho a Faro ne balanda babe. Malonga thumo mu maboko abo kuti batibulaye.”
Mushe unong'ong'ola kuna Yahwe
22Ipapo Mushe kayenda kuna Yahwe kati, “She, ini mathama zwinogwadza ku bathu ibaba kene? Makabe manditumilani iko? 23Ngoti kudwila pandakalebeleka na Faro mu zina lenyu, wakathamila bathu ibaba mbipo, koga amuzosunungula bathu benyu ndodwa.”
Currently Selected:
Kufuluka 5: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
