Amosi 6
6
Kukolomodziwa kwe Iziraela
1Yee mme wee! Mapalala imwi mu gele makadzikama mu Ziyoni,
imwi munozwidwa muti makabakililika mu Dombo le Samariya,
imwi batungamili bakulu be itjaba tjikulu tje Iziraela,
imwi munokubunganigwa nge Baiziraela kubabhatsha.
2Imwi munoti, “Tjulukilani ku Kaline munobona,
kudwapo mupindile ku Hamati nzi nkulu,
mube mudelukila ku Gati nzi we Bafilisitiya.
Apa mizi mikulu iyeyi yakasima kupinda mibuso ye Juda ne Iziraela kene? Kene ntuthu wabo nkulu pana wenyu?”
3Imwi musingashake duma kuti zhuba le mbipo laswika,
koga musedzedza bushe gwe phipiti pejo.
4Yee mme wee! Mapalala imwi munolala mu malawo akanakisiwa nge nyanga dze zhowu, muzwikolola mu zwigalo zwenyu. Moja phkwizana dzakashalugwa ne zwikondolo zwakakodziwa. 5Molidza zwilidzo sa Dafite mu mba njimbo mulidza matende. 6Mong'wa nkumbi we zhambi nge mapepe makulu ali zhele, muzhola zwizholo zwe ntengo upezhugwi, koga musingahwisiwe zogwadza ngokolomodziwa kwe Iziraela. 7Ndizo wali mowobe bekutanga kutapiwa, mizano yenyu ye zojiwa ne kuzwikolola kwenyu kowopela.
8She Yahwe Masimbawose bakatuna nge zina labo beti, “Ndoshima kuzwikudza kwa Jakubo, alingila pasi mbako dzidze hwulu. Ndowoyisa nzi nkulu kose ne kumuuli ku zwita zwawo.”
9Ha kungasala bathu bali gumi mu nsha, na ibobo banowofa. 10Ha musenga itumbu mutjilulwamisila mbiganyo, gamu lenyu limu ng'umba lobhuzwa liti, “Kuna bamwe bangabe basala kene?”
Dabilo inowozha iti, “Aa.”
Ipapo gamu lowobe liti, “Nyalala, tisitongoleba ngekwe zina la Yahwe.”
11Bonani, Yahwe badusa ndaulo, ng'umba hwulu ikapkhwanyika ikasala ili magwada koga, ng'umba tukununu ikasala ili matjakatjaka. 12Apa mbizi dzingalabuka mu shongwe kene? Apa ng'ombe dzingalima mu shongwe kene? Koga makashandula lebeswa likabe nti unobulaya ne mbhayilo we ndulamo ukababa.
13Imwi munoshathila kukunda kwenyu Lodebhara, imwi munoti, “Apa atizokunda Karinayimu nge simba ledu kene?”
14Yahwe Ndzimu we mibunga bakati, “Ndowodzonga tjimwe itjaba kubhayana namwi Baiziraela. Tjowomudziyidza zila yose kudwa ku nkoba we Hamati kunoti ku nkuku we Araba.”
Kalanga Bible © Bible Society of Botswana, 2008, 2018.