Kufuluka 24

Tjidumano tjasungwa

1Ipapo Ndzimu wakati kuna Mushe, “Tathila ngeno kuna Yahwe, iwe na Aroni na Nadabu na Abihu ne bakulu be Iziraela bali makumi ali kutendeka ngono munamate muli thambo. 2Mushe ega asedzele pejo na Yahwe, koga bamwe ibo basitongo sedzela pejo, bathu basitongo zha naye.”

3Mushe kazha kabudza bathu matama wose a Yahwe ne ndayo dzose dzabo, ngono bathu bakadabila bose nge hwi ling'ompela beti, “Towothama tjimwe ne tjimwe sekwa leba Yahwe.” 4Mushe kakwala matama wose a Yahwe ngono kamuka ebinduka enobaka tjibeso tjinopisigwa zwibhayilo pa hwunde ye dombo, ebe emisa mabgwe ali gumi lina mabili (12) kuyendidzana ne njudzi dzili gumi lina mbili dze Iziraela. 5Ngono katuma bazhuzha be Baiziraela kuyisila Yahwe zwibhayilo zwinopisiwa ne zwibhayilo zwe mbakisano zwe mangabe. 6Mushe katola gaswa le malopa kalilonga mu ndilo, gaswa limwe le malopa kanyasa tjibeso tjinopisigwa zwibhayilo ndilo. 7Ipapo katola Lukwalo gwe Tjidumano kagubalila bathu ngono ibo bakabe beti, “Kose kwalebgwa ndi Yahwe towokushinga, ngono tikabahwa.”

8 # Matewu 26:28; Mako 14:24; Luke 22:20; 1 Bakorinta 11:25; Bahebheru 10:29; Bahebheru 9:19, 20 Mushe katola malopa kanyasa bathu ndiwo kabadwa kati, “Bonani, awa malopa e tjidumano Yahwe tjabathama namwi kuyendidzana ne matama wose iyawa.” 9Ndizo Mushe na Aroni na Nadabu na Abihu ne bakulu be Iziraela bali makumi ali kutendeka (70) bakatathila pezhugwi, 10ngono bakabona Ndzimu we Iziraela ngono kusi kwe makumbo awo kuna budzilo gunonga gwakathamiwa nge mabgwe mabuya e safire kufana ne kudzimu kubuyanana. 11Ndzimu auzoloba batungamili ibaba be Iziraela, bakabona Ndzimu ngono bakaja bakang'wa.

Mushe ali pezhugwi kwe Dombo le Sinai

12Yahwe bakadwa Mushe bakati, “Tathila ngeno kundili pezhugwi kwe dombo, ube uma uli apajee, imi ndowokupa zwileiti zwe mabgwe zwina milayo yandakwalila kulayiwa kwabo.” 13Ndizo Mushe kamilika ana mbhatshi uwe Joshuwa, ngono Mushe katatha Dombo le Ndzimu. 14Kabe edwa bakulu be Iziraela eti, “Mutimilile ipapa kudzina tibuya. Bonani, Aroni na Huri banamwi, ungabe ana ndebo ayende ku bali.”

15Ndizo Mushe katatha dombo ngono gole likazwimba dombo. 16Tjedza tja Yahwe tjikaambadza Dombo le Sinai, gole likazwimba dombo mazhuba ali matathatu, mu zhuba le butendeka Ndzimu ukadana Mushe uli pakati kwe gole. 17Kulingika kwe tjedza tja Yahwe mu mesho e Baiziraela kwakabe kunga moto unothuta pezhugwi kwe dombo. 18#Matama 9:9Ngono Mushe kangina mu gole katathila pezhugwi kwe dombo. Ngono kagala pezhugwi kwe dombo mazhuba ali makumi manna ne masiku ali makumi manna.

Currently Selected:

Kufuluka 24: KBTP

Highlight

Compare

Copy