1 Zwiyitikalo 24
24
Nshingo wakapiwa bapirisiti
1Awa ndiwo makupo e bakololo ba Aroni. Bakololo ba Aroni bakabe bali bo Nadabu na Abihu na Eleazari na Ithamari. 2#Zwipo 10:1, 2Koga Nadabu na Abihu bakafa betangila tate babo basathu bawana bana, ndizo Eleazari na Ithamari bakabe bapirisiti. 3Dafite ebhatshiwa ndi Zadoki tjizekugwana tja Eleazari na Ahimeleki tjizekugwana tja Ithamari bakalongolosa bapirisiti nge mishingo yabo. 4Ngono se kwakabe kuna misholo ye misha ili minjinji mu zwizekugwana zwa Eleazari kupinda be nsha wa Ithamari, mu zwizekugwana zwa Eleazari bakathubukanyiwa bakabe makupo ali gumi lina bali tathatu (16), ba Ithamari ibo bakabe makupo ali zhanakadzi. 5Bakathubukanyiwa ngoposa hakata ngobe kwakabe kuna makulukota e bugalo gwakayengemala ne makulukota e Ndzimu mu zwizekugwana zwa Eleazari ne zwa Ithamari. 6Ngono nkwalili Shemaya nkololo wa Nethanele kakale ali Nlevi wakabakwala bose mbeli kwa mambo ne makulukota na mbeli kwa Zadoki we mpirisiti na mbeli kwa Ahimeleki nkololo wa Abiathari na mbeli kwe misholo ye misha ye bapirisiti ne Balevi, kwakabe kutogwa nsha nng'ompela kudwa mu zwizekugwana zwa Eleazari ne tjing'ompela kuna Ithamari.
7Ngono dziba le kutanga likawila Jehoyaribi le bubili likawila Jedaya 8le butatu likawila Harimu le bunna kuna Seorimu, 9le bushanu likawila kuna Malikija le butathatu likawila kuna Mijamini, 10le butendeka likawila kuna Hakozi, le buzhanakadzi likawila kuna Abija, 11le buzhanalume likawila kuna Jeshuwa le bugumi likawila kuna Shekaniya, 12le bugumi lina nng'ompela (11) likawila kuna Eliyashibi, le bugumi lina bali babili (12) likawila kuna Jakimu, 13le bugumi lina batatu (13) likawila kuna Hupa, le bugumi lina banna (14) likawila kuna Jeshebiabu, 14le bugumi lina bashanu (15) likawila kuna Biliga, le bugumi lina bali tathatu (16) likawila kuna Imeri, 15le bugumi lina bali kutendeka (17) likawila kuna Heziri, le bugumi lina bali zhanakadzi (18) likawila kuna Hapizezi, 16le bugumi lina bali zhanalume (19) likawila kuna Pethahiya le bumakumi mabili (20) likawila kuna Jehezikele, 17le bumakumi mabili ana nng'ompela (21) likawila kuna Jakini, le bumakumi mabili ana babili (22) likawila kuna Gamuli, 18le bumakumi mabili ana batatu (23) likawila kuna Delaya, le bumakumi mabili ana banna (24) likawila kuna Maziya. 19Ibaba bose bakabe bapiwa nshingo wekushinga mu Ng'umba ya Yahwe koga sekwa kwakabe kuli mu ndongoloso yakabigwa ndi Aroni batategulu babo iye sekwa akadwiwa ndi Yahwe Ndzimu we Iziraela.
20Ngono bakasala be zwizekugwana zwa Levi bakabe bali: Zwizekugwana zwa Amuramu kuli Shebuweli, mu zwizekugwana zwa Shebuweli kwakabe kuli Jedaya. 21Mu zwizekugwana zwa Rihabiya bakabe bali bo Ishiya ali nsholo we nsha. 22Mu zwizekugwana zwe Baizhari bakabe bali Shelomoti, mu zwizekugwana zwa Shelomoti bakabe bali bo Jahati. 23Bakololo ba Heburoni bakabe bali bo Jeriya ali nsholo we nsha, we bubili ali Amariya, Jahaziele iye ali we butatu, Jakameamu ali we bunna. 24Nkololo wa Uziele wakabe ali Mika, kudwa mu bakololo ba Mika kwakabe kuli Shamiri. 25Nnunguna wa Mika kwakabe kuli Ishiya, kudwa mu bakololo ba Ishiya kwakabe kuli Zekariya. 26Bakololo ba Merari bakabe bali bo Mahili na Mushi. Nkololo wa Jaziya wakabe ali Bheno. 27Bakololo ba Merari kudwa kuna Jaziya bakabe bali bo Bheno na Shohamu na Zakhuri na Ibiri. 28Kudwa kuna Mahili wakabe ali Eleazari, Eleazari wakabe asina bakololo. 29Kudwa kuna Kishi kwakabe kuli nkololo wa Kishi edang'wa Jerahimeli. 30Bakololo ba Mushi bakabe bali bo Mahili na Ederi na Jerimoti. Ibaba bakabe bali Balevi kuyenda nge misha yabo. 31Naibo bakakandila koga se hama dzabo zwizekugwana zwa Aroni, mbeli kwa Mambo Dafite na Zadoki na Ahimeleki ne misholo ye misha ye bapirisiti ne Balevi. Misha ye hama hwola yakabe itobegwa koga sa iyeyi mitukunu.
Kalanga Bible © Bible Society of Botswana, 2008, 2018.