2 Bakorinta 10
10
Paulo unozwilebelekela ngekwe tjaali itjo mu butumwa gugwe
1Imi Paulo, nge kwangu ndomukumbila nge kuzwiyisa pasi nenge buthu gwa Kirisiti, imi ndinoyi ndigwala ha ndakalingisana namwi, koga ndakasimamoyo ha ndili kule namwi. 2Ndomukumbila kuti musithame kuti ndisisime moyo sekwa ndakazwimisila nge buzhalo, kuna ibabo banotialakanila kuti tozwibhata nge mazwiibhato e shango. 3Nenguba tigala mu shango atitogwa ngwa ye shango, 4ngobe zwibhayano zwatinogwa ndizo ate zwibhayano zwe shango, koga zwina simba lakayengemala kulobesa matizhilo akasima. 5Tokolomola kukakabadzana kose, ne kuzwikudza kumwe ne kumwe kunodzinganyidza zibo ye Ndzimu, tikasunga nkumbulo mmwe ne mmwe kuti uhwe Kirisiti. 6Ngono towobe takazwilulwamisila kuloba shamu kusahwa kumwe ne kumwe, ha kuhwa kwenyu kwapelela.
7Imwi lingani zwi mbeli kwe mesho enyu. Ha mmwe egalabgwe kuti nge wa Kirisiti, ngaazwikumbuludze kuti iswi ti Bakirisitibo. 8Nenguba ndizwikudza kupindisa ngekwe ndaulo yedu iyo She yabakatipa kumubaka koga kusi kumukolomola, anditowoibhatigwa nge shoni. 9Anditoshaka kuti kulingike ndinga ndinoshaka kumupalusamoyo nge hwalo dzangu. 10Bamwe banoti, “Hwalo dzidze dzolema, dzakasima, koga iye nge kukwe aali pano nlelu lelu, zwilebo zwizwe ate zwili tjimwe.” 11Bathu bakajalo ngabazibe kuti tjatinoleba nge lukwalo tisipo, nditjo tjatinowothama ha tili yapo.
12Iswi atizozwilizanya kene kuli kuzwifananya na ibabo banozwikudza. Koga ha mmwe ezwifananya nge mmwe, ngono mmwe ezwiyelesedza ne mmwe pakati kwenyu, kodwa kuti abatohwisisa. 13Koga iswi atingazwikudze kupinda tjilizanyo, towoma mu tjilizanyo tjatakapiwa nge Ndzimu, kushinga namwi na iko kuli mukatibo. 14Takabe tisingapindilile mu tjilizanyo tjedu patakazha kumuli, ngobe ndiswi bekutanga kuzhisa ndebo mbuya ya Kirisiti kumuli. 15Atitozwikudza kwakapindilila nge mishingo ye bamwe bathu, i kuzhe kwe tjilizanyo tjedu, koga kugalabgwe kwedu hwuti se kugalamoyo kwenyu kukula, nshingo wedu pakati kwenyu unowokula kwazo. 16Kuti ndizo tisumikile ndebo mbuya mu shango dzimwe dzi mbeli kwe yenyu tisingazwikudze nge nshingo wakashingwa kale mu nnda we mmwe nthu.
17 #
Jeremiya 9:24
Koga “Iye unoshaka kuzwikudza ngaazwikudze nge tjakashingwa ndi She.” 18Ngobe nthu unozwikudza ate iye unoamutjigwa, koga nthu unokudziwa ndi She ndiye unoamutjigwa.
Kalanga Bible © Bible Society of Botswana, 2008, 2018.