2 Zwiyitikalo 13
13
Abija unogwa na Jeroboamu
(1 Bomambo 15:1-8)
1Mu makole ali gumi lina ali zhanakadzi (18) Jeroboamu, Abija katangisa kubusa Juda. 2Wakabusa makole ali matatu mu Jerusalema. Zina la mmeyabe lakabe liyi Maakha ali nkololokadzi wa Urieli we nzi nkulu we Gibiya. Ngono ngwa ikamuka pakati kwa Abija na Jeroboamu. 3Abija wakayenda ne babhayani bakashalugwa bakasima bali zwiwulu zwili mazana manna (400 000) ngono Jeroboamu iye kayenda ne babhayani bakashalugwa bali zwiwulu zwili mazana ali zhanakadzi (800 000).
4Ngono Abija katatha Dombo le Zemarayimi limu shango ye matombo ye Ifureimi ngono kabe eti, “Jeroboamu ne Iziraela yose wee munditeedze! 5Apa amutoziba kuti Yahwe Ndzimu we Iziraela bakathama tjidumano tje mwenyu tjisingapele na Dafite, tjekumpa iye ne zwizekugwana zwizwe bushe gwe Iziraela kene? 6Ngono Jeroboamu nkololo wa Nebati nlanda wa Solomoni nkololo wa Dafite kapandukila tetshi uwe. 7Kudwapo kanokubunganya makupo asinapura e batjinyi bakakulila Rehoboamu nkololo wa Solomoni atji ntukununu kakale asina luzibo asingake kamililana nabo. 8Ngono ngwenu imwi mozwidwa muti mungamililana ne bushe gwa Yahwe gumu maboko e bakololo ba Dafite ngoti muli mbunga muna zwifano zwe phulu zwe golide zwamakathamigwa ndi Jeroboamu kube midzimu yenyu. 9Apa amuzotatila kutjena bapirisiti ba Yahwe ibo bakololo ba Aroni kose ne Balevi mu bumo gwabo mukabiga bapirisiti nge zila ye be zwitjaba kene? Makabe mutola mmwe ne mmwe koga wazha ne nkono kene pkhwizi dzili kutendeka mumbiga mpirisiti we zwithu zwisi midzimu.
10“Koga iswi titjashingila Yahwe Ndzimu wedu atizobafupatila. Tina bapirisiti banoshingila Yahwe ibo bakololo ba Aroni ne Balevi banoshingabo nshingo wabo. 11Banodusila Yahwe zwibhayilo zwinopisiwa mangwanana mamwe ne mamwe ne madekwana mamwe ne mamwe bepisa zwinonuhwa zwinozipa, banozhisa tjiwunga pa tafuli ye golide mbuyanana, betjengeta zwigadziko zwe mavone zwe golide kuti ndizo mavone azo adwilile ethuta madekwana. Tolondolodza zwinoshakiwa ndi Yahwe Ndzimu wedu koga makaulashila kutjena. 12Bonani Ndzimu ndiwo ntungamili wedu ngono bapirisiti bawo bapano bakabhata nyanga bakazwilulwamisila kudzilidza kuti ngwa itangise. Baiziraela wee, musigwe na Yahwe Ndzimu wa bobatategulu benyu ngobe amungatubule!”
13Jeroboamu katumila babhayani be balalili kuti bapoteleke tja shule. Bakabe bakalingisana ne Bajuta koga balalili ibo bakabe bali shule kwabo. 14Ngono Bajuta bakati belinga bakazwiwana bakakombiwa mbeli na shule. Bakamimila belilila kuna Yahwe beshaka bhatsho ngono bapirisiti bakalidza nyanga. 15Ipapo balume be Juda bakamimila kwazo, bakabanginilila, ngono balume be Juda bakati bemimila, Ndzimu ukakunda Jeroboamu ne Baiziraela bose mbeli kwa Abija na Juda. 16Baiziraela bakatizha mbeli kwe bajuta, ngono Ndzimu ukabalonga mu maboko abo. 17Abija ne babhayani babe bakabulaya Baiziraela bali banjinji kwazo, ndizo kwakabulawa Baiziraela bali zwiwulu zwili mazana mashanu (500 000) zwe balume bakashalugwa. 18Ndizo Baiziraela bayesiwa pasi nge kwaka jalo mu tjibaka itjetjo ngono Bajuta ibo bakasima, ngoti bakabe bakabiga kose muna Yahwe Ndzimu wa bobatategulu babo.
19Ngono Abija katatana na Jeroboamu ngono katola mizi mikulu munli, wakatola nzi nkulu we Bhetele ne mizana yakaupoteleka ne Jeshana ne mizana yayo ne Efuroni ne mizana yakaipoteleka. 20Masimba a Jeroboamu kapelela tjose kasitongo tjamuka mu misi ya Abija ngono kukati ku bupelo Yahwe bakanloba ngono kafa.
21Abija iye simba lile likakula. Kalobola bakadzi bali gumi lina bali banna (14) ngono kabe ne bakololo bali makumi mabili ana babili (22) ne bakololokadzi bali gumi lina tathatu (16). 22Mishingo yose ya Abija ne zila dzidze dzose ne mapeswa awe zwakakwagwa mu Thawu dza Ido Nlebesambeli.
Kalanga Bible © Bible Society of Botswana, 2008, 2018.