Amosi 5
5
Shandukilani ku Ndzimu
1Ihwani matama awa andinoleba nge kwenyu, Baiziraela, ndimulilila.
2Wanyalala mwanadi Iziraela,
aangatjalebeleke kakale!
Ulele mu shango iye akalashiwa.
Akuna ungammusa.
3Etji nditjo tjinolebgwa ndi She Yahwe beti, “Nzi wadusa babhayani bali tjiwulu (1 000) mu Iziraela, kunobhayana unowosaligwa nge bali zana (100) ling'ompela, wadusa bali zana unosaligwa nge bali gumi koga.”
4Etji nditjo tjinolebgwa ndi Yahwe ku Baiziraela beti, “Izhani kundili mutjile. 5Musiyende ku Bhetele, musingine mu Giligala, kene kuli ku Bheerisheba, ngoti Giligala unowotapiwa, Bhetele unowolobesiwa.” 6Izhani kuna Yahwe mutjile, kusajalo banowozha bepisa pisa Iziraela se bhuba le moto, moto iwoyo unowopisabo Bhetele ngono akuna unowoudzima. 7Imwi munoshandula lebeswa likababa, mukalashila ndulamo kutjena.
8 #
Jobe 9:9; 38:31 Ibo bakathama nyenyedzi dze Tjiyendan'gwi ne dze Ngulube,
banoshandula zhalima lakatizwititi likabe mangwanana,
bakashandula masikati bakaathama busiku.
Ibo banodana vula dze gungwa bakadzitebulila mu shango.
Yahwe ndilo zina labo,
9ibo banolobesa bakasima,
bakakolomodza matizhilo akasima.
10Imwi munobenga iye unotjemela pa lubazhe, mukashima banoleba malebeswa, 11se mutshamba bashayi mukabatolela mathunde, kene makabaka ng'umba dze mamo nge mabgwe akabezhiwa, amutowogala mudzili. Kene mukalima minda ye mizhambi yakanaka, amutowong'wa nkumbi yayo. 12Ngoti ndoziba kuti matjinyo enyu mangana ne kuti zwibi zwenyu zwingapani. Imwi munodziyidza balulwami, mukatengwa, mukalambila bashayi lebeswa lakabalingisana mu mabazhe. 13Ipapo ntjenjedu unowonyalala mu tjibaka itjetjo, ngoti tjibaka tjakabipa.
14Shingani ndulamo, musithame mbipo, ndizo mutjile. Ipapo Yahwe Ndzimu Masimbawose banowobe namwi sekwa munoleba. 15Bengani mbipo, mude ndulamo, mulondolodze lebeswa mu mabazhe, pamwe Yahwe Ndzimu Masimbawose banowohwila ngoni malimbelimbe e Iziraela.
16Ndizo She Ndzimu Masimbawose, Yahwe bakati, “Kowobe ne guwo mu zila dzose ne zwililo zwinogwadza mu mashanganilo. Balimi banowodanigwa kulila, ne nyambi dze balili mu njifu dzikadanigwa kukuwa guwo. 17Kowobe ne guwo mu minda yose ye mizhambi ngoti ndowomuloba shamu.” Koleba Yahwe. 18Yee mme wee! Mapalala imwi munoshuba zhuba la Yahwe! Molishubilani zhuba la Yahwe kene? Zhuba ilelo lowobe zhalima, alitowobe tjedza. 19Kowonga nthu unotizha shumba, ebe eshangana ne nyati, kene se nthu wangina mu ng'umba ebe enayila guma nge luboko nyoka ibe in'luma. 20Apa zhuba la Yahwe alitowobe zhalima lisina tjedza, lakati zwititi lisina njemu kene?
21 #
Isaya 1:11-14
Ndobenga mizano yenyu ye kunamata, ndoyilingila pasi, andingamilane ne mishangano yenyu. 22Kene mungandipa zwibhayilo zwinopisiwa, nenge zwe mathunde, andingazwiamutjile. Kene mungazhisa zwibhayilo zwe phuka dzenyu dzakakodziwa, zwe mbakiso andingazwiyele njele. 23Nyaladzani zhoba ye njimbo dzenyu pandili, andingahwilile milidzo ye zwilidzo zwenyu. 24Koga lebeswa ngaliwunge se vula, ndulamo iwunge se gwizi gusingapinde.
25 #
Mishingo 7:42, 43 Apa makandipa zwibhayilo ne zwipo mu makole ali makumi manna, muli mu tjilambanyika kene, imwi Baiziraela? 26Makasenga Sakuti mambo wenyu na Kaiwani ndzimwana wenyu we nyenyedzi, zwifano zwamakazwithamigwa. 27Ndizo ndowothama kuti mutapigwe ndiyeno kwe Damasiko. Koleba Yahwe we zina linoyi Ndzimu Masimbawose.
Kalanga Bible © Bible Society of Botswana, 2008, 2018.