2 Bakorinta 4
4
Fumwa ye tjimeya mu hali dze ntapkhwi
1Ndizo atitonyalamoyo, ngobe Ndzimu nge ngoni dzawo wakatipa kushingila ikoku. 2Takalambana ne zila dzakasumbikala dzinobhatisa shoni, atitoshinga nge bupitipiti, kene kuli kutjinya dama le Ndzimu, koga nge kuleba malebeswa a patjena kuzwilakidza kumwe ne kumwe kuti togalikabgwe mbeli kwe Ndzimu. 3Ha ndebo mbuya yatinosumikila yakasumbikala, yakasumbikalila ibabo banoloba koga. 4Nge kwabo ndzimu we shango ino, iye Satani wakapofupadza mikumbulo ye basingagalemoyo kuti basibone tjedza tje ndebo mbuya ye kupenya kwa Kirisiti, iye mbumbiko ye Ndzimu. 5Ngobe atitozwisumikila iswi, koga tosumikila Jesu Kirisiti ali She, koga iswi tili balanda benyu ngekwa Jesu. 6#Kutangisa 1:3Ngobe Ndzimu ndiwo wakati, “Tjedza ngatjipenye kudwa mu zhalima” Ndiwozwawo wakathama kuti tjedza tjawo tjipenye mu mimoyo yedu kutipa zibo ye kupenya kwe Ndzimu mu buso gwa Kirisiti.
7Koga tina fumwa iyeyi mu majegwa, kulakidza kuti simba gulu lodwa ku Ndzimu, alitodwa ku tili. 8Iswi togwadzisiwa nge zila dzose, koga atitokundiwa, mimwe misi todudumwa, koga tikasinyalemoyo, 9Todziyidziwa, koga Ndzimu autotisiya, mimwe misi tolobgwa tikawila pasi koga tikasife. 10Misi yose takasenga lufu gwa Jesu mu mibili yedu, kuti ndizo butjilo gwa Jesu gubonekebo mu mibili yedu. 11Ngobe atitjatjila, togala takalingisana ne lufu tibulayigwa Jesu, kuti ndizo butjilo gwa Jesu gubonekebo mu mibili yedu inobola. 12Ndizo wali lufu goshinga mutili, koga butjilo goshinga mu muli.
13 #
Njimbo 116:10
Setina meya iyo zwayo ye kugalamoyo sa iye akakwala eti, “Ndakagalamoyo, ndizo alebeleka,” naswibo togalamoyo, ndizo tolebeleka, 14tiziba kuti iwo wakamusa She Jesu mu bafi unowotimusabo na Jesu kakale ukatizhisa namwi paulipo. 15Ikoku kose kobuzila imwi, kuti ndizo ngoni dze Ndzimu dzinodwilila dzitjidza bathu banjinji dzipaphidze mitembezelo ye kuboka ne kukudza Ndzimu.
Kutjila nge kugalamoyo
16Ndizo atitonyalamoyo. Nenguba mbumbiko yedu ya kuzhe itjinyika, mbumbiko yedu ya mukati inobumbiwa butshwa zhuba limwe ne limwe. 17Ngobe kudziyila ikoku kwe tjibaka tjifutshwanana kotilulwamisila gudzo gulu lisingapele lisina tjalingafananidziwa natjo. 18Ngobe atitolinga zwinobong'wa, koga tolinga zwisingabong'we; ngobe zwinobong'wa zopinda, koga zwisingabong'we zogalila tjose.
Kalanga Bible © Bible Society of Botswana, 2008, 2018.