SALMOS 44
CTUBI
44
Cabʌl tsa' coltʌnti ti wocol
1Tsa'ix cubi lojon.
Tsi' subeyon lojon c ñojte'el
Chuqui tac tsa' mele ti wajali.
2Ya' ba' tsa' choco loq'uel jini sajtemo' bʌ tsa' wotsa a cha'año' bʌ ti a p'ʌtʌlel.
Tsa' puts'tesa winicob x'ixicob cha'an ma' wʌc' ti p'ojlel a cha'año' bʌ.
3Come mach ti' p'ʌtʌlelic i yespada tsi' ch'ʌmʌyob jini lum.
Ma'anic tsa' mʌjli i cha'añob ti' bajñel p'ʌtʌlel.
Pero ti' p'ʌtʌlel jini ñoj bʌ a c'ʌb jini wen yujil bʌ e'tel tsa' coltayob,
Come tsa' pʌsbeyob i yutslel a pusic'al.
4Jatet, c Reyet, c Dioset mu' bʌ a wʌc' ti colel Jacob.
5Mi caj c choc lojon jubel j contrajob cha'an ti a p'ʌtʌlel.
Ti a c'aba' mi caj c t'uchtan lojon jini mu' bʌ i contrajiñon lojon.
6Come mach cha'anic c jalʌjb xuc'ul c pusic'al.
Mach cha'anic quespada mi' mʌjlel c cha'an.
7Tsa' pʌyʌyon loq'uel ti' p'ʌtʌlel j contrajob lojon.
Tsa' peq'uesa jini mu' bʌ i ts'a'leñon lojon.
8C Dios, chʌn xuc'ul lojon c pusic'al ti jatet.
Mux c sub lojon i ñuclel a c'aba' ti pejtelel ora.
9Chocbilonix lojon wʌle. Tsa'ix a wʌc'ʌyon lojon ti quisin.
Ma'anix ma' pi'len majlel c soldadojob lojon.
10Tsa' wʌc'ʌyon lojon ti puts'el ti' tojlel j contrajob lojon.
Jini mu' bʌ i ts'a'leñon lojon mi' xujch'iñob lojon c chubʌ'an.
11Che' bajche' mi' tsʌnsʌntel tiñʌme' tsa' wʌc'ʌyon lojon ti chʌmel.
Tsa' pucuyon lojon ti' tojlel jini mach bʌ c pi'ʌlobic lojon.
12Tsa' wʌc'ʌ a winicob x'ixicob ti' wenta i contrajob ti che jachi.
Ma'anic tsa' ch'ʌmbeyob i tojol.
13Tsa' wʌc'ʌyon lojon ti tse'tʌntel ti' tojlel jini mach bʌ c pi'ʌlobic lojon,
Cha'an mi' ts'a'leñon lojon, cha'an mi' wajleñon lojon.
14Tsa' wʌc'ʌyon lojon ti a'lentel ti' tojlel jini gentilob.
Jini winicob x'ixicob yan tac bʌ i lumal mi' wajleñoñob lojon.
15Belel ora muc'on ti quisin.
Mic mʌy c wut cha'an quisin,
16Cha'an i t'an jini mu' bʌ i tse'tañon lojon, mu' bʌ i p'ajon lojon,
Cha'an ts'a' mi' q'uelon lojon j contrajob mu' bʌ i q'uextañob jontolil.
17Tsa' tili wocol tic tojlel lojon,
Anquese ma'anic tsa' ñajʌyiyet tic pusic'al lojon.
Ma'anic tsac ñusa lojon jini xuc'ul bʌ a t'an.
18Xuc'ul to c pusic'al lojon a wic'ot.
Ma'anic tsaj cʌyʌ a bijlel.
19Tsa' teñeyon lojon ya' ba'an jini mate'el ts'i'.
Tsa' wotsayon lojon ti ic'ch'ipan bʌ ba' bʌbʌq'uen mi lac chʌmel.
20Mi tsa' laj cʌyʌ lac Dios cha'an mi lac ch'ujutesan dioste' tac,
21¿Mach ba anic mi' tsictiyel ti a wut?
Come cʌmbil i cha'an Dios jini mucul tac bʌ am bʌ ti lac pusic'al.
22Wolic tsʌnsʌntel lojon ti jujump'ejl q'uin cha'an tsac ñopoyet lojon.
Wets'bilon lojon che' bajche' tiñʌme' cha'an mic tsʌnsʌntel lojon.
23¡Ch'ojyen, c Yum! ¿Chucoch woliyet ti wʌyel?
Yom ma' pʌs a p'ʌtʌlel. Mach a junyajlel chocon lojon ti a tojlel.
24¿Chucoch wola' mʌc a wut? ¿Chucoch ñajʌyem c wocol lojon ti a pusic'al che wolic tic'lʌntel lojon?
25Come wen ch'ijiyemon lojon, pʌcʌlon ti lum.
26La' coltañon lojon,
Mʌñʌyon lojon come c'ux ma' wubiñon lojon.

© Wycliffe Bible Translators, Inc. All rights reserved.

Learn More about the I T’an Dios