Nsumikili 3
3
Tjimwe ne tjimwe tjina nsi watjo
1Tjimwe ne tjimwe tjina nsi watjo,
ne ndebo imwe ne imwe ina tjibaka tjayo mu shango:
2Kuna tjibaka tje kuzwagwa
ne tjibaka tje kufa,
tjibaka tje kudzwala
ne tjibaka tje kuvuna,
3tjibaka tje kubulaya
ne tjibaka tje kupodza,
tjibaka tje ku pkhwanya
ne tjibaka tje kubaka,
4tjibaka tje kulila
ne tjibaka tje kuseka,
tjibaka tje kudzipitana
ne tjibaka tje kuzana,
5tjibaka tje kulasha mabgwe
ne tjibaka tje kukubunganya mabgwe,
tjibaka tje kugumbatila
ne tjibaka tje kusagumbatila,
6tjibaka tje kushaka
ne tjibaka tje kulashikigwa,
tjibaka tje kubiga
ne tjibaka tjekulasha,
7tjibaka tje kupalula
ne tjibaka tje kuthuma,
tjibaka tje kunyalala
ne tjibaka tje kulebeleka,
8tjibaka tje kuda
ne tjibaka tje kubenga,
tjibaka tje ngwa
ne tjibaka tje mbakiso.
9Nshingi unobuyigwa ngeni mu kushinga kungapa? 10Ndakabona ntolo wakapiwa bakololo be bathu nge Ndzimu, kuti badzulukutane nawo. 11Wakathama tjimwe ne tjimwe kuti tjinake mu tjibaka tjatjo, kakale wakalonga kusina bupelo mu nkumbulo we nthu, kuti asitongobe ne unoziba Ndzimu tjawakathama kudwa kutangisa kunoti ku bupelo. 12Ndoziba kuti akuna tjimwe tjinoyita mubali kuzhe kwe kushatha ne kupembela ha batjatjila mu shango, 13kakale kuti itjipo tje Ndzimu ku bathu kuti mmwe ne mmwe aje ang'we kakale awane kushatha mu nshingo uwe. 14Ndoziba kuti tjinobe tjathamiwa nge Ndzimu tjogalila tjose, akuna tjingapaphidziwa mutjili, kene tjimwe tjinga dusiwa mutjili, Ndzimu wakathama kuti kujalo, kuti ndizo bathu bautje. 15Itjo tjiyapo, tjakabepo kale, tjinowobepo, tjakabepo kale, kakale Ndzimu unoshaka itjetji tjakapinda kale.
Kushayika kutambunuka mu shango
16Pezhugwi kwa ipapo ndakabona kuti mu shango mu bumo gwe thambunuko kuna bubi ne mu bumo gwe ndulamo naipo bo pana bubi. 17Ndakati mu moyo, “Ndzimu unowosumikilisa balulwami ne batjinyi,” nekuti wakabiga tjibaka tje ndebo imwe ne imwe, ne tjibaka tje nshingo mmwe ne mmwe. 18Ndakazwidwa mu moyo wangu ngekwe bakololo be bathu kuti Ndzimu unobalika kubalakidza kuti ba phuka. 19Zwinoshingikalila bakololo be bathu ne zwinoshingikalila phuka zofanana, nthu ha efa phuka inofabo. Zose zofema, kakale nthu aana tjaanopinda phuka nditjo, nekuti kose madatha. 20Zose zoyenda pathu pa ng'ompela, zose zodwa mu mavu, kakale zose zowobgwilila ku mavu. 21Ndiyani unoziba kuti meya ye nthu ini yenda kudzimu meya ye phuka iyo inoyenda pasi mu shango kene? 22Ndizowali ndakabona kuti akuna tjinopinda kuti nthu azipigwe ne nshingo uwe, ngobe ndilo gobe lile, ndiyani utjowommusa kuti azhe kuwobona zwinoshingikala asinobe afa?
Kalanga Bible © Bible Society of Botswana, 2008, 2018.