2 Zwiyitikalo 17
17
Jehoshafati unobe mambo
1Jehoshafati nkololo uwe kagala Asa thaka, ngono kazwisimisa kubhayana ne Iziraela, ngono kasimisa zwitoropo mu Baiziraela. 2Kabiga babhayani mu matizhilo e mizi mikulu ye Juda kabiga gupo le babhayani mu shango ye Juda ne mizi mikulu ye Ifureimi yakabe yatapiwa ndi Asa tate babe. 3Yahwe bakabe bana Jehoshafati ngoti wakabe eyenda mu zila dze kutanga dza tate babe kakale asinga namate bo Bhaale, 4koga iye wakashaka Ndzimu wa tate babe e bhulutana ndayo dzawo asingatobele zila yakatobegwa ndi bomambo be Iziraela. 5Ndizo Yahwe bakapa Jehoshafati simba mu mbuso uwe ngono bathu be Juda bakadusila Jehoshafati zwipo ngono kabe ne fumwa isishoma ne kutetiwa kukulu. 6Moyo uwe wakabe wakasima mu zila dza Yahwe kakale kakolomodza magalo wose akabe ethigamigwa midzimu ne zwifaniso zwe ndzimukadzi Ashera mu Juda.
7Mu gole le butatu le mbuso uwe Jehoshafati katuma makombgwa awe bo Bhenihaili na Obadiya na Zekariya na Nethanele na Mikaya kuti banodiya ku mizi mikulu ye Juda. 8Bakabe bana Balevi bo Shemaya na Nathaniya na Zebadiya na Asaheli na Shemiramoti na Johonathani na Adonija na Tobija na Tobadonija ne Balevi ibaba, bapirisiti bakabe bali bo Elishama na Jehoramu. 9Bakabe bediya mu Juda, bakabe beyenda bakabhata lukwalo gwe nlayo wa Yahwe beyenda mizi mikulu yose ye Juda bediya bathu.
Bukulu gwa Jehoshafati
10Ngono kutja Yahwe kukabe mu mibuso yose ye shango yakabe yakapoteleka Juda, ngono bakasigwe na Jehoshafati. 11Bamwe be Bafilisitiya bakazhisila Jehoshafati zwipo ne siliva ne Baarabhu bakan'zhisila nyundo dzili zwiwulu zwili kutendeka ne mazana ali kutendeka (7 700) ne phoko dzili mazana ali kutendeka (700). 12Ndizo Jehoshafati masimba awe kabe akabhata ekula. Kabaka matizhilo mu Juda ne mizi mikulu ye mabiganyilo. 13Kabe ne mabiganyilo makulu mu mizi mikulu ye Juda kakale kabe ne babhayani, balume bakasima moyo mu Jerusalema, 14bakalongolosiwa kuyenda nge misha yabo, kudwa muna Juda kwakabe kuli balauli be babhayani bali tjiwulu (1 000) ne Adina we nlauli wakabe ana babhayani bali zwiwulu zwili mazana ali matatu (300 000) zwe balume bakazwimisila ngwa. 15Kudwapo kutobela Jehohanani nlauli we bali zwiwulu zwili mazana mabili ana makumi ali zhanakadzi (280 000), 16kudwapo kuti Amasiya nkololo wa Zikiri iye ana babhayani bali zwiwulu zwili mazana mabili (200 000), Amasani iye wakabe azwishalula kuti unowoshingila Yahwe. 17Nlauli we babhayani be nsha wa Bhenjamini yakabe ili Eliyada nlume wakasima elaula babhayani bali zwiwulu zwili mazana mabili (200 000) e balume bamile zubuyanana bakashakatila zwivikisi ne matati. 18Wakabe etobegwa ndi Jehozabadi iye akatungamila babhayani bali zwiwulu zwili zana lina bali makumi ali zhanakadzi (180 000) bakazwilulwamisila ngwa. 19Balume ibaba bakabe beshingila mambo kusingabaligwe ibabo bakabe bakabigwa ndi mambo mu mizi mikulu ye matizhilo mu Juda yose.
Kalanga Bible © Bible Society of Botswana, 2008, 2018.