Matama 32

1“Hwilila iwe kudzimu ngono ndowolebeleka,

shango ngayihwe matama e nlomo wangu.

2Kudiya kwangu ngakune se vula,

ndebeleko yangu iwe se khawa,

se vula inona mu bushwa gutjibutshwa,

ne masusu mu mazhani.

3Ngoti ndowoleba zina la Yahwe.

Gudzo ulipe Ndzimu.

4“Iye i Shongwe, nshingo uwe wakapelela,

ngoti zila dzidze dzose dzakatambunuka.

Ndzimu we kugagwabgwe usina jinyo,

wakatambunuka wakalulwama.

5Bakanshingila mbipo,

abatji bana babe ngekwe mbipo yabo,

ba tjizekugwana tjakaleleka.

6Ndiyo zila yaunolipa Yahwe ndiyo iyeyi?

Imwi bathu bezwilengwe?

Apa ate baliyibo Tate benyu, Mbumbi wenyu,

ibo bakamubumba kene?

7Kumbulani mazhuba a ntolo,

alakana makole e zwizekugwana zwinjinji,

bhuzwa tate babo ngono banowokulakidza,

bakulu babo, ngono banowokubudza.

8 # Mishingo 17:26 Kwakati Upezhugwizhugwi epa njudzi thaka yadzo,

paakabe ethubukanya bakololo be balume,

wakatjeka migathu ye bathu,

kuyendidzana ne mbalo ye bakololo be Ndzimu.

9Ngoti gobe la Yahwe bathu babo,

Jakubo iye thaka yabo.

10“Bakan'wana mu tjilambanyika,

mu tjilambanyika tjakathukudzika,

ngono bakambakilila, bakan'tjengeta,

bakan'tjengeta se shanga ye zhisho labo.

11Se dzu lizunguza shaka lalo,

liyengelela pezhugwi kwe majindana alo,

litambunudza mapapilo alo, liabhata,

liasenga na pezhugwi kwe mapapilo alo,

12Yahwe boga ndibo bakabatungamila,

ngono kwakabe kusina ndzimu wakabe unabo.

13Bakabathama kuti batathile ku magalo apezhugwi e shango,

ngono bakaja zwakadwa mu minda,

bakabathama kuti bang'we butji mu shongwe

ne mafuta abo adwe mu shongwe.

14Mashwe anodwa mu ng'ombe, ne nkaka kudwa mu ngubi,

ne mafuta e pkhwizana ne nyundo,

ng'ombe dze Bhashani ne mbudzi,

ne koroni mbuya kupindisa,

ne ntubgwi we zhambi wamunong'wa uli nkumbi.

15“Koga Jeshuruni kakola, kathulana,

wakola, wabe nkodu wamonyoka.

Ngono wakafupatila Ndzimu iwo wakanthama,

ebe edadila Shongwe ye jidzo lile.

16Bakabadzonga kuti babe ne fupa ku midzimu mimwe,

bakabagwadzisa moyo nge zwiyito zwinoshimika.

17 # 1 Bakorinta 10:20 Bakadusila zwibhayilo madimoni asi midzimu,

ku midzimu yabasakatongo ziba,

ku midzimu mitshwa yakanginilila ngwenu,

bobatategulu benyu yabasakatongoziba.

18Makadusa Shongwe yakamubumba mu mikumbulo yenyu,

mukakangang'wa Ndzimu wakamutshibama.

19“Yahwe bakakubona ikoku ngono bakabalasha,

ngekwe kutanga kwe bakololo ne bakololokadzi babo.

20Ngono bakabe beti, ‘Ndowobasumbikila buso gwangu,

ndowobona kuti bhelelo labo ndilipi,

ngoti ba tjizekugwana tjakakombama,

bana basina kugalikamoyo.

21 # 1 Bakorinta 10:22; Baroma 10:19 Bakandidzonga kuti ndibe ne fupa ngekwe tjisi ndzimu,

banditanga nge midzimu yabo ye zwifano.

Nami ndowodzonga fupa la ibabo basi bathu,

ndowobatanga ne itjaba tje tjilengwe.

22Ngoti moto wabhatidziwa nge kugwadzamoyo kwangu,

ngono unopisa unginilila kusi kwe shango,

ube uja shango ne zwizwalo zwayo,

ube ubhatidza moto mu thiwa dze matombo.’

23“Ngono ndowobutitika mbipo pezhugwi kwabo,

ndowoshingisa misebe yangu mubali.

24Banowondesiwa nge bhamba,

bakajiwa nge kupisa kukulu,

ne bugwele gunolilita,

kakale ndowotumila meno e zwibandana kubali,

ne bushungu gwe zwithu zwinokambayila mu hwuluba.

25Pakazhuka thumo lowothama bafigwa,

ngono mu ng'umba kowobepo kutja,

kulobesiwa batjetjana ne phandala,

shabana dzinomwa ne sholotjena.”

