2 Bakorinta 9
9
Bhatsho ku Bakirisiti bamwe
1Akutosheteka kuti ndimukwalile ngekwe nshingo we kupa bayengemali zwipo, 2ngobe ndoziba kuda kwenyu, ngono ndozwikudza nge kwenyu ku bathu be Makedoniya. Nditi, “Zwikamu mu Akaiya zwakazwilulwamisila kubhatsha kudwila makenyi.” Kumusa meya kwenyu kwakamusa bunji gwabo. 3Koga ndotuma zwikamu, kuti ndizo kuzwikudza kwedu nge kwenyu kusitongobe kwe suli muna ikoku. Koga kuti ndizo mube makazwilulwamisa sekwa ndakati mowobe makazwilulwamisa. 4Ha kungabe ne bamwe banodwa ku Makedoniya bangazha nami bebe bewana musakazwilulwamisa, tingabhakhwa nge shoni seni, koga imwi mungabhakhwa nge shoni kupindisa nenguba kuna kuzwikudza kwakajali. 5Ndizo ndawana kwakalingisana kukulumbidza zwikamu izwezwi kuzha kumuli kunditangila kuti balulwamisile mbeli kwe tjibaka tjipo itjetji tjamakagadzabgwe. Ipapo tjowobe tjakalulwama ha ndiswika, ngono tjisi tjamakombeledzwa koga tjili tjipo tjamapa nge moyo ntjena.
6Kumbulani woku: Ani kene ani unodzwala kutukununu unowovuna kutukununubo, koga iye unodzwala kunjinji unowovuna kunjinji. 7Mmwe ne mmwe wakafanila ape sekwa ada asingazeyeze kene asingakombeledziwe, ngobe Ndzimu unoda nthu unopa akashatha. 8Kakale Ndzimu unotubula kumupa tjipo tjimwe ne tjimwe nge buzhalo, kuti ndizo misi yose mube muna tjimwe ne tjimwe tjakaswika, mutubule kupana nge buzhalo mu nshingo mmwe ne mmwe wakalulwama. 9#Njimbo 112:9Sekwa kwakakwagwa kuyi,
“Unoandamisa, unopa bashayi,
ndulamo iye aitopela.”
10 #
Isaya 55:10
Iye unopa ndzwali mbewu ne tjiwunga kuja unowomupa kawandisa mbewu yenyu ngono kawatsha mbuzilo ye ndulamo.#9:10 ndulamo: kene “bathu.” 11Mowofumisiwa nge zila dzose kuti ndizo mupane nge sununguko hwulu ndizo bunjinji gowoboka Ndzimu ngekwe zwipo zwenyu zwabanoamutjila mutili. 12Ngobe nshingo iwoyu wamunoshinga autobhatsha kusheta kwe bayengemali koga, koga unopinda ukazhisa kuboka kukulu ku Ndzimu. 13Nshingo wenyu iwoyu unowolakidza meya yenyu ye Tjikirisiti, bamwe banjinji banowokudza Ndzimu ngekwe kuhwa ndebo mbuya ya Kirisiti, iyo yamunoleba ne kupana kwenyu kukulu ku bali ne ku bamwe bose. 14Ngono banowomutembezelela bakamushuba ngekwe ngoni dze Ndzimu hwulu mu muli. 15Ngakutendiwe Ndzimu ngekwe tjipo tjawo tjisina themba.
Kalanga Bible © Bible Society of Botswana, 2008, 2018.