Matama 31
31
Joshuwa egala thaka Mushe
(Mbalo 27:12-23)
1“Ndizo Mushe kadwilila eleba matama iyawa ku Baiziraela bose. 2#Mbalo 20:12Ngono kabadwa kati, ‘Ndabe ne makole ali zana lina makole ali makumi mabili (120) nasi mu zhuba lino, anditjatubula kuyenda yeno na yeno.’ Yahwe bakati kundili, ‘Iwe awutowotjuluka Jorodani.’ 3Yahwe Ndzimu wenyu ibo tjekwabo banowomutungamila ha mutjuluka, banowolobesa njudzi idzedzi mbeli kwenyu, kuti ndizo mudzitolele shango yadzo, ngono Joshuwa unowotjuluka akamutungamila Yahwe sekwa baleba. 4#Mbalo 21:21-35Ngono Yahwe banowobathama sekwa bakathama Sihoni na Ogi, bomambo be Baamori ne shango yabo pabakabalobesa. 5Yahwe banowobalonga mu maboko enyu ngono mowobathama kuyendidzana ne nlayo wandakamupa. 6Simani mube ne tjilopa, musitongotja kene mukalobgwa nge hana nge kwabo, ngoti Yahwe Ndzimu wenyu ndibo banoyenda namwi abangathame kuti mukong'we, abangamusiye.”
7“Ipapo Mushe kadana Joshuwa ebe eti kunli mu mesho e Baiziraela bose, ‘Sima ube ne tjilopa, ngoti unowoyenda ne bathu ibaba ku shango Yahwe yabakatuna kuna bobatategulu babo kubapa iyo ngono uthame kuti bayitole. 8#Joshuwa 1:5; Bahebheru 13:5Yahwe ndibo banowomutungamila, banowobe nawe, abanga kulashe kene kuli kukusiya, usitje kene kuli kutemeka mafupa.’ ”
Kubagwa kwe nlayo
9“Ngono Mushe kakwala nlayo iwoyu ngono kawupa bapirisiti, bakololo ba Levi bakabe bakasenga Bhokisi le Tjidumano tja Yahwe ne sholotjena dzose dze Iziraela.” 10#Matama 15:1, 2; Matama 16:13-15Ipapo Mushe kabalaya eti, “Kubupelo gwe makole mamwe ne mamwe mu tjibaka tjakabigwa tje gole le kusununguka, ku Nzano we Mishasha, 11Baiziraela bose pabanobe bezha mbeli kwa Yahwe Ndzimu wenyu pa bugalo gwabanowobe bashalula, iwe ubale nlayo iwoyu mbeli kwe Baiziraela bose bakahwilila. 12Ukubunganye bathu, balume ne bakadzi ne bana ne balubili bamu mizi yenyu kuyita kuti bahwe bazwidiye kutja Yahwe Ndzimu wenyu ne kube ne njele kushinga tjimu matama e nlayo iwoyu, 13ne kuti bana babo basakatongo uziba bahwe ngono bazwidiye kutja Yahwe Ndzimu wenyu sayikoko ha mutjibapenyu mu shango yamunotjuluka Jorodani kuyithama yenyu.”
14Ngono Yahwe bakati kuna Mushe, “Bona mazhuba anosedzela pawakafanila kufa, dana Joshuwa muzhe mu nshasha we bushanganilo kuti ndintume.” Ngono Mushe na Joshuwa bakayenda bakanongina mu nshasha we bushanganilo. 15Ngono Yahwe bakaboneka mu nshasha bali mu gole, gole likama pa nkoba we nshasha.
16Ngono Yahwe bakati kuna Mushe, “Bona, wabe pejo nge kulala na bobatategulu babo, ngono bathu ibaba banowomilika bakathama bufukula betebela midzimu ipoga ye shango iyeyi kwabanoyenda kunobe pakati kwabo, ngono banowondifupatila bakatjinya tjidumano tjangu tjandakathama nabo. 17Ipapo bushongola gwangu gowobamukila mu zhuba ilelo, ngono ndowobasiya abasumbikila buso gwangu, ngono banowolobesiwa ne zwinjinji zwakabipa ne zwinodziyidza zowobawila, ndizo banowoti mu zhuba ilelo, ‘Apa zwibiibi izwezwi azwitotiwila ngoti Ndzimu wedu awupo pakati kwedu kene?’ 18Ngono nge malebeswa ndowosumbika buso gwangu mu zhuba ilelo ngekwe bubi gwabanowobe begushinga, ngoti bashandukila ku midzimu mimwe. 19Ndizo wali ngwenu kwala lumbo igogu, ugudiye bathu be Iziraela, ugulonge mu milomo yabo, kuti lumbo igogu gube butendeki gwangu kulingisana ne bathu be Iziraela. 20Ngoti ndowoti ndabalonga mu shango inowunga nkaka ne butji iyo yandakagadzabgwe bobatategulu babo kubapa iyo, ngono bakaja bakaguta bakakola, banowoshandukila ku mimwe midzimu bebe beyishingila bendidadila betjinya tjidumano tjangu. 21Ngono kowoti zwakabipa zwinjinji ne zwinodziyidza zwabawila, lumbo igogu gowolingisana nabo se ntendeki, ngoti agungakanganike gukadwa mu milomo ye bana babo. Ndoziba mazwimisilo abanobumba kale ndisathu abalonga mu shango yandakatuna kubapa.” 22Ndizo Mushe kakwala lumbo igogu mu zhuba ilelo ngono kagudiya bathu be Iziraela.
23 #
Mbalo 27:23; Joshuwa 1:6 Ngono Yahwe bakalaya Joshuwa nkololo wa Nuni bakati, “Sima ube ne tjilopa unowoyisa bathu be Iziraela ku shango yandakatuna kubapa, ndowobe ndinawe.”
24Kwakati Mushe asinopedza kukwala matama e nlayo iwoyu mu lukwalo kunoti kubupelo, 25Mushe kadwa Balevi bakabe besenga Bhokisi le Tjidumano tja Yahwe kati, 26“Tolani lukwalo igogu gwe nlayo mugubige pawunde ye Bhokisi le Tjidumano tja Yahwe Ndzimu wenyu, kuti kube ipapo kutendeka nge kwenyu. 27Ngoti ndoziba mu bapanduki kakale makawoma misholo kungapani. Bonani, ndatinditjatjila namwi, nasi mapandukila Yahwe, ngono pandinowobe ndafa mowothama kuli kungapani kene! 28Kubunganyilani kundili misholo yose ye njudzi dzenyu ne makulukota, kuti ndilebe matama iyawa mu zebe dzabo ndidane kudzimu ne shango kutendeka nge kwabo. 29Ngoti ndoziba kuti ndowoti ndafa mube muthama zwakabipa, mupambuka mu zila yandakamupa, ngono mu mazhuba ambeli mbipo inowomuwila ngoti mowoshinga tjakabipa mu mesho a Yahwe, mubatanga mubagwadzisa moyo nge mishingo ye maboko enyu.”
30Ipapo Mushe kaleba matama e lumbo igogu kuswikila epelela, elebeleka ne gubungano lose le Iziraela.
Currently Selected:
Matama 31: KBTP
Highlight
Copy
Compare
Share
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
