2 Zwiyitikalo 18
18
Nlebesambeli Mikaya unotjenjedza Ahabu
(1 Bomambo 22:1-28)
1Ngono Jehoshafati kabe ne fumwa njinji ne gudzo gulu kakale kathama tjidumano tje ndobolo na Ahabu. 2Koga kukati shule kwe makole Jehoshafati kayenda kuna Ahabu ku Samariya. Ngono Ahabu kabhayila Jehoshafati na bose baakabe anabo ngabe ne pkhwizi ne mbudzi njinji, ebe enkwekweredza kuti ashangane nabo banonginilila nzi nkulu we Ramotigiliyadi.
3Ngono Ahabu mambo we Iziraela kadwa Jehoshafati mambo we Juda kati, “Apa unowoyenda nami kunogwa ne Ramotigiliyadi kene?” Ngono Jehoshafati kashandula eti, “Tjauli itjo ndi itjo, bathu bangu bathu babobo. Toyenda nawe ku ngwa.” 4Ngono Jehoshafati kadwa mambo we Iziraela kati, “Koga kutanga shaka gumbuludzo kuna Yahwe.”
5Ipapo mambo we Iziraela kakubunganya balebesambeli bali mazana manna (400) ngono kababhuzwa kati, “Apa ndiyende ndinobhayana ne Ramotigiliyadi kene ndiletje?”
Balebesambeli bakashandula beti, “Yendani munogwa nayo, Ndzimu unowomupa kukunda.”
6Koga Jehoshafati kabe eti, “Apa akuna mmwe nlebesambeli wa Yahwe watingabhuzwa kakale kene?”
7Mambo we Iziraela kashandula Jehoshafati eti, “Kutjina mmwe nlume ng'ompela watingashakisisa ngekwa Yahwe unoyi Mikaya nkololo wa Imila, koga ndonshima, ngoti akuna tjakanaka tjaakatongo lebelambeli nge kwangu aisi mbipo koga.”
Ngono Jehoshafati kabe eti, “Musilebe muijalo mambo wangu!”
8Ndizo mambo we Iziraela Ahabu kadana mmwe we hadzasha dzidze kandwa kati, “Libilidza uzhise Mikaya nkololo wa Imila.”
9Ipapo mambo we Iziraela Ahabu na Jehoshafati mambo we Juda bakabe bali ku lutombo baligele zwigalo zwabo zwe bushe bakaambala hazu dzabo dze bushe ku nkoba we Samariya. Ngono balebesambeli bose bakabe belebelambeli bali mbeli kwabo. 10Zedekiya nkololo wa Khenaana kathama nyanga dze butale kadwa Ahabu kati, “Yahwe bati, ‘Mowobhayana ne Basiriya nge nyanga idzedzi kudzina mubalobesa.’ ” 11Balebesambeli bose bakalebeselambeli saikoku, beti, “Tathilani ku Ramotigiliyadi munogwa ngono mowonokunda, Yahwe banowobalonga mu maboko a mambo.”
12Ipapo ntumwa wakabe anodana Mikaya kandwa kati, “Bona, balebesambeli baleba dama ling'ompela linogadzabgwe mambo kuti banowokunda, dzene dama lilo na ilobo lingafanana ne labobo.”
13Koga Mikaya kashandula eti, “Ndotuna na Yahwe banotjila, ndowoleba tjinowobe tjalebgwa nge Ndzimu wangu!”
14Kukati azha kuna mambo, mambo kan'dwa kati, “Mikaya, tiyende ku ngwa ku Ramotigiliyadi kene tigale? Ngono kadabila eti, ‘Tathilani ku Ramotigiliyadi munokunda, Yahwe banowoilonga mu luboko gwenyu.’ ”
15Koga Mambo Ahabu kabhuzwa Mikaya kakale eti, “Ndisisithile kungapani kuti usindibudze tjimwe kuzhe kwe lebeswa nge zina la Yahwe kene?”
16 #
Mbalo 27:17; Ezekiele 34:5; Matewu 9:36; Mako 6:34 Mikaya kadabila eti, “Ndabona Baiziraela bose bakapalalana pezhugwi kwe matombo, se pkhwizi ne mbudzi dzisina nlisi, ngono Yahwe bakabe beti, ‘Bathu ibaba abana ntungamili, ima mmwe ne mmwe abgwilile ku nzi uwe nge mbakiso.’ ”
17Mambo we Iziraela Ahabu kadwa Jehoshafati kati, “Apa andizokubudza kuti aangatongo lebeselambeli kwakanaka nge kwangu, kuzhe kwe mbipo kene?”
