2 Timoti 1
1
1Ndimi Paulo ntumwa wa Kirisiti Jesu nge kuda kwe Ndzimu, kuyendidzana nge kugadzabgwe kwe butjilo gumuna Kirisiti Jesu.
2 #
Mishingo 16:1
Kuna Timoti nkololo wangu unodika.
Ngoni ne mahwilo zogwadza ne kunyalala kunodwa ku Ndzimu Tate na Kirisiti Jesu She wedu ngakube nawe.
Kutenda ne kulumbidza
3Ndotenda Ndzimu, iwo wandinoshingila nge hana mbuyanana sa bobatategulu bangu bakabe beushingila, ndimukumbula misi yose mu mitembezelo yangu. 4Ha ndikumbula mishodzi iyo, ndoyemula siku ne sikati kukubona kuti ndizo ndizhale kushatha. 5#Mishingo 16:1Ndoalakana kugalamoyo kuko kwakwako, kugalamoyo kwakabe kuli muna kuku babo Loisi kutanga, na mmeyabo Yunisi, koga ngwenu ndina malebeswa ekuti kwabe mukuli. 6Ndizo ngekwa ikoku ndikualakanisa kuti uthutidze tjipo tje Ndzimu tjimukuli nge kukubiga maboko kwangu. 7Ngobe Ndzimu auzotipa meya ye bugwala koga wakatipa meya ye simba neye ludo neye kuzwiibhata.
8Ndizo usibhakhwe nge shoni kuleba ngekwa She wedu, kene nge kwangu imi nsungwa ngekukwe. Koga bhatana nami mu kudziyilila ndebo mbuya, nge simba la She, 9ibo bakatitjidza bakatidanila ku butjilo gwakayengemala, kusi ngekwe tjimwe tjatakashinga koga ngekwe mazwimisilo awo ne ngoni dzawakatipa muna Kirisiti Jesu ntolo tjose, 10koga ngwenu kwakazumbunugwa nge kuzha kwe Ntjidzi wedu, Kirisiti Jesu, iye wakakolomola simba le lufu ngono kazhisa butjilo nenge kusafa pa tjedza nge ndebo mbuya.
11 #
1 Timoti 2:7
Ngekwe ndebo mbuya iyeyi ndakashalugwa kube nsumikili ne kube ntumwa nenge kube n'diyi. 12Ndizo ndidziyila sekwa ndinodziyila. Koga anditobhakhwa nge shoni, ngobe ndoziba wandakagalamoyo munli, ngoti ndina lebeswa lekuti unotubula kulisa tjandakapiwa mu maboko angu#1:12 tjandakapiwa…angu: Kene “tjandakampa mu maboko awe.” kuswikila Zhuba ilelo. 13Tjawakahwa ndimi, utjibhate tjili tjilakidzilo tje kudiya kwakwako, mu kugalamoyo kose ne mu ludo zwimuna Kirisiti Jesu. 14Tjengeta lebeswa lawakapiwa nge Meya yakayengemala inogala mutili.
15Unoziba kuti bose bamu ntuthu we Ezhiya bakandifupatila, ngono mubali kuli Figelo na Hemogenesi. 16Dzene She angahwila zogwadza be nsha wa Onesiforo, ngobe kanjinji wakandisimisa kakale aazobhatisiwa shoni nge ketani dzakandisunga, 17koga wakati eswika ku Roma, kandishaka kwazo kadzina kandiwana. 18Dzene She banganhwila zogwadza mu Zhuba ilelo! Kakale unoziba zubuyanana kuti wakabhatsha kungapani ku Efeso.
Kalanga Bible © Bible Society of Botswana, 2008, 2018.