Matama 28
28
Makombolelo e kuhwa
(Zwipo 26:3-13; Matama 7:12-24)
1 #
Matama 11:13-17
“Ngono ha uhwa Yahwe Ndzimu uwo, una njele kulondolodza milayo yabo yose yandinokupa mu zhuba lino, Yahwe Ndzimu uwo banowokumilidza ukabe pezhugwi kwe njudzi dzose dze shango. 2Ngono makombolelo wose iyawa anowozha kukuli akawanda ha uhwa hwi la Yahwe Ndzimu uwo:
3“Unowokombolegwa mu nzi nkulu, ukakombolegwa mu shango. 4Ntjelo we mbili unowokombolegwa ntjelo we mavu awo anowokombolegwa ne ntjelo we phuka dzidzo ne kuwanda kwe ng'ombe dzidzo ne ngubi dzidzo. 5Zwitundu zwizo zowokombolegwa ne zwivangilo zwizo zwe tjiwunga. 6Unowokombolegwa ha ungina ukakombolegwa ha ubhuda.
7“Yahwe banowothama kuti zwita zwizo zwinokumukila uzwikunde, zowozha nge zila ing'ompela zwikakutizha nge zila dzili kutendeka. 8Yahwe banowozhisa makombolelo mu matula awo ne mu tjimwe ne tjimwe tjaunothama, banowokukombolela mu shango iyeyi yaunopiwa ndi Yahwe Ndzimu uwo. 9Yahwe banowomuthumbidza se bathu babo bakayengemala kubali, sekwa bakatuna kumuli ha mulondolodza milayo ya Yahwe Ndzimu wenyu kakale muyenda mu zila dzabo. 10Ngono bathu bose be shango banowobona kuti iwe unodang'wa nge zina la Yahwe, ngono banowokutja. 11Yahwe banowokupa kuwanda mu ntjelo we mbili uwo nemu ntjelo we ng'ombe dzidzo nemu ntjelo we mavu awo mu shango iyo Yahwe yabakatuna kuna bobatategulu babo kumupa iyo. 12Yahwe banowokuzhulila kudzimu dula labo le fumwa, kukupa vula mu shango nge nsi wayo ne kukombolela mishingo yose ye maboko awo ngono unowoadzima njudzi njinji, koga iwe aatowoadzima. 13Yahwe banowokuthama kube nsholo, abatowokuthama kube mwise ngono unowokulila pezhugwi koga autowobuyila pasi, ha uhwa milayo ya Yahwe Ndzimu uwo iyeyi yandinokupa nasi mu zhuba lino una njele kuyithama, 14usingapambukile ntome kwe limwe le matama andinokupa mu zhuba lino, uyenda ku luji kene ku lumeshwe uyenda ku imwe midzimu kuyishingila.”
Mbhayilo ye kusahwa
(Zwipo 26:14-46)
15“Koga ha ungasahwa hwi la Yahwe Ndzimu uwo kene ungasabe ne njele kushinga milayo yabo yose yandinokupa mu zhuba lino, ipapo bhiso lose ileli lowozha kukuli lakakukulila. 16Uwobe ne bhiso uli mu nzi nkulu, ukabe ne bhiso uli ku shango. 17Zwitundu zwizo zowobe ne bhiso ne mavangilo awo e tjiwunga anowobe ne bhiso. 18Ntjelo ye mbili uwo unowobe ne bhiso ne ntjelo we mavu awo ne kuwanda kwe ng'ombe dzenyu ne bana be ngubi iyo. 19Unowobe ne bhiso ha ungina ukabe ne bhiso ha ubhuda.
20“Yahwe banowokutumila bhiso ne kuwumana ne kushangashangana muna kose kwaunoshinga kuswikila ulobesiwa upela tjinyolotjo kuyikhwa nge mbipo ye zwaunothama ngoti wandifupatila. 21Yahwe banowothama kuti bugwele gukunamatile kuswikila bekupedza mu shango iyo yaunongina kuitola ne kuithuwa. 22Yahwe banowokuloba nge bugwele kunowokukorotelesa ne gunokutetemesa ne gunopisa ne kupisa kunonga moto ne bhamba ne phori ne hwuzwi ne zwimbugwi, zowokusala shule kuswikila upela. 23Ngono mazhuzhugwi apezhugwi kwe misholo iyo anowobe phangula ngono shango kusi kuko ikabe butale. 24Yahwe banowothama vula ye shango iyo ikabe bgwisana ne hwuluba, ngono kowotebukila mukuli kudwa zhuzhugwi kuswikila walobesiwa.
