2 Timoti 2
2
Mbhayani Kirisiti Jesu we malebeswa
1Ndizo iwe nkololo wangu, sima mu ngoni dzimuna Kirisiti Jesu, 2ne muna zwawakandihwa ndileba mbeli kwe batendeki banjinji, uzwipe balume banogalikabgwe banowotubula kudiya bamwe.
3Dzikitadzila kudziyila se mbhayani wakalulwama wa Kirisiti Jesu. 4Akuna mbhayani umu nshingo unonginikana nge zwithu zwe bathu basi babhayani, ngekuti mazwimisilo awe hwushathisa iye wan'danila ngwa. 5Tjilabuki atjitoambadziwa tjiala kuzhe kwe tjapedza labuka kuyendidzana nge milayo ye labuka. 6Nlimi unoshinga kwazo ndiye wakafanila wana kutanga gobe le zwijo. 7Ukumbule kwazo tjandinoleba, ngobe She banowokupa hwisiso ye tjimwe ne tjimwe.
8Alakana Jesu Kirisiti, kuti wakamuka mu bafi, iye tjizekugwana tja Dafite sekwa ndinosumikila mu ndebo mbuya yangu, 9ndebo mbuya yandinodziyilila kwandinodzina asungwa nge ketani se tjigebeng'a. Koga dama le Ndzimu alizosungwa nge ketani. 10Ndizo ndodzikitadzila tjimwe ne tjimwe ngekwe bashalugwa kuti ndizo na ibobo bawane jidzo li muna Kirisiti Jesu ne gudzo lalo lisingapele. 11Eyi ndebo malebeswa,
“Ha takafa naye,
towotjilabo naye.
12 #
Matewu 10:33; Luke 12:9 Ha tidzikitadza,
towobusabo naye.
Ha tinzwilandula,
unowotizwilandulabo.
13Ha tisina kugalikabgwe,
iye unowobe ne kugalikabgwe koga,
ngobe aangazwilandule.”
Nshingi wakaamutjigwa
14Ubakumbuludze zwithu izwezwi. Ubatjemelele mbeli kwe Ndzimu kukangazhana ngekwe matama, akuna nshingo, koga kobulaya ibabo bakahwilila. 15Gwisa kwazo kuzwilakidza mbeli kwe Ndzimu se wakaamutjigwa, uli nshingi usingawoti kabhakhwa nge shoni, unobhata zubuyanana dama le malebeswa. 16Uzwiduse mu ndebgwana dzisina bundzimu, ngobe dzowokwebela bathu kule ne Ndzimu. 17Kudiya kwabo kowonyikishila se londa lisingapole, mubali kuli Himeneo na Fileto 18ibo bakapambuka mu malebeswa ngobhatilila mukuti kumuka kwe bafi kwakapinda kale, ngono banobulaya kugalamoyo kwe bamwe. 19#Mbalo 16:5Koga, thiwa ye Ndzimu yakasima aitozunguzika, muili kwakakwagwa matama awa, “She banoziba bathu babo,” ngono, “Iye unodana zina la She wakafanila kufupatila bubi.”
20Mu ng'umba hwulu kuna zwithu zwisi zwe golide ne siliva koga, kuna zwakathamwa nge lukuni ne ntapkhwi, zwimwe zwakathamigwa mishingo inokudziwa zwimwe isingakudziwe. 21Ha nthu ezwitjenapadzila mishingo isingakudziwe, unowobe tjishingisiwa tje mishingo inokudziwa, eyengemadziwa, ana bhatsho kuna botetshi be ng'umba, kakale akalulwamila kushingisigwa nshingo wakalulwama. 22Utjile kule njemulo mbi dze buzhuzha koga uzwimisile ndulamo ne kugalamoyo ne ludo ne kunyalala kang'ompela na ibabo banonamata She nge moyo wakatjena. 23Ube kutjena ne kukangazhana kwe bulengwe gwe kushaya luzibo, ngobe unoziba kuti kozhisa zhoba. 24Nlanda wa She aazofanila kube nthu we zhoba, koga wakafanila kube ne buthu ku mmwe ne mmwe, etubula kudiya ana moyonlefu, 25etjemela banonnyanyayidza nge bunyolo, pamwe swiyo Ndzimu ungabapa kushandukila matjinyo abo bakapelela baziba malebeswa, 26ndizo bakapudzumuka mu dati la Satani iye wakabathama basungwa mu kulondolodza kuda kukwe.
Kalanga Bible © Bible Society of Botswana, 2008, 2018.