2 Bomambo 2
2
Elija unotolegwa pezhugwi kudzimu
1Kwakati Yahwe batjibe pejo ngotolela Elija pezhugwi kudzimu nge tjampupudze, Elija na Elisha bakabe bali muzila bedwa ku Giligala. 2Ngono Elija kati kuna Elisha, “Gala ipapa, ndokukumbila, ngobe Yahwe bandituma ku Bhetele.” Ngono Elisha kati, “Ndotuna na Yahwe banotjila kose nawe nditi, andingakusiye.” Bakadelukila ku Bhetele. 3Badiyiwana be balebesambeli bakabe bali mu Bhetele bakazha kuna Elisha ngono bakati kunli, “Apa moziba kuti nasi Yahwe banowomutolela tetshi wenyu kene?” Elisha kashandula eti, “Ee ndoziba, koga nyalalani.”
4Elija kandwa kati, “Elisha gala ipapa, ndokukumbila, ngobe Yahwe bandituma ku Jerikho.” Ngono kashandula eti, “Ndotuna na Yahwe banotjila kose nawe nditi, Andingakusiye.” Ndizo bakayenda ku Jerikho. 5Badiyiwana be balebesambeli bakabe bali ku Jerikho bakasedzela kuna Elisha bakandwa bakati, “Apa moziba kuti nasi Yahwe banowomutolela tetshi wenyu kene?” Ngono kashandula eti, “Ee ndoziba koga nyalalani.” 6Ipapo Elija kati kunli, “Gala ipapa, ndokukumbila, ngobe Yahwe bandituma ku Jorodani.” Koga kashandula eti, “Ndotuna na Yahwe banotjila kose nawe nditi, andingakusiye.” Ndizo bubili gwabo bakayenda. 7Balume bali makumi mashanu (50), bali badiyiwana be balebesambeli bakayenda bakama tjakulenyana nabo, ibo bubili gwabo balimile pa Jorodani. 8Ipapo Elija katola hazu iye kaipomba ngono kaloba vula nayo, vula ikathubukana, imwe ikabe ku ndzibo mmwe, imwe ikabe ku mmwe, ngono bubili gwabo bakatjuluka na pasi pakawoma.
9 #
Matama 21:17
Kwakati batjitjuluka, Elija kadwa Elisha kati, “Kumbila tjaunoshaka ndikuthamila ndisathu atogwa pakuli.” Elisha kashandula eti, “Ndokukumbila, meya iyo ngaipaphiwe kabili mundili.” 10Ngono kati, “Wakumbila tjithu tjakasima seni, ngono nenguba kwakajalo ha ungandibona pandinowobe nditogwa pakuli, kowoshingikala kujalo mukuli, koga ha usingandibone akutowoshingikala kuijalo.” 11Koga kwakati batjayenda belebeleka, bona, kukazha koloyi ye moto ne mbizi dze moto ngono dzikabathubukanya bubili gwabo, ngono Elija kayenda pezhugwi kudzimu nge tjampupudze. 12#2 Bomambo 13:14Elisha kabona ngono kalila kati, “Tate bangu, tate bangu, koloyi dze Iziraela ne bataswi badzo.” Ngono kasitjambone kakale. Ipapo kabhata zwiambalo zwizwe kazwipalula kabili. 13Ngono katola hazu ya Elija yakabe yawa munli, kashanduka kama pa phili ye Jorodani. 14Ipapo katola hazu yakabe yawa muna Elija, kaloba vula nayo eti, “Bangayi Yahwe, Ndzimu wa Elija?” Ngono kati asinoloba vula, vula ikathubukana imwe ku ndzibo mmwe imwe ku ndzibo mmwe, ndizo Elisha katjuluka. 15Badiyiwana be balebesambeli be Jerikho bakabe bakalingilila bakati, “Meya ya Elija igele muna Elisha.” Ngono bakayenda kunonshanganidza, ngono bakathigama pasi mbeli kukwe. 16Ngono bakandwa bakati, “Bona, iswi balanda babo ti balume bakasima bali makumi mashanu (50), tokumbila tiyende tinoshaka tetshi uwo, pamwe meya ya Yahwe yantola ikanonlashila ku limwe le matombo kene ku mmwe nkuku.” Ngono kati, “Musiyende.” 17Koga bakankwekweredza kudzina e bhakhwa nge shoni, ngono kati, “Yendani.” Ndizo bakatuma balume bali makumi mashanu, ngono bakanshaka kwe mazhuba matatu koga bakasimbone. 18Ngono bakabgwilila kunli atjigele mu Jerikho, kati kubali, “Apa andizomubudza kuti musiyende kene?”
Matjenamiso a Elisha
19Ipapo balume be nzi nkulu bakati kuna Elisha, “Bonani, tetshi wedu, nzi nkulu iwoyu ugele zwakanaka sekwa munobona, koga vula ayitozipa kose ne shango ayitodusa zojiwa.” 20Kabe eti, “Mundizhisile ndilo tshwa, mulonge mwenyu muili.” Ndizo bakaizhisa kunli. 21Ipapo kayenda ku nsenya we vula kalashila mwenyu muuli, kati, “Tjinoleba Yahwe etji, ‘Ndalapa vula iyeyi, akutjowobe ne lufu kene kusawana zwizwalo kunowobhuda muili.’ ” 22Ndizo vula ikapola kuswikila zhuba la nasi, kuyendidzana nge dama lakalebgwa ndi Elisha. 23Kudwa ipapo Elisha katathila ku Bhetele. Wakati atja yenda ali muzila, kukabhuda balisana mu nzi nkulu benkuwelela beti, “Yenda woko ne bhalo! Yenda woko ne bhalo!” 24Ngono katjebuka, kati ebabona kabalonga bhiso mu zina la Yahwe. Ndizo kukabhuda bhira hadzi mbili mu ishaka dzikapalulanya balisana bali makumi manna ana babili (42). 25Kudwa ipapo kayenda ku Dombo le Karimeli, kwakati shule kabgwilila ku Samariya.
Kalanga Bible © Bible Society of Botswana, 2008, 2018.