2 Bakorinta 2
2
1Ndizo ndakapeleledza ndabona kuti ndisitjamukumbe kunowodwa kumuhwisa zogwadza kakale. 2Ngobe ha ndingamuhwisa zogwadza, ndiani ungandishathisa kene, kuzhe kwenyu imwi bandahwisa zogwadza? 3Ngono ndakakwala gumwe lukwalo sekwa ndakakwala ndisingashake, kuti ndisihwisiwe zogwadza ndi ibabo bakafanila kundishathisa, ngobe ndakabe ndina malebeswa nge kwenyu mose, kuti kushatha kwangu kowobe kushatha kwenyu mose. 4Ndakamukwalila ndili mukudziyidzika, ndihwa zogwadza mu moyo, nditebula mishodzi kusi kuti ndimuhwise zogwadza, koga ili kumuzibisa ngekwe ludo gwandinago mu muli.
Kuzwiibhatigwa kwe n'gwadzisi
5Ngono, ha mmwe akahwisa mmwe zogwadza, aazokuthama kundili, koga wakakuthamila imwi mose, kene bamwe benyu zwako. Ndoleba ikoku, ngobe anditoshaka kupaphidza. 6Shamu yaalobgwa nge bunji gwenyu yakanlizana. 7Ndizo ngwenu munzwiibhatigwe mun'nyaladze, kuti ndizo asikuligwe nge buyendasi gwakapindilila. 8Ndomukumbila kuti munlakidze kakale kuti mon'da. 9Ndakakwala lukwalo igoguje, ngobe ndakabe ndishaka kumulika ne kubona kene mondihwa mu tjimwe ne tjimwe. 10Ani naani wamunonzwiibhatigwa namibo ndonzwiibhatigwabo; ngobe tjandanzwiibhatigwa mutjili, akuli kuti kuna tjandakafanila kunzwiibhatigwa, ndatjizwinbhatigwa mbeli kwa Kirisiti nge kwenyu. 11Kudzibila Satani kuti asitibhatilepo, ngobe ate kuli kuti atitoziba njalakang'wa dzidze.
Kudziyidzika mu meya kwa Paulo
12 #
Mishingo 20:1
Ngwenu ndakati ndayenda ku Tiroasi kunosumikila ndebo mbuya ya Kirisiti, ndikawana She bandizhulila nkoba, 13koga nkumbulo wangu ukasigadzikane, ngobe andizowana ikamu tjangu Tito ikoko. Ndizo ndakabawoneka apindila ku Makedoniya.
Kukunda ndi Kirisiti
14Koga ngakubokwe Ndzimu, iwo unotitungamila misi yose mu kukunda ndi Kirisiti. Ndzimu unoyendisa zibo ye nnuhwo unozipa ngekwa Kirisiti kumwe ne kumwe ndiswi. 15Ngobe ti nnuhwo unozipa wa Kirisiti unopiwa Ndzimu, muna ibabo banotjidziwa ne muna banoloba. 16Kuna unolobesiwa ti nnuhwo we lufu, kuna unotjidziwa ti nnuhwo we butjilo. Ndiani ngono wakalizanila nshingo wakajali? 17Iswi atitonga bunji gunoshaba nge dama le Ndzimu, koga ti bathu ba Kirisiti bakashanduka bana malebeswa, bakatumwa nge Ndzimu, tolebeleka mu mesho e Ndzimu muna Kirisiti.
Kalanga Bible © Bible Society of Botswana, 2008, 2018.