26Ndingabe ndakati, “Ndowobapaladzila kule,

ndowothama kukumbugwa kwabo kupele pakati kwe bathu,

27ha ndakabe ndisatja kudadigwa nge zwita,

ngoti zodwa zwihwila ntome,

ngoti zwingadwa zwiti, ‘Takunda, Yahwe abazothama kose ikoku.’

28“Ngoti ibo ba ludzi gusina ikumbuludzo,

ngono akuna kuhwisisa mu bali.

29Ha bakabe bakatjenjela, bangabe behwisisa ikoku,

banobe bebona bhelelo labo!

30Kothamikala tjini kuti ng'ompela atate bali tjiwulu,

ne kuthama kuti bali zwiwulu zwili gumi batizhe,

kuzhe kwe kuti Shongwe yabo yabatengesa,

ngono Yahwe babazwilandula?

31Ngoti shongwe yabo ayitonga Shongwe yedu

koga zwita zwedu zopedzisa sa ikoku.

32Ngoti nzhambi wabo unodwa mu nzhambi we Sodoma

ne mu minda ye Gomora.

Zhambi dzabo dzizhele bushungu,

mitjelo yayo inobaba.

33Nkumbi wabo we zhambi bushungu gwe nyoka,

ne bushungu gwakabipa gwe zwipakupaku.

34“Apa ikoku akuzobigwa pandili,

akuzozhaliligwa mu matula angu kene?

35 # Baroma 12:19; Bahebheru 10:30 Kubgwilizila nge kwangu, ne mbuzilo,

mu tjibaka makumbo abo paanosodzoloka,

ngoti zhuba le kuwigwa nge mbatsha lasendela,

ngono ndashiko yabo inozha nge lubilo.

36 # Njimbo 135:14 Yahwe banowopembedza bathu babo

bakabe ne ngoni ku balanda babo,

ha bebona kuti simba labo lapela,

ngono kusina wasala, nsungwa kene wakasununguka.

37Ipapo banowoti, ‘Midzimu yabo ingayi,

shongwe yabakatizhila muili,

38midzimu yakaja mafuta e zwibhayilo zwabo,

ing'wa nkumbi we tjibhayilo tjabo tje tjing'o?

Ngaimilike imubhatshe,

ngayibe mbakililo yenyu!

39“ ‘Bonani ngwenu kuti imi, imi nge kwangu, ndimi iye,

ngono akuna ndzimu kuzhe kwangu,

ndobulaya abuya atjidza,

ndokubadza abuya apodza,

ngono akuna ungasunungula tjimu tjiazha tjangu.

40Ngoti ndomilidzila tjiazha tjangu kudzimu,

ndibe ndituna nditi, se nditjila kusingapele,

41ha ndikuswa bukanu gwangu gunopenyelela,

ngono tjiazha tjangu sumikilisa,

ndowobgwilizila zwita zwangu,

ndibe ndibuzila ibabo banondibenga.

42Ndowothama kuti misebe yangu ilaladzisiwe nge malopa,

ngono bukanu gwangu gowoja nyama

ne malopa ebabulawa ne batapiwa,

kudwa mu misholo ina mavudzi malefu ye zwita.’

43 # Baroma 15:10; Zumbunulo 19:2 “Lumbidzani bathu babo, imwi njudzi,

ngoti banobgwilizilila malopa e balanda bawo,

ngono banobgwilizila zwita zwabo,

ngono bakathamila shango ye bathu babo kugadzana.”

44Mushe kazha ana Joshuwa nkololo wa Nuni ngono kabala matama wose e lumbo igogu bathu bakahwilila. 45Ngono kukati Mushe asinopedza kuleba matama wose iyawa ku Baiziraela bose, 46kabadwa kati, “Longani mu moyo matama wose iyawa andinomupa mu zhuba lino, muadiye bana benyu, kuyita kuti babe ne njele kushinga matama wose e nlayo iwoyu. 47Ngoti ate ali mazakhwa ku muli, koga butjilo gwenyu, ngoti ndiwo mowotjila tjibaka tjilefu mu shango yamunotjuluka Jorodani kunoyithama yenyu.”

Mushe unofila ku Dombo le Nebo

48 # Mbalo 27:12-14; Matama 3:23-27 Ngono Yahwe bakadwa Mushe mu zhuba ilelo bakati, 49“Tatha dombo ileli le Abarimu, Dombo le Nebo limu shango ye Moabu kulingisana ne Jerikho ngono ubone shango ye Kanana iyo yandinopa bathu be Iziraela kuyi thuwa, 50ngono ufile pezhugwi kwe dombo ileli lawunotatha utobele bakanyi kwenyu, sa Aroni nkulu uwo wakafila mu Dombo le Hori ngono katobela bathu bakanyi kwabo, 51ngoti wakakong'wa kulakidza kugalamoyo mu ndili pakati kwe bathu be Iziraela pa vula dze Meribatikadeshi mu tjilambanyika tje Zini, ngoti awuzonditeta sendakayengemala pakati kwe bathu be Iziraela. 52Ndizo unowobona shango mbeli kuko, koga awutoyingina shango yandinopa bathu be Iziraela.”

Currently Selected:

Matama 32: KBTP

Highlight

Copy

Compare