2 Bakorinta 7
7
1Setina kugadziwabgwe ikoku, badiwa, ngatizwitjenapadzeni mu tjimwe ne tjimwe tjinotemapadza mbili ne meya, ngono tibe nge buyengemali guzhele mu kutja Ndzimu.
Paulo unoshathila kushanduka kwe gubungano
2Mutizhulile mimoyo yenyu. Atina watakatjinyila, atina watakatenga, atina watakatjebela. 3Anditoleba ikoku kumubona nlandu, ngobe ndakaleba kuli kale kuti mu mimoyo yedu tinako, kuti tife tose nenge kuti titjile tose. 4Ndomugalabgwe kwazo. Ndina kuzwikudza kukulu mu muli. Ndizhele kunyaladzika. Mu kudziyidzika kwedu kose, ndina kushatha kunjisa.
5 #
2 Bakorinta 2:13
Ne patakazha mu Makedoniya, mibili yedu aizotongobe ne kunyaluluka, koga takabe takalingisana nge mang'oni wose, tikweba kwebana ne zwita zwedu, tidzulana ngotja mukati kwedu. 6Koga Ndzimu iwo unonyaladza bakanyala mikumbulo, wakatinyaladza ngozha kwa Tito. 7Ate kuzha kukwe koga kwakatinyaladza, koga nenge nyaladzo yamakan'nyaladza ndiyo. Wakatibudza sekwa makandishuba ne sekwa munogwadzika ndiko ne sekwa munondida ndiko, ngono ndizo ndakashatha kupindisa.
8Nenguba lukwalo gwangu gwakamugwadza anditozwisola, nenguba ndakatongo zwisola, ngobe ndobona kuti lukwalo igogo gwakamulonga buyendasi, nenguba kwakabe kwe tjibaka tjifutshwanana. 9Sekwa kuli iko, ndoshatha, koga ndisingashathisiwe nge kuti makagwadzika, koga nge kuti kugwadzika kwenyu kwakamuthama kuti mushandukile matjinyo enyu. Gwadzika ikoku kwakashingisiwa nge Ndzimu, kuti ndizo kube kusina tjimwe tjakabipa tjatakamuthama. 10Gwadzika kunolaugwa nge Ndzimu kozhisa kushandukila matjinyo kunoyisa ku jidzo, akutozhisa kupunamoyo, koga gwadzika kwe shango kozhisa lufu. 11Bonani kuti gwadzika kwenyu kwakamubuzila kutukutila kwakatini, kuzwimisila kulakidza ha musi nlandu, kugwadzamoyo, kulobgwa nge hana, kushuba, ludo ne kuloba shamu. Mazwilakidza amusi nlandu mu tjimwe ne tjimwe ngekwa ikoku.
12Ndizo nenguba ndakamukwalila, kwakabe kusi ngekwe wakatjinya kene wakatjinyigwa, koga kwakabe kuli kuti, kutitukutilila nge kutida kwenyu kuzumbunugwe kumuli mu mesho e Ndzimu. 13Ndizo takanyaladzika.
Pezhugwi kwe kunyaladzika kwedu takashathila kwazo kushatha kwa Tito, ngobe meya iye yakashathisiwa ndimwi mose. 14Ndakazwikudza nge kwenyu kunli, ngono imwi amuzondibhatisa shoni. Takamubudza malebeswa misi yose, ngono kuzwikudza kwedu kuna Tito kwakajalobo, kwakalakidza kuti ku malebeswa. 15Ngono ludo gugwe gwaanomuda ndigo gokula, ha ekumbula kuhwa kwenyu mose ne kutja ne kutetema kwamakan'amutjila ndiko. 16Ndoshatha, ngobe ndina kugalabgwe kuzhele mu muli.
Kalanga Bible © Bible Society of Botswana, 2008, 2018.