25“Yahwe banowokuthama kuti ukundiwe mbeli kwe zwita zwizo, unowoyenda nge zila ing'ompela kunozwinginilila ngono ukatizha nge zila dzili kutendeka mbeli kwabo ngono unowotjisa ku mibuso yose ye shango. 26Ngono zwitumbu zwenyu zowobe zojiwa zwe nyuni dze phepo ne zwe zwibandana zwe shango ngono kowobe kusina mmwe unozwitata. 27Yahwe banowokuloba nge thomba dze Egipiti ne malonda ne kukwangwanyuka ne gwenyakwenya kwausingowopodziwa. 28Yahwe banowokuloba nge bupengo ne bupofu ne kushangashangana kwe nkumbulo. 29Ngono unowoambaamba zila masikati makulu se bhofu liambaamba mu zhalima, ngono aatowowatshika mu zila iyo. Unowotshambiligwa ukadwilila utolegwa ngono kowobe kusina unokubhatsha. 30Unowobigilidza nkadzi, ngono nlume mmwe kalala naye, unowobaka ng'umba koga ukasigale muili, unowolima nnda ye mizhambi ngono ukasishingise mitjelo yawo. 31Ngabe iyo inowobulawa mu mesho awo ngono autoija, donki iyo inowotogwa nge masimba mbeli kuko ngono aitowobuziwa kukuli, pkhwizi iyo inowopiwa zwita zwizo, ngono akutowobe ne mmwe kumubhatsha. 32Bakololo babo ne bakololokadzi babo banowopiwa bamwe bathu mesho awo akalinga zhuba ne zhuba ngono autowobe ne simba le kudziba ikoku. 33Ludzi gwausakatongoziba gowoja ntjelo we mavu awo na kose kwawakashinga, unowotshambilidzwa ukathukudziwa kuyendila mbeli 34kunothama kuti upengesiwe nge tjinowobe mesho awo etjibona. 35Yahwe banowokuloba mu zwidwi ne mu makumbo nge malonda anohwisa zogwadza ausingake ukapodziwa, kudwila kusi kwe matshambo kunoti ku thong'omana ye nsholo uwo.
36“Yahwe banokuzhisa, iwe na mambo uwo wawakabiga, ku ludzi gwausakatongo ziba na bobatategulu babo gwabasakatongo ziba, ngono ikoko unowoshingila midzimu mimwe ye lukuni ne ye mabgwe. 37Ngono unowobe tjinotjisa, ukabe thawu ne tjiyeye pakati kwe bathu bose Yahwe kwabakakutatila. 38Unowodzwala mbewu njinji mu nnda uwo, koga unowovuna kushomanana ngoti phashu dzowoja. 39Unowolima nnda we mizhambi ukayishakulila, koga autong'wa nkumbi wayo kene kuli kutjela zhambi muuli, ngoti makonye anodzija. 40Unowobe ne mitoba mu ntuthu wenyu wose, koga autowozhola mafuta ngoti thoba dzidzo dzowoshashamukila pasi. 41Unowana bakololo ne bakololokadzi, koga abatowobe babo, ngoti banowoyenda ku butapiwa. 42Miti iyo yose ne ntjelo we mavu awo kowobe kwe phashu. 43Nlubili upakati kwenyu unowokula kamupinda etathila pezhugwizhugwi, ngono imwi mowo buyila pasipasi. 44Unowokuadzima koga iwe autowon'adzima, unowobe nsholo, ngono iwe unowobe mwise. 45Bhiso lose ileli lowozha kukuli likakutobelela ngono likakukulila kuswikila walobesiwa ngoti usahwa hwi la Yahwe Ndzimu uwo ngekusalondolodza nlayo wabo wabakamupa. 46Lowobe tjilakidzo ne gaabadzo kukuli, lowobe ne mu bana babo nge kusingapele.
