2 Bomambo 3
3
Ngwa pakati kwe Iziraela ne Moabu
1Mu gole lebugumi lina ali zhanalume la Jehoshafati mambo we Juda, Joramu nkololo wa Ahabu kabe mambo we Iziraela mu Samariya, ngono kabusa makole ali gumi lina mabili. 2Wakathama mbipo mu mesho a Yahwe, nenguba asakathama kunonga kwa tate babe na mme babe ngoti wakaliga phanda dza Bhaale dzakabe dzathamwa ndi tate babe. 3Nenguba kwakajalo, wakanamatila zwibi zwa Jeroboamu nkololo wa Nebati, wakathama Iziraela kuti itjinye, aazotongo thubukana nazo.
4Ngono Mesha mambo we Moabu wakabe ali nthuwi we pkhwizi, wakabe epa mambo we Iziraela gole ne gole pkhwizana dzili zwiwulu zwili zana (100 000), nenge wulu ye nyundo dzili zwiwulu zwili zana (100 000). 5Koga kwakati Ahabu afa, mambo we Moabu kapandukila mambo we Iziraela. 6Ndizo Mambo Jehoramu kabhuda mu Samariya nge tjibaka itjetjo ngono kakubunganya Iziraela yose. 7Ngono katumila ndayidzo kuna Jehoshafati mambo we Juda eti, “Mambo we Moabu wandipandukila, apa unowoyenda nami kunobhayana naye kene?” Ngono kashandula eti, “Ndowoyenda nawe, ndonga iwe, ne bathu bangu banonga babo, ne mbizi dzangu dzonga dzidzo.” 8Kabe eti, “Towoyenda nge zila ipi?” Jehoramu kadabila eti, “Nge zila ye tjilambanyika tje Edomu.” 9Ndizo mambo we Iziraela kayenda na mambo we Juda na mambo we Edomu. Bakati basinopoteleka kwe mazhuba ali kutendeka, kukasheteka vula ye ngwa neye zwithuwo zwabakabe banazo. 10Mambo we Iziraela kabe eti, “Yee mme wee, ilikuti Yahwe bakubunganya bomambo ibaba batatu kubalonga mu maboko e Moabu kene?” 11Koga Jehoshafati kati, “Apa akuna nlebesambeli wa Yahwe ipapa watingabhuzwa kuna Yahwe ndiye kene?” Ipapo mmwe we balanda ba mambo we Iziraela kashandula eti, “Elisha nkololo wa Shafati uyapo, iye wakabe e ngudza Elija maboko.” 12Jehoshafati kati, “Dama la Yahwe linaye.” Ndizo mambo we Iziraela na Jehoshafati na mambo we Edomu bakayenda kunli. 13Ngono Elisha kadwa mambo we Iziraela kati, “Apa ndineni nawe kene? Yenda ku balebesambeli ba tate babo neku balebesambeli ba mmeyabo.” Ngono mambo we Iziraela kandwa kati, “Aa, ngoti ndi Yahwe bashanganya bomambo ibaba batatu kubalonga mu maboko e Moabu.” 14Elisha kati, “Ndotuna na Yahwe Masimbawose banotjila, ibo bandinoshingila nditi, ha kwabe ilikuti andina hanya na Jehoshafati mambo we Juda, ndabe ndisowokulinga kene iko kukubona. 15Ndizo ngwenu mundizhisileni n'lidzi.” Kwakati n'lidzi elidza, simba la Yahwe likabuya muna Elisha. 16Ngono kati, “Tjinoleba Yahwe ndi etji, ‘Thama nkuku iwoyu uzhale makomba.’ 17Ngoti etji nditjo tjinoleba Yahwe, ‘Amutowobona phepo kene vula, koga nkuku iwoyu unowozhala vula ngono imwi ne ng'ombe dzenyu ne zwithuwo zwenyu mowong'wa.’ 18Ikoku tjithu tjilelulelu mu mesho a Yahwe, kakale banowolongabo Bamoabu mu maboko awo. 19Mowokunda nzi nkulu mmwe ne mmwe we matizhilo ne nzi mmwe ne mmwe wakashalugwa. Mowotema nti mmwe ne mmwe wakanaka mukamisa mikukwana yose kuti isiwunge, mukatjinya nnda mmwe ne mmwe wakanaka nge mabgwe.” 20Kwakati tjimuka mangwanana, kuli tjibaka tje kupa tjipo tje tjibhayilo, bonani, vula ika wunga idwa tjeku Edomu, kudzina shango izhala vula. 21Kwakati Bamoabu bose behwa kuti bomambo babuya kuwobhayana nabo, bose bakabe betubula kuambala zwiambalo zwe ngwa kudwa mu ntjetjana kunoti mu hwola, bakanobigwa pa n'gathu. 22Ngono bakati bemuka mangwanana, zhuba lakabe lipenya mu vula. Bamoabu bakabona vula kulingisana nabo ili shaba se malopa. 23Ngono bakati, “Ikoku malopa, bomambo ba bhayana nge kwabo bakabulayana. Ngono ngwenu, Moabu katape.” 24Koga bakati beswika ku makotokelo e Iziraela, Baiziraela bakamilika bakabanginilila kudzina betizha. Ngono Baiziraela bakangina mu shango ye Moabu bakababulaya. 25Bakalobesa mizi mikulu, ngono nlume mmwe ne mmwe kalashila bgwe mu nnda mmwe ne mmwe wakanaka kuswikila uzhala, bakamisa mikukwana yose ye vula, bakatema nti mmwe ne mmwe wakanaka. Ngono bakati beswika ku nzi nkulu we Kirihariseti bakausiya ne mabgwe awo, ngono balume bezwivirimabgwe bakaunginilila bakaukunda. 26Kwakati mambo we Moabu ebona kuti ngwa inonkulila katola balume bali mazana ali kutendeka (700) banoziba shingisa thumo kuti banothukila kuna mambo we Edomu ngono bakakong'wa. 27Ipapo katola nkololo uwe we mbano, iye wakabe akafanila kun'gala thaka, kandusa kuli tjibhayilo tjinopisiwa pezhugwi kwe guma. Ngono Baiziraela bakagwadzamoyo kukulu, bakabhuda pa nli, bakabgwilila kushango yabo.
Kalanga Bible © Bible Society of Botswana, 2008, 2018.