1 Samuele 31
31
Lufu gwa Saulo ne bakololo babe
(1 Zwiyitikalo 10:1-12)
1Ngwenu Bafilisitiya bakabhayana ne Baiziraela, Baiziraela bakatizha mbeli kwabo, bunji gukabulaigwa mu Dombo le Gilibhowa. 2Bafilisitiya bakakulila Saulo ne bakololo babe kwazo, bakabulaya bakololo babe Jonatani na Abinadabu na Malikishuwa. 3Ngwa yakakulila Saulo kunotjisa, kwakati baposi be misebe ben'wana bakankubadza kubiibi. 4Saulo kadwa nsengi we zwibhayano zwizwe kati, “Dusa thumo lilo undibhaye ndilo, ndisidwe ndizha ndibulawa nge bathu ibaba basakathumbigwa nge kundidziyidza.” Koga nsengi we zwibhayano zwizwe katja, kasitongokuthama, Saulo kabe etola thumo lile ezwiligila pezhugwi kwalo. 5Kwakati nsengi we zwibhayano ebona kuti Saulo wafa, kazwiligilabo mu thumo ebe efabo. 6Ndizo Saulo ne bakololo babe batatu ne nsengi we zwibhayano zwizwe ne bathu babe bose bakafa bose mu zhuba ilelo. 7Kwakati Baiziraela bakabe bali seli kwe nkuku ne bakabe bali seli kwe Jorodani, bebona kuti babhayani be Iziraela batizha kakale Saulo ne bakololo babe bafa, bakatizha bakasiya mizi yabo. Ngono Bafilisitiya bakazha bakagala muili. 8Kukati tjimuka, Bafilisitiya bezha kuwombula zwitumbu, bakawana Saulo ne bakololo babe batatu bakafila mu Dombo le Gilibhowa. 9Bakanthubula nsholo, bakambula zwiambalo zwe ngwa, bakatuma batumwa mu shango yose kunosumikila thawu mu ng'umba dze minamato dze midzimu yabo ne mu bathu babo. 10Bakabiga zwibhayano zwizwe mu ng'umba ye minamato ya Ashitoreti, bakasungilila mbili uwe mu guma le Bhetishani. 11Kukati bathu be Jabeshi Giliyadi behwa ngekwe tjakashingwa nge Bafilisitiya muna Saulo, 12balume bose bana tjilopa bakamilika, bakalala beyenda busiku gose, bakanotulula zwitumbu zwa Saulo ne bakololo babe mu guma le Bhetishani, bakayenda ku Jabeshi, bakanozwipisilako. 13Ndizo bakatola mafupa abo bakanoabiganya ku Jabeshi kusi kwe nti unoyi tamarisiki, bebe bezwinyima zojiwa mazhuba ali kutendeka.
Kalanga Bible © Bible Society of Botswana, 2008, 2018.