SALMOS 5
5
Mi' wocol c'ajtin i cʌntʌntel
1C Yum, ñich'tʌbeñon c t'an.
Ubibeñon c t'an cha'an woliyon ti wocol.
2Awocolic ubibeñon che' mij c'ajtibeñet, c Rey, c Dios,
Come wolic pejcañet ti oración.
3C Yum, che' ti sʌc'ajel mi caj a wubibeñon c t'an.
Mi caj c pejcañet ti oración. Mi caj c letsan c wut ba' añet ti panchan.
4Come Diosetʌch, ma'anic ma' mulan jontolil.
Jini jontolil mach mejlic ti ochel ba' añet.
5Mach pʌybilic ti a tojlel jini mu' bʌ i chañ'esan i bʌ. Ma' ts'a'len xjontolilob.
6Ma' jisan jini mu' bʌ i cha'leñob lot.
C Yum, ts'a' ma' q'uel jini mu' bʌ i cha'len tsʌnsa yic'ot jini mu' bʌ i cha'len lot.
7Jixcu joñon, mi caj cochel ti a wotot come cabʌl ma' p'untañon.
Mic bʌc'ñañet che' mic ch'ujutesañet ti jini ch'ujul bʌ a Templo.
8C Yum, pʌsbeñon bajche' yom mi cajñel ti' tojlel j contrajob come toj a pusic'al.
Toj'esañon ti jini toj bʌ a bijlel.
9Mach isujmic i t'an jini j contrajob. Yujilob jisaya. Wen tuw i t'an.
Mi' pejcañoñob cha'an mi' chucon.
10Dios, yom ma' wʌq'ueñob i toj i mul.
La' yajlicob cha'an tsi' temeyob i t'an tij contra.
Chocoyob loq'uel cha'an cabʌl i jontolil, come tsi' ñusayetob.
11La' i tajob i tijicñʌyel i pusic'al pejtel jini mu' bʌ i ñopetob.
La' i cha'leñob c'ay ti pejtelel ora cha'an i tijicñʌyel i pusic'al, come jatet ma' cʌntañob.
La' i tajob i tijicñʌyel ti jatet jini c'ux bʌ mi' yubiñob a c'aba'.
12Come jatet mi caj a wʌq'uen i yutslel a t'an jini toj bʌ.
C Yum, mi caj a joy mʌctan ti' yutslel a pusic'al i wenta mʌctʌjibʌl.
Currently Selected:
SALMOS 5: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.