2 Zwiyitikalo 14
14
Asa mambo we Juda
1Ndizo Abija kafa ngono bakambiganya mu nzi nkulu wa Dafite. Asa nkololo uwe kan'gala thaka kabusa mu bumo gugwe. Ngono kwakati kubusa Asa shango yakabe ne kunyalala kwe makole ali gumi. 2Asa wakashathisa Yahwe Ndzimu uwe ngothama bubuya. 3Wakapkhwanyila kutjena zwibeso zwe zwibhayilo zwe midzimu ipoga ne magalo apezhugwi katema phanda dze ndzimukadzi Ashera. 4Ngono wakalaula kuti bathu be Juda bathame tjinoshakiwa ndi Yahwe Ndzimu wa bobatategulu babo ne kulondolodza milayo yabo. 5Wakakolomola magalo wose akabe ethigamigwa midzimu ne zwibeso zwakabe zwipisigwa motsha mu mizi mikulu yose ye Juda, ngono kukabe ne kunyalala mu mbuso uwe. 6Wakabaka matizhilo mu mizi mikulu ye Juda ngoti shango yakabe yabe ne kunyalala. Akuna wakagwa naye mu misi iyeyo ngoti Yahwe bakampa kunyalala. 7Ngono wakati ku bathu be Juda, “Ngatibakeni mizi mikulu tiibakilile nge makuma ne thungamakole nge mikoba inozhaligwa nge butale. Tina simba le shango ngoti ndeyedu takathama kuda kwa Yahwe Ndzimu wedu. Bakatibakilila bakatipa kunyalala.” Ndizo bakabaka ngono bakabhudilila. 8Asa wakabe ana babhayani be Bajuta bali mazana matatu e zwiwulu (300 000) bakabe bakashakatila mathumo ne zwivikisi ne babhayani banodwa ku Bhenjamini bali zwiwulu zwili mazana mabili ana zwili makumi ali zhanakadzi (280 000) bakabe bakazwilulwamisa zubuyanana nge zwivikisi ne matati bose ibaba bakabe bali balume bakasima be ngwa.
9Kwakabe kuna nlume we Nkhushi wakabe edang'wa Zera, nlume iwoyo kanginilila Juda nge babhayani bali miliyoni (1 000 000) ne koloyi dze ngwa dzili mazana matatu (300) ngono kayenda kudzina kunoti ku Maresha. 10Asa wakamilika kanobagwisa, ngono bakama zubuyanana bakalingisana bali ku nkuku we Zefatha pejo ne Maresha. 11Ngono Asa kadana Yahwe Ndzimu uwe kati, “Yahwe akuna iye ungabhatsha pakati kwe bana matatabuko ne basina matatabuko kuzhe kwenyu. Mutibhatshe Yahwe Ndzimu wedu ngoti takabiga mu muli kakale nge zina lenyu tazha tiwolingisana ne babhayani ibaba banjinji. Yahwe imwi Ndzimu wedu akuna ungamukunda.”
12Ndizo Yahwe bakakunda Baitopiya ha Asa ne Bajuda be banginilila ngono Baitopiya bakatizha. 13Asa ne babhayani babe bakabatatamila kudzina benoti ku Gera. Bunji gwe Baitopiya bakabulawa kukasheta ne limbelimbe lasala litjila ngobe bakabe bakuligwa nge babhayani mbeli kwa Yahwe nenge babhayani babo, babhayani bakatapa thundu njinji. 14Bakakolomola mizi mikulu yose yakapoteleka Gera ngoti bathu bakabe betja Yahwe. Babhayani bakatapa mizi mikulu ngobe kwakabe kuna thundu njinji muili. 15Bakanokolomola mishasha ye bathuwi be ng'ombe ngono bakatapa pkhwizi dzabo njinji ne kamela dzabo. Kudwapo bakabgwilila ku Jerusalema.
Kalanga Bible © Bible Society of Botswana, 2008, 2018.