Kufuluka 19
19
Baiziraela pa Dombo le Sinai
1Mu mwedzi ugala we butatu Baiziraela babhuda mu shango ye Egipiti, muna ilelo zhuba bakaswika mu tjilambanyika tje Sinai. 2Bakati bamilika mu Refidimu bakaswika mu tjilambanyika tje Sinai bakakotokela mu tjili. Bakakotokela kulingisana ne dombo.
3Mushe katathila pezhugwi ku Ndzimu, ngono Yahwe bakan'dana bali mu dombo bakati, “Etji nditjo tjaunowoleba ku ng'umba ya Jakubo, ubudze bathu be Iziraela uti: 4Makabona tjandakathama mu Baegipiti, mukabona sekwa ndakamusumbika nge mapapilo e dzu amuzhisa kundili. 5#1 Pita 2:9#Matama 4:20; 7:6; 14:2; 26:18; Tito 2:14Ndizo ngwenu wali, ha mungandihwa mukalondolodza tjidumano tjangu, mowobe bangu pakati kwe njudzi dzose ngoti shango yose nge yangu. 6#Zumbunulo 1:6; 5:10Mowobe kundili muli bushe gwe bupirisiti muli ludzi gwakayengemala. Awa ndiwo matama aunowobudza bana be Iziraela.” 7Ndizo Mushe kazha kadana bakulu be Baiziraela kababudza matama wose iyawa aakadwiwa ndi Yahwe. 8Bathu bose bakadabila kang'ompela beti, “Kose kwalebgwa ndi Yahwe towokushinga.” Ndizo Mushe kanobika matama e bathu kuna Yahwe.
9Yahwe bakadwa Mushe bakati, “Bona, ndozha ku kuli ndili mu gole laka tizwi, kuti nditi ndilebeleka nawe bathu behwa, kuti ndizo bakugalebgwe kuyendila mbeli.”
Ipapo Mushe kabudza Yahwe matama e bathu. 10Yahwe bakadwa Mushe bakati, “Yenda ku bathu ubatjenapadze nasi na mangwana, ubadwe basuke zwiambalo zwabo. 11Ngono muzwilulwamisile zhuba le butatu, ngono nge zhuba le butatu Yahwe banowodelukila pezhugwi kwe Dombo le Sinai mu mesho e bathu bose. 12#Bahebheru 12:18-20Ubigile bathu migathu kupoteleka, ubadwe uti, ‘Yelani njele musitongo tathila pezhugwi kwe dombo kene kuli kukutha migathu yalo; iye ungakutha dombo ileli unowobulawa. 13Akuna luboko gunowonkutha, koga unowokikithidziwa nge mabgwe kene kabhayiwa nge nsebe, ikoku kowoshingikalila bathu kose ne phuka.’ Koga ha lunyanga gulilila pezhugwi, ndiko bathu kwabanowotathila pezhugwi kwe dombo.”
14Ndizo Mushe kadeluka dombo kayenda ku bathu kabatjenapadza, ibo bakasuka zwiambalo zwabo. 15Mushe kadwa bathu kati, “Mube makalulwama nge zhuba le butatu, musitongo shanganyila ngubo ne nkadzi.” 16#Zumbunulo 4:5#Matama 4:11, 12Nge zhuba le butatu kukabe ne matutu ne kupenya kwe vula ne gole lakatizwi pezhugwi kwe dombo ne lunyanga gukalilila pezhugwi, ngekwa ikoku bathu bose bamu mishasha bakatetema. 17Ipapo Mushe kadusa bathu mu mishasha kunoshangana ne Ndzimu, bakayenda bakanoma pa hwunde ye dombo. 18Dombo le Sinai likakwitidziwa nge busi lose, ngobe Yahwe badelukila pezhugwi kwalo bali mu moto. Busi gwalo gukamilikila pezhugwi se gwe bibi, dombo lose likatengenyeka kwazo. 19Ngono kukati kulila kwe lunyanga kukulidzika, Mushe kalebeleka ngono Ndzimu bakanshandula nge kudadamula. 20Yahwe bakadelukila pezhugwi kwe Dombo le Sinai, ku tjilungwani tje dombo; ngono Yahwe bakadanila Mushe pezhugwi kwe dombo, ndizo Mushe katathila pezhugwi. 21Yahwe bakadwa Mushe bakati, “Delukila pasi unodwa bathu kuti basitongo tjuluka migathu kuwondibona, bunjinji gwabo gungadwa guloba. 22Bapirisiti banozha pejo na Yahwe na ibobo bazwitjenapadze Yahwe basitongodwa bebaloba shamu.” 23Mushe kabe eti kuna Yahwe, “Bathu abangatathe Dombo le Sinai ngoti imwi nge kwenyu matidwa mukati, ‘Bigani migathu kupoteleka dombo muliyengemadze.’ ” 24Yahwe bakandwa bakati, “Deluka unobuya na Aroni; koga udwe bapirisiti ne bathu bose basitongotjuluka migathu bezha kuna Yahwe, Yahwe bangadwa bebaloba shamu.” 25Ndizo Mushe kadeluka mu dombo kanobudza bathu tjalebgwa ndi Yahwe.
Currently Selected:
Kufuluka 19: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
