JOB 42
42
Job tsi' subu i mul
1-2Job tsa' caji' jac'ben lac Yum: Cujil melel awujil melol pejtel chuqui an. Ma'anic majqui mi mejlel i mʌctañet che' an chuqui ma' ña'tan a mel. 3Tsa' lon sajtiyon tic t'an che' bajche' tsa' wʌlʌ. Ma'anic tsac ch'ʌmbe isujm. Tsac taja ti t'an jini ñuc tac bʌ mach bʌ cʌmbilic c cha'an. 4Awocolic, ñich'tañon. Mi caj c pejcañet. Ma'anix chuqui mi caj c chʌn c'ajtibeñet. Tsa'ix a laj subeyon. 5Ti yambʌ ora tsa jach j cʌñʌyet cha'an i t'an yaño' bʌ, pero wʌle mij q'uelet. Mij cʌñet. 6Jini cha'an mic ts'a'len c bʌ. Mic tsic c pusic'al cha'an c mul. Mij q'uel c bʌ ti pec'. Mic buchtan lum. Mic mujlan c bʌ ti' tʌñil c'ajc, che'en Job.
7Lac Yum tsi' cʌyʌ i pejcan Job. Tsa' caji i suben Elifaz ch'oyol bʌ ti Teman: Mich' mij q'uelet yic'ot jini cha'tiquil a cʌñʌyo' bʌ. Mach isujmic la' t'an. Isujm i t'an c winic Job. 8Cucuxla ba'an c winic Job. Ch'ʌmbenla majlel wuccojt ch'iton bʌ i yal wacax yic'ot wuccojt tat tiñʌme'. Aq'ueñon ti pulʌntib cha'an la' mul. C winic Job mi caj i tajetla ti oración. Muc'ʌch c pʌsben i yutslel c pusic'al. Che' jini mi caj c ñusan la' mul, come uts'at tsi' tajayon ti t'an c winic Job, pero mach uts'atic tsa' la' tajayon ti t'an, che'en. 9Jini cha'an tsa' majliyob Elifaz ch'oyol bʌ ti Teman, yic'ot Bildad ch'oyol bʌ ti Suha, yic'ot Zofar ch'oyol bʌ ti Naaman. Tsi' cha'leyob bajche' tsi' yʌq'ueyob mandar Dios. Lac Yum tsi' jac'be i t'an Job.
Tsa' cha' aq'uenti i wenlel Job
10Lac Yum tsi' yʌq'ue Job i tijicñʌyel i pusic'al cha'an i wocol che' bʌ tsa' ujti i taj i pi'ʌlob ti oración. Tsi' yʌq'ue cha'yajl i ñumel jini chubʌ'añʌl añʌch bʌ i cha'an ti ñaxan. 11Pejtel i yalobilob i tat yic'ot i cʌñʌyo' bʌ tsa' bʌ i pi'leyob ti yambʌ ora tsa' tiliyob ti' yotot Job. Tsi' c'uxuyob waj yic'ot. Tsi' pejcayob ti uts bʌ t'an cha'an mi' ñuq'uesʌbeñob i pusic'al, cha'an tsi' ñusa pejtel jini wocol tsa' bʌ i chocbe tilel lac Yum. Ti jujuntiquil tsi' yʌq'ueyob jujunq'uel taq'uin yic'ot jujunxojt mʌtc'ʌbʌl ti' majtan jach.
12Lac Yum ñumen tsi' yʌq'ue i yutslel che' ñoxix. Tsi' cha' taja i wenlel che' bajche' ti yambʌ ora che' ch'iton to. Tsa' p'ojli i yʌlac' c'ʌlʌl añʌchix i cha'an chʌnlujump'ejl mil (14,000) tiñʌme' yic'ot wʌcp'ejl mil camello, yic'ot cha'p'ejl mil wacax, yic'ot jump'ejl mil burro. 13Tsi' yʌq'ue ja'el wuctiquil ch'iton bʌ i yalobil yic'ot uxtiquil xch'oc bʌ i yalobil. 14Tsi' yotsʌbe i c'aba' jini chichʌl bʌ Jemima, i c'aba' ijts'iñʌl bʌ jiñʌch Cesia, i c'aba' yambʌ Keren Hapuc. 15Wen i t'ojol jax jini uxtiquil. Ti pejtelel jini lum ma'anic lajalo' bʌ bajche' xch'oc bʌ i yalobilob Job. Job tsi' tem t'oxbeyob i chubʌ'an yic'ot winic bʌ i yalobilob. 16Lac Yum tsi' yʌq'ue Job yambʌ wucc'al i jabilel. Tsi' q'uele i yalobilob yic'ot i yij yic'ot i yalobilob i yij c'ʌlʌl ti' chʌnlajmlel i p'olbal. 17Wen ñoxix tsa' chʌmi Job che' cabʌlix tsi' yubi i tijicñʌyel i pusic'al.
Currently Selected:
JOB 42: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.