18Mikaya kadwilila eti, “Ndizo tjihwani tjinolebgwa ndi Yahwe. Ndabona Yahwe baligele pa tjigalo tjabo tje bushe ne batumwa bose be kudzimu bali mile ku luboko gwabo gwe luji ne ku lumeshwe gwabo. 19Yahwe bakabe beti, ‘Ndiani unowowonga Ahabu mambo we Iziraela kuti adze atathe anofila ku Ramotigiliyadi kene?’ Mmwe ntumwa we kudzimu kaleba yetji mmwe eleba yetji. 20Kudzina meya izha ima mbeli kwa Yahwe, ibadwa iti, ‘Ndowon'wonga’ Ngono Yahwe bakabhuzwa bakati, ‘Nge zila yakatini?’ 21Meya ikadabila iti, ‘Ndowoyenda ngono abe meya ye manyepkhwa mu balebesambeli babe.’ Yahwe bakabe beti, ‘Kan'wonge, ngono unowotubula, yenda unothama saikoku.’ ”
22“Ngono ngwenu bona Yahwe bakalonga meya inonyepa mu milomo ye balebesambeli babo bose. Koga Yahwe banoleba kwakabipa nge kuko!”
23Ngono Zedekiya nkololo wa Khenaana kamadzuka kanoloba Mikaya mu lushaya kandwa kati, “Kwakatangisa lini meya ya Yahwe ibhude mundili ilebeleke nawe?”
24Mikaya kandwa kati, “Bona, unowobona mu zhuba ilelo, launowonobgwata mu ng'umba itjamukati.”
25Mambo Ahabu kalaula hadzasha dzidze kati, “Bhatani Mikaya mun'yise ku nlauli we nzi nkulu Amoni, ne kuna Joashi nkololo wa mambo. 26Mubadwe muti mambo bakati, ‘Munlonge mu ng'umba ye busungwa mumpe tjiwunga ne vula kudzina ndinobuya ndili mpumbulu.’ ”
27Mikaya kadwa Mambo Ahabu kati, “Ha ungabuya uli mpumbulu, kowobe kudwa kuti Yahwe abazolebeleka nami.” Kabe edwa bakabe bali ipapo eti, “Muhwe tjandaleba imwe bathu mose muipapa.”
Lufu gwa Ahabu
(1 Bomambo 22:29-35)
28Ndizo Mambo we Iziraela Ahabu na Mambo we Juda Jehoshafati bakabhuda bakayenda ku ngwa ku Ramotigiliyadi. 29Mambo we Iziraela kadwa Jehoshafati kati, “Ndowolashidza azwithama mbhayani koga usi mambo, koga iwe uambale zwiambalo zwizo zwe bumambo.” Ngono mambo we Iziraela kazwilashidza kanongina mu ngwa.
30Ipapo mambo we Aramu wakabe adwa balauli babe be koloyi dze ngwa eti, “Imwi musitongo bhayana ne mmwe ntukunu kene nkulu, koga mubhayane na mambo we Iziraela.” 31Kukati balauli be koloyi dze ngwa bebona Jehoshafati bakazwidwa beti, “Nge lebeswa ndiye mambo we Iziraela.” Ndizo bakabhayana naye, Jehoshafati kadila guwo, ngono Yahwe bakambhatsha. Ndzimu ukabatatila kutjena naye. 32Kukati balauli be koloyi dze ngwa baziba kuti ate ali iye mambo we Iziraela, bakashanduka bakaletja kutatana naye. 33Koga kukati mmwe mbhayani we Aramu ngoambambidza eposa dati lile nsebe ukanobhaya mambo we Iziraela panoshanganila zwiambalo zwizwe zwe ngwa. Mambo Ahabu kadwa n'yendisi we koloyi ye ngwa kati, “Shandukila shule, undiduse mu ngwa ngoti ndakubala.”
34Zhuba ilelo ngwa ikakula kwakabangalala, Mambo Ahabu wakabe akasendama mu koloyi iye ye ngwa kubhayaniwa ne Baaramu, malopa kawunga edwa mu banga lile kazha kusi kwe koloyi kudzina zhuba lingina efa.
Kalanga Bible © Bible Society of Botswana, 2008, 2018.