SALMOS 51
51
Mi' c'ajtiben Dios i ñusʌntel i mul
1Dios, p'untañon cha'an cabʌl i yutslel a pusic'al.
Tsac ñusʌbeyet a mandar. Yʌpbeñon c mul, come wen a wujil p'untaya.
2Lu' pocbeñon loq'uel c jontolil.
Sʌq'uesʌbeñon c pusic'al cha'an tsac cha'le mulil.
3Cujil tsac ñusʌbeyet a mandar.
Mic ña'tan c mul ti pejtelel ora.
4Tsaj contrajiyet che' bʌ tsac cha'le jontolil ti a wut.
Che' jini tsa cʌc'ʌ ti tsictiyel tojʌch a t'an,
Sʌcʌch a meloñel.
5Awilan, xmulilon tsa quila pañimil.
Añʌch c mul c'ʌlʌl che' cʌntʌbilon i cha'an c ña'.
6A wom a taj chuqui tac isujm ti' pusic'al winic,
Jini cha'an aq'ueñon c wen ch'ʌmben isujm chuqui a wom.
7Sʌq'uesañon yic'ot i ch'ich'el alʌc'ʌl
Cha'an wen sʌc mi cajñel.
Pocoyon cha'an ñumen sʌc mi cajñel bajche' sʌsʌc bʌ tocal.
8Tsa' c'ʌsbeyon c bʌquel yubil. La' lajmicon cha'an mi cubin i tijicñʌyel c pusic'al.
9Mʌyʌ a wut cha'an ma'anic ma' chʌn q'uelbeñon c mul.
Yʌpbeñon pejtel c jontolil.
10Dios, cha' melbeñon c pusic'al ti sʌc.
Cha' mele quespíritu ti tsijib yic'ot ti toj.
11Mach a chocon loq'uel ti a tojlel.
Mach ma' chilbeñon loq'uel jini Ch'ujul bʌ a wEspíritu.
12Cha' aq'ueñon cubin tijicña cha'an j coltʌntel.
Aq'ueñon c wersa cha'an mic mel chuqui toj ti jump'ejl c pusic'al.
13Che' jini mi caj c pʌsbeñob a bijlel jini mu' bʌ i ñusʌbeñet a mandar.
Jini xmulilob mi caj i sutq'uiñob i bʌ ba' añet.
14Dios, ñusʌbeñon c mul come tsac cha'le tsʌnsa.
Dios, caj Coltaya, mi caj c'ʌyibeñet a tojel.
15C Yum, jambeñon quej
Cha'an mic sub a ñuclel.
16Ma'anic ma' mulan tsʌnsʌbil bʌ a majtan.
Muq'uic cʌq'ueñet pulbil bʌ a majtan, mach tijicñayetic.
17Jini mu' bʌ a mulan jiñʌch ju'sʌbilix bʌ c pusic'al lojon,
I wenta tsʌnsʌbil bʌ a majtan.
Dios, ma'anic ma' ts'a'len jini ju'sʌbilix bʌ i pusic'al mu' bʌ i cʌy i mul.
18Pʌsbeñob i yutslel a pusic'al a cha'año' bʌ.
Cha' mele i ts'ajquil tac Jerusalén.
19Che' jini tijicña mi caj a q'uel tsʌnsʌbil bʌ a majtan che' tojʌch c pusic'al lojon.
Tijicña mi caj a q'uel a majtan yic'ot pulbil bʌ a majtan ti juncojtlel.
Che' jini mi caj a wʌq'uentel alʌ tat wacax ti a pulʌntib.
Currently Selected:
SALMOS 51: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.