1 Samuele 30
30
Ngwa ne Baamaleki
1Dafite ne balanda babe bakaswika ku Zikilagi mu zhuba le butatu. Baamaleki bakabe banginilila Negebu ne Zikilagi. Bakabe banginilila Zikilagi bepisa, 2bakatapa bakadzi na bose bakabe bali muili, bose batukununu ne bakulukulu, kusina wababulaya, koga bakabatapa bakayenda nabo. 3Kwakati Dafite ne balanda babe beswika ku Zikilagi, bakawana wakapisiwa nge moto ne bakadzi babo ne bakololo ne bakololokadzi babo bakatapiwa. 4Ndizo Dafite ne balanda babe bakalilila pezhugwi, kuswikila bepelegwa nge simba le kulila. 5#1 Samuele 25:42, 43Bakadzi ba Dafite nge bubili, Ahinoami we Jezerele na Abigaile tjilikadzi ya Nabhali we Karimeli, bakabe batapiwabo.
6Dafite wakabe ali mu mbatsha dzisishoma, ngobe bathu beti banonlikitidza nge mabgwe, mmwe ne mmwe akadzipikana ngekwe bakololo ne bakololokadzi babe. Koga Dafite kawana simba muna Yahwe Ndzimu uwe. 7#1 Samuele 22:20-23Dafite kadwa mpirisiti Abiathari nkololo wa Ahimeleke kati, “Undipe tjiambalo tje bupirisiti.” Abiathari kampa itjo. 8Dafite kabuzwa muna Yahwe kati, “Apa ndingatobela goko ileli kene? Apa ndonolibhata kene?”
Yahwe bakashandula beti, “Ulitobele unowonolibhata, ukatubula kubasunungula.”
9Ndizo Dafite wakamilika ne balume bali mazana ali tathatu, bakaswika ku Bheza Ravine, pakabe bamwe basala shule. 10Dafite kadwilila nge gwendo ne balume bali mazana manna (400), ngobe bali mazana mabili (200) bakasala bakong'wa ngotjuluka Bheza banyala kwazo. 11Balume bakabe bana Dafite bakawana nzhuzha we N'egipiti mu shango bakantola bakan'yisa kuna Dafite, bakampa zojiwa kaja ne vula kang'wa. 12Bakampa gwamu le phaya dzakakobogwa ne zhambi dzakawanikiwa kaja kazibunuka, ngobe wakabe ana mazhuba matatu ne masiku matatu asingawane zojiwa kene vula. 13Dafite kambhuzwa kati, “U nlanda waani, unodwa ngayi?”
Kashandula eti, “Ndi N'egipiti, nlanda we N'amaleki. Tetshi wangu wakandilasha ngobe ndakabe ndagwala mazhuba matatu akapinda. 14Takanginilila Negebu kwe Bakerethiya ne ntuthu we Juda ne Negebu kwe Khalibhi, tikabuya tikapisa Zikilagi.”
15Dafite kambhuzwa kati, “Apa unganondilakidza goko ileli kwaliyako kene?”
Ngono nzhuzha kadabila eti, “Ha mungatuna mbeli kwe Ndzimu, kuti amungandibulaye kene amungandipe tetshi wangu, ndinganomuyisa ku goko ileli.” 16Wakatungamila Dafite kanonswikisa ku bali, bakabawana bakaandama ne shango yose, beja beng'wa, bezana, ngobe bakabe bakashathila bukulu gwe thundu yabakatapa mu shango ye Bafilisitiya ne mu Juda. 17Dafite kagwa nabo kababulaya kudwa mangwanana kuyedza kuswikila tjimuka madekwana, ngono akuna wabo wakapudzumuka, kuzhe kwe bazhuzha bali mazana manna (400) bakatatha kamela bakatizha. 18Dafite kadzutunula kose kwakabe kwatogwa nge Baamaleki, kose ne bakadzi babe nge babili. 19Akuna tjakasheteka, tjitukununu kene tjikulu kulu, balisana kene baanadi, zwakabe zwatapiwa keneni tjakabe tjatogwa, Dafite wakabuya nazo zose. 20Dafite wakadzutunula zose ngubi ye pkhwizi ne ng'ombe, bathu babe bakatakula zwithuwo mbeli kukwe, beyenda beti, “Eyi, i thundu ya Dafite yakabe yatapiwa.”
21Ndizo Dafite kaswika ku balume bali mazana mabili (200) bakabe bakakong'wa nge kuyenda naye bakasala pa Bheza Ravine banyala kwazo. Balume ibabo bakabhuda bakanshanganidza Dafite ne bathu baakabe anabo. Kukati Dafite ne balanda babe beswika koga, kabadumilisa. 22Koga bathu bose be meyambi ne basi be tjimwe bamwe be batobeli ba Dafite bakabe beti, “Ngobe ibaba abazobe bayenda naswi, atitowokobana nabo zwakatapiwa zwatakadzutunula, kuzhe kwekuti nlume mmwe ne mmwe atole nkadzi uwe ne bana babe ayende.” 23Dafite kashandula eti, “Akuzojalo bakololo ba tate bangu, amuzofanila thama muijalo ngekwe zwatapiwa ndi Yahwe. Bakatitjengeta bakathama kuti tikunde ikwata tjakabe tjatinginilila. 24Apa ndiani unowoteedza tjamunoleba kene? Gobe le nthu wakasala akalinda thundu lolizana ne nthu wakayenda ku ngwa. Bose banowokobana nge ndizanyo.” 25Kudwa mu zhuba ilelo Dafite kakuthama kukabe nlayo ne yendiso mu Iziraela kuswikila nasi.
26Kwakati Dafite eswika ku Zikilagi, katumilila zwimwe zwe zwakatapiwa ku bazwalani babe, batungamili be Juda kabadwa kati, “Ndamupa tjipo etje, kudwa muna zwakatapiwa mu zwita zwa Yahwe.” 27Etumilila kuna bakabe bali ku Bhetele ne Ramoti ne Negebu ne Jatiri, 28ne kuna bakabe bali ku Aroeru ne Sifumothe ne Eshitemoa, 29ne ku Rakali ne kuna bakabe bali mu mizi ye Bajeramiyeli ne Bakeni, 30ne kuna bakabe bali ku Horima ne Bhori Ashani ne Athaki 31ne ku Heburoni ne kuna bakabe bali ku magalo wose kwakabe Dafite ne bathu babe besoyendaboko.
Kalanga Bible © Bible Society of Botswana, 2008, 2018.