2 Bakorinta 6
6
1Tili bashingi ne Ndzimu, tomukumbila kuti musiamutjilile ngoni dze Ndzimu suli, 2#Isaya 49:8ngobe Ndzimu ukati,
“Nge tjibaka tjakalingisana ndakamuhwa,
ngono amubhatsha mu zhuba le kutjidziwa.”
Bonani, ngwenu nditjo tjibaka tjakalingisana, bonani ngwenu ndilo zhuba le jidzo.
3Atina watinobigila tjikuthi mu zila iye, kuti ndizo kusiwang'we nlandu mu nshingo wedu. 4Koga se balanda be Ndzimu tozwikudza mu zila imwe ne imwe nge kudzikitadzila kudziyila, mu mang'oni nenge mu manikano. 5#Mishingo 16:23Tolobgwa tikalongwa mu ng'umba dze busungwa, tikabe mu phipiti, tikashinga kunolema, tikasibone hwope, tikafa nge zhala. 6Nge bubuyanana gwedu ne zibo ne moyonlefu ne buthu ne Meya yakayengemala ne ludo gwakwako, 7ne ndebo ye malebeswa ne simba le Ndzimu ne zwibhayano zwe ndulamo, tjimwe tjibhayano tje luboko gwe luji, tjimwe tje luboko gwe lumeshwe, 8mu kukudziwa ne mu kusakudziwa, mu kulebgwa zubuyanana ne mu kulebgwa zwakabipa. Tobhakhwa se batjengedzi, koga iswi tili mu malebeswa, 9tobhakhwa se tisingazibgwe, koga iswi tizibgwa zubuyanana, totogwa se bakafa, koga bonani, iswi totjila. Nenguba tilobgwa shamu atithutabulawa, 10nenguba tina buyendasi, misi yose takashatha. Tonga bashayi, koga tothama banjinji kuti babe bafumi. Tonga tisina tjatinatjo, koga tina zwithu zose.
11Bakorinta, takalebeleka namwi takashaladuka. 12Ate kuli kuti ludo gwedu kumuli gushomanana koga imwi ndimwi musingatide nge buzhalo. 13Ndolebeleka se ndinolebeleka ne bana bangu nditi, mutizhulile mimoyo yenyu sekwa takamuzhulila yedu.
Tjenjelelani basi bagalimoyo
14Musikwebe nge jokwi ling'ompela ne basingagalemoyo. Ngobe apa ndulamo ne mbipo zwina bukhwinya poni kene? Kene tjedza ne zhalima zoshanganyilani kene? 15Apa Kirisiti na Bheliali#6:15 Bheliali: Izina limwe la Satani linodwa Mbimbi ne Tjihibhuru. banodumana poni kene? Kene n'galimoyo uneni tjaakashanganyila ne usingagalemoyo kene? 16#1 Bakorinta 3:16; 6:19; Zwipo 26:12; Ezekiele 37:27Ng'umba ye Ndzimu inodumana poni ne midzimu? Iswi ti ng'umba ye Ndzimu unotjila, se Ndzimu wakati,
“Ndowogala mubali, ayenda pakati kwabo,
ngono ndowobe Ndzimu wabo, ibo banowobe bathu bangu.”
17 #
Isaya 52:11
Ndizo “Bhudani mubali,
muthubukane nabo,” kojalo She,
“Musibhate tjimwe tjakatemapala,
ipapo ndowomuamutjila,
18 #
2 Samuele 7:14; 1 Zwiyitikalo 17:13; Isaya 43:6; Jeremiya 31:9 ngono ndowobe tate kumuli,
imwi mukabe bakololo ne bakololokadzi bangu,”
kojalo She Masimbawose.
Kalanga Bible © Bible Society of Botswana, 2008, 2018.