1 Johani 2
2
Kirisiti nlebelekeli wedu
1Bana bangu, ndomukwalila lukwalo igogu kuti ndizo musitjinye. Koga ha mmwe wenyu etjinya, tina nlebelekeli wedu kuna Tate, iye Jesu Kirisiti we nlulwami, 2ndiye tjibhayilo tjinodusa matjinyo edu. Asi edu koga, ne matjinyo e shango yose.
3Ha tilondolodza milayo iye, ndiko sekwa tingabe ne luzibo guzhele kuti tonziba. 4Iye unoti “Ndonziba,” koga asingalondolodze milayo iye, nnyepi, ngono malebeswa ate ali munli. 5Koga iye unolondolodza dama lile, munli ludo gwe Ndzimu guyapo ne buzhalo. Tingaduma kuti timunli, ha titjila sa woku: 6Iye unozwidwa eti unotjilila munli wakafanila tjila nge zila yaakatjilabo ndiyo.
Nlayo ntshwa
7 #
Johani 13:34
Badiwa, anditomukwalila mmwe nlayo ntshwa, koga ndomukwalila ngekwe nlayo nkulukugwi wamakabe munawo kudwa mu kutangisa. Nlayo iwoyu nkulukugwi ndilo dama lamakahwa. 8Nenguba ndimukwalila nlayo ntshwa, malebeswa awo anobong'wa munli ne mu muli, ngobe zhalima lopinda, ngono tjedza tje malebeswa tjotjipenya kale.
9Iye unoti umu tjedza koga ebenga ikamu tjitje, unobe atjimu zhalima zwe. 10Iye unoda ikamu tjitje ugele mu tjedza, ngono mu tjedza akuna tjingathama kuti utjinye. 11Koga iye unobenga ikamu tjitje umu zhalima kakale unoyenda mu zhalima, ngono aatoziba kwaanoyenda, ngobe zhalima lakampofupadza.
12Bana bangu, ndomukwalila ngobe matjinyo enyu makaazwiibhatigwa ngekwe zina lile. 13Botate, ndamukwalila ngobe monziba iye unodwa mu kutangisa. Imwi bazhuzha, ndamukwalila ngobe makakunda mbiimbi.
14Botate, ndamukwalila ngobe monziba iye wakabe alipo kudwa mu kutangisa. Bazhuzha, ndamukwalila ngobe makasima nenge dama le Ndzimu logala mu muli, kakale makakunda mbiimbi.
15Muside shango kene tjimwe tje shango. Ha mmwe eda shango, aatoda Tate. 16Ngoti tjimwe ne tjimwe tjimu shango; njemulo dze mbili ne njemulo dze mesho ne kuzwida mubutjilo, akutodwa kuna Tate, koga ngekwe shango. 17Shango inopela ne njemulo dzayo, koga iye unothama kuda kwe Ndzimu unotjilila tjose.
Tjita tja Kirisiti
18Bana bangu, kwabe tjibaka tje bupelo! Makahwa kuti tjita tja Kirisiti tjaswika; ngono ngwenu zwita zwa Kirisiti zwinji zwabe yapo kale, ndizo ngekwa ikoku toziba kuti kwabe nsi we bupelo. 19Ibaba bathu tjoselele ate bali bamwe bedu, ndizo wali bakatisiya; ha bakabe bali bamwe bedu, banobe bakagala naswi. Koga bakayenda kuti kube patjena kuti akuna wabo tjose wakabe ali wedu.
20Koga imwi makazhodziwa nge Wakayengemala, ngono mose muna luzibo. 21Ndomukwalila, kusi kuti ngobe musingazibe malebeswa; koga ngobe muaziba, nge kuti mozibabo kuti akuna manyepkhwa anodwa mu malebeswa. 22Nnyepi ndiani ngono, aaisi mmwe ne mmwe unolandula kuti Jesu ndi Kirisiti. Nthu wakajalo tjita tja Kirisiti, unolandula bose Tate ne Nkololo. 23Ngobe iye unolandula Nkololo, na Tate unobalandulabo; iye unoleba kuti unoduma mu Nkololo, na Tate unabo.
24Thamani kuti tjamakahwa kudwa mu kutangisa tjigale mu muli. Ha tjamakahwa tjigala mu muli namwibo mowogala mu Nkololo ne muna Tate. 25Ngono ikoku ndiko kwatakagadziwabgwe ndiye, butjilo gusingapele.
26Ndamukwalila ikoku ngekwa ibabo banogwisa kumudzimidza. 27Koga kuzhodziwa kwamakazhodziwa ndiye kumumuli, ndizo amutosheta mmwe kumudiya. Se kuzhodza kukwe kumudiya ngekwe tjimwe ne tjimwe, kakale ili lebeswa lisina manyepkhwa, koga sekwa kwakamudiya galani munli.
28Ee, bana bangu, ibeni bang'ompela naye, kuti ndizo ati ezha tisime, ngono tisibhakhwe nge shoni ha ezha. 29Ha muziba kuti wakalulwama, mungazibabo kuti mmwe ne mmwe unothama tjakalulwama mwana uwe.
Kalanga Bible © Bible Society of Botswana, 2008, 2018.