47“Ngekuti auzoshingila Yahwe Ndzimu uwo nge kushatha ne kushaladuka mu moyo nge kuwatshika kwe zwithu zose, 48ngono unowoshingila zwita zwizo Yahwe zwabanowotumila kubhayana nawe, unowozwishingila uli mu zhala ne nyota, uli mbujo kakale una zhala ye zwithu zose, ngono banowokutilika jokwi le butale mu ntshibha uwo kuswikila bekulobesa. 49Yahwe banowozhisa ludzi gunodwa kule kubhayana nawe, kudwa ku phelelo dze shango, bana lubilo se dzu liwuluka, ludzi gwe lulimi gwa usingahwe, 50ludzi gwakabangalala gusina hanya ne sholotjena kene kube ne ngoni kuba tjetjana. 51Banowoja bana be ng'ombe dzidzo ne ntjelo we mavu awo, kuswikila walobesiwa. Abatowokusiyila mathunde kene nkumbi we zhambi kene mafuta kene bana be ng'ombe dzidzo kene be ngubi iyo kuswikila bathama kuti mupelele. 52Banowokukomba nge ngwa mu mizi iyo yose kuswikila makuma e mizi iyo ye matizhilo yaunogalabgwe malefu akasima ewa mu shango iyo yose, banowokukomba nge ngwa mu mizi iyo yose mu shango iyo yose yamapiwa ndi Yahwe Ndzimu uwo. 53Ngono unowoja bana babo, unowoja nyama ye bakololo neye bakololokadzi babo ibo bawakapiwa ndi Yahwe Ndzimu uwo, unowobaja tjibaka tjaunowobe makakombiwa nge ngwa muli mu kudziyila kwamunowodziyidziwa nge zwita zwenyu. 54Nlume wakadzikama wakatebama mukuzwagwa kukwe pakati kwenyu unowonyima mwana wa tate babe zojiwa, kanyima nkadzi uwe waanoda ne bana babe batjatjila. 55Ndizo aana wabo waanowopa nyama ye bana babe yaanoja ngekuti aana yansalila mu kukombiwa nge ngwa ne mu kudziyidziwa kwamunowodziyidziwa ndiko nge zwita zwenyu mu mizi yenyu yose. 56#2 Bomambo 6:28, 29; Zwililo 4:10Nkadzi wakadzikama wakatebama mukuzwagwa kukwe pakati kwenyu, iye hwoyu usingake katshamba pasi nge gumbo lile ngekuti wakadzikama kakale wakatebama unowonyima nlume uwe waanoda zojiwa, kanyima nkololo uwe ne nkololokadzi uwe, 57unowobanyima mbeleko yakadwa mu tjibumbilo tjitje ne bana baakazwala ngoti unowobajila pakasumbikala nge zhala ye zwithu zose mu kukombiwa nge ngwa ikoku ne kudziyila kwamunodziyidziwa ndiko nge zwita zwenyu mu mizi yenyu.
58“Ha usina njele dze kushinga tjinolebgwa nge matama e nlayo iwoyu akakwagwa mu lukwalo igogu anoti utje zina ileli lina gudzo kakale lidzidzimusa la Yahwe Ndzimu uwo, 59ipapo Yahwe banowozhisa kukuli ne mu bana benyu kudziyidzika kukulu, kudziyidzika kusingapele ne njigwele dzinohwisa zogwadza dzinogalila tjose. 60Kakale banowozhisa mumuli njigwele dze Egipiti dzamakabe mutja ngono dzowomunamatila. 61Yahwe banowozhisabo ne bugwele gumwe ne gumwe ne kudziyidzika zwisakakwagwa mu lukwalo igogu gwe nlayo iwoyu, Yahwe banowozwizhisa mumuli kudzina malobesiwa. 62Mowoti makafanila kunga nyenyedzi dze zhuzhugwi nge bunji, mowosala mabe bashomanana ha mubagwa, ngoti amuzohwa hwi la Yahwe Ndzimu wenyu. 63Ngono sekwa kati Yahwe bakashathila kumuthamila bubuya bakamuwandisa, saikoko Yahwe banowoshathila kumuzhisila tjinomutjinya tjimulobesa ngono mowodusiwa mu shango iyeyi yamunongina kuithuwa. 64Ngono Yahwe banowomupaladza nge njudzi dzose, kudwa mu lubizho gwe shango kunoti ku gumwe lubizho, ngono ikoko mowoshingila midzimu mimwe ye lukuni neye mabgwe isakatongo zibgwa ndimwi kene ndi bobatategulu benyu. 65Ngono pakati kwe njudzi idzedzo amutowowana kudzikama, akutowobe ne kunyaluluka kwe makumbo enyu, koga ikoko Yahwe banowomupa moyo unotetema ne mesho asingabonesese ne meya yakanyala. 66Bupenyu gwenyu gowobe gwakabhakhwa nge kududumwa, siku ne sikati mowobe mulogwa nge hana, musina malebeswa ngekwe butjilo gwenyu. 67Mu mangwanana mowobe muti, ‘Ungati kungabe kuli madekwana.’ Ngono mu madekwana mowoti, ‘Ungati kungabe kuli mangwanana.’ Kuyikhwa nge hana inowotjisa moyo uwo nenge zwinowobe zwibong'wa nge mesho enyu. 68Yahwe banowokubgwiliza nge zwikepe ku Egipiti, gwendo gwandakagadzabgwe kuti usitongo gutola kakale, ngono ikoko unowozwipa kutengwa ku zwita zwizo se nlandalume ne nlandakadzi, koga akuna unowokutenga.”
Currently Selected:
Matama 28: KBTP
Highlight
Copy
Compare
Share
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
