1 Johani 4
4
Meya ye malebeswa ne meya ye manyepkhwa
1Badiwa, musitongo galamoyo Meya imwe ne imwe, koga mubone kene meya iyeyo inodwa ku Ndzimu, ngobe balebesambeli banjinji be manyepkhwa bakaandama mu shango. 2Mungabona kuti Meya ndeye Ndzimu sahwoku; Meya imwe ne imwe inotendeka kuti Jesu Kirisiti wakazha ali mu nyama, ndeye Ndzimu. 3Koga meya imwe ne imwe isingatendeke ngekwa Jesu ate ili ye Ndzimu. Eyo ndiyo meya ye tjita tja Kirisiti, iyo yamakahwa kuti yaswika, ngono ngwenu yatjibe mu shango.
4Bana bangu, mube Ndzimu, makakunda zwita zwa Kirisiti, ngobe Meya igele mu muli ina masimba kupinda imu shango. 5Nge be shango, ndizo tjabanoleba nge tje shango, ngono shango inobahwilila. 6Iswi ti be Ndzimu. Iye unoziba Ndzimu unotihwilila, ngono iye usi we Ndzimu aatotihwilila. Ngekwa ikoku toziba kuthubukanya meya ye malebeswa muna meya ye manyepkhwa.
Ndzimu ludo
7Badiwa, ngatidaneni, nge kuti ludo ngegwe Ndzimu, ngono iye una ludo mwana we Ndzimu kakale unoziba Ndzimu. 8Iye usina ludo aatoziba Ndzimu, ngobe Ndzimu ludo. 9Ludo gwe Ndzimu takaguzumbunuligwa nge zila eyi, Ndzimu wakatuma Nkololo wawo uyega mu shango, kuti ndizo titjile ndiye. 10Ludo gwakajali, ate kuli kuti ndiswi takada Ndzimu, koga Ndzimu ndiwo wakatida ukabuya ukatuma Nkololo wawo kuti awobe tjibhayilo tjinodusa matjinyo edu.
11Badiwa, ha Ndzimu wakatida kwakajalo, naswibo takafanila kudana. 12#Johani 1:18Akuna nthu wakatongo bona Ndzimu. Ha tidana, Ndzimu ugele mutili nenge ludo gwawo gwakapelela mutili.
13Toziba kuti tigele mu Ndzimu na iwo ugele mutili, ngobe wakatipa Meya yawo. 14Takabona kakale totendeka kuti Tate bakatuma Nkololo wabo ali Ntjidzi we shango. 15Iye unoleba kuti Jesu Nkololo we Ndzimu, Ndzimu ugele munli, na iye ugele mu Ndzimu. 16Ndizo toziba kakale togalamoyo ludo gwe Ndzimu gwaunotida ndigo.
Ndzimu ludo, ngono iye ugele mu ludo ugele mu Ndzimu, ne Ndzimu ugele munli. 17Ludo gwakazhadzisika mutili sahwoku: kuti tisime mu zhuba le kusumikilisiwa, ngobe sekwa agele, naswibo takajalobo mu shango iyeyi. 18Akuna lutjo mu ludo, koga ludo gwakapelela gotata lutjo gose. Lutjo goyendidzana ne shamu, ngono iye unotja aazopelela mu ludo.
19Todana ngobe Ndzimu wakatida kutanga. 20Iye unoti “Ndoda Ndzimu” koga ebenga ikamu tjitje, nnyepi. Nge kuti iye usingade ikamu tjitje tjaanobona, aangade Ndzimu waasakatongo bona. 21Kakale wakatipa nlayo iwoyu watakawana munli unoti, “Iye unoda Ndzimu wakafanila kuda ikamu tjitjebo.”
Kalanga Bible © Bible Society of Botswana, 2008, 2018.