Kufuluka 25

Zwipo zwe Nshasha wakayengemala

(Kufuluka 35:4-9)

1Yahwe bakadwa Mushe bakati, 2“Idwa Baiziraela bandidusile tjipo. Undiamutjilile tjipo mu mmwe ne mmwe unondidusila tjipo nge moyo ntjena. 3Zwipo zwaunowoamutjila mu bali ndi yezwi: Golide ne siliva ne phangula, 4ne jila le mbala we gova ne le mbala nshaba ne bushaba gwakabondelela ne jila lakathang'wa nge bukuse gwe mbudzi, 5ne makukuta e nyundo akatakiwa bushaba ne e mbudzi ne mapango akasima e n'wunga, 6ne mafuta e mavone ne mafuta e motsha anozhodziwa ne motsha unonuhwisa zwinozipa, 7ne mabgwe anoyi onikisi ne mabgwe anonamatidziwa mu efodi ne e khiba ye ifuba. 8Ngabandibakile bugalo gwakayengemala kuti ndigale pakati kwabo. 9Uithame iyendidzane ne mbumbiko ye bugalo gwe Ndzimu gwandinowokulakidza naizo zose zwija zwayo, uzwithame saikoko.

Bhokisi le Tjidumano

(Kufuluka 37:1-9)

10“Muthame bhokisi le makwasayile e n'wunga le bulefu gungapa thambo mbili, bupabi guli thambo ing'ompela ina gaswa. 11Mulidzulule nge golide mukati na kuzhe, muthame mpeto nge golide kulipoteleka. 12Mulithamile milipo ili minna ye golide uilonge mu zwibhali zwalo zwi nna, milipo mibili ibe mu lubadu gumwe, mibili ibe mu gumwe. 13Muthame mapango e n'wunga muadzulule nge golide. 14Mapango iyawa muashomeke mu milipo imu hwunde dze bhokisi mulisenge ndiwo. 15Mapango iyawa agale mu milipo iyeyo asitongo dusiwa. 16Mu bhokisi ilelo ulonge tjidumano tjandinowokupa.

17 # Bahebheru 9:5 “Ube uthama tjigalo tje ngoni tje golide mbuyanana, bulefu gwatjo gube thambo dzili mbili, bupabi igo gube thambo ing'ompela. 18Uthame kherubhu dze golide dzili mbili, udzithule ube udzimisa ku midzibo mibili ye tjigalo tje ngoni. 19Uthame kherubhu ku ndzibo we tjigalo tje ngoni, imwe ithame ku mmwe ndzibo, udzibhatshanye ne tjigalo tje ngoni dzibe ku midzibo yatjo. 20Dzikherubhu idzedzi dzitambunudzile mapapilo pezhugwi kwe tjigalo tje ngoni dzitjisitile nge mapapilo adzo, njiso dzadzo dzilingisane dzakalinga ku tjigalo tje ngoni. 21Ubige tjigalo tje ngoni pezhugwi kwe bhokisi ngono mu bhokisi ulonge tjidumano#25:21 tjidumano: Tjihebheru tjoti butendeki tjandinowokupa. 22Ipapo ndipo pandinowoshangana nawe. Ndowolebeleka nawe ndili pezhugwi kwe tjigalo tje ngoni pakati kwe dzikherubhu mbili dzi pezhugwi kwe Bhokisi le Tjidumano, ndowolebeleka nawe zose zwandinowokupa uli nlayo ku Baiziraela.

Tafuli ye Tjiwunga tjinopiwa Ndzimu

(Kufuluka 37:10-16)

23“Uthame tafuli nge makwasayile e n'wunga, bulefu gwayo gube thambo mbili, bupabi gube thambo ing'ompela, bulefu kuyenda pezhugwi gube thambo ina gaswa. 24Uidzulule nge golide ube uthama mpeto we golide kuipoteleka. 25Uyithamile ikombeledzo tje bupabi gungapa gwe tjiazha ne mpeto we golide kupoteleka ikombeledzo. 26Uithamile milipo minna ye golide mu midzibo yayo minna kulingisana ne makumbo ayo manna. 27Milipo iyeyi ibe pejo ne ikombeledzo kubhata mapango anoshingisiwa kusenga tafuli iyeyi. 28Uthame mapango e n'wunga uadzulule nge golide abe iwo aunosengesa tafuli. 29Uithamile ndilo ne ndigwana dzinopisila motsha ne mapepe ne ndilo hwulu dzinoshingisiwa mu tjipo tje tjing'o, zose uzwithame nge golide. 30#Zwipo 24:5-8Ubige tjiwunga tje Ndzimu pa tafuli mbeli kwangu misi yose.

Tjigadziko tje mavone

(Kufuluka 37:17-24)

31“Uthame tjigadziko tje mavone nge golide mbuyanana. Bhato ne mmbili watjo zwithamiwe nge golide yakathugwa, thabi dzatjo ne zwilongwana zwatjo ne maluba akatjinakisa zwibe zwakabhatana natjo. 32Kube ne thabi dzili tathatu mu tjigadziko itjetji tje mavone, thabi thatu dzibe mu lubizho gumwe, dzimwe thatu dzibe mu gumwe. 33Lutabi gumwe ne gumwe gube ne zwilongwana zwili zwitatu zwinofanana ne luba linoyi alimondi, tjimwe ne tjimwe tjibe ne lutabi gwatjo. Thabi dzose dzili tathatu dzinodwa mu mmbili we tjigadziko tje mavone dzibe ne zwilongwana zwakajalo. 34Mu tjigadziko tje mavone nge kwatjo kube ne zwilongwana zwili zwinna zwakathamiwa se maluba e alimondi zwina thabi dzazo ne maluba azo. 35Kube ne zwilongwana kusi kwe thabi dzimwe ne dzimwe mbili dze thabi dzili tathatu dzinodwa mu tjigadziko tje mavone. 36Zwilongwana ne thabi dzazo zwibe zwakabhatana kuli tjithu tjing'ompela, kose kuli kuthu kung'ompela kwakathamiwa nge golide mbuyanana yakathugwa. 37Utjithamile mavone ali kutendeka. Mavone iyawa abigwe nge zila inowoti kavoneka tjibata tjimbeli kwawo. 38Zwinoshingisiwa kubhatidza mavone ne ndigwana dzazo zwithamiwe nge golide mbuyanana. 39Tjigadziko itjetjo ne zwishingisiwa zwatjo zose zwithamiwe nge golide ye tjilizanyo tjingapa talenta. 40#Mishingo 7:44; Bahebheru 8:5Ndizo ubone kuti unozwithama kuyendidzana nge ndongoloso yawalakidziwa pezhugwi kwe dombo.

Currently Selected:

Kufuluka 25: KBTP

Highlight

Compare